Մինչ աշխարհի ուշադրությունը սևեռված է Ուկրաինայի վրա, Ադրբեջանը ցանկացած պահի կարող է լայնածավալ սադրանք սկսելու փորձ կատարել: Հունական «Կաթիմերինի» պարբերականին տված հարցազրույցում ասել է Հայաստանի արտաքին գործերի նախարար Արարատ Միրզոյանը: Արտաքին քաղաքական գերատեսչության ղեկավարը կարևորել է միջազգային հանրության կողմից արդյունավետ քայլերի իրականացումը՝ Հարավային Կովկասում իրավիճակի ապակայունացման փորձերը կանխելու համար։
Արարատ Միրզոյան (ՀՀ արտաքին գործերի նախարար) - Մինչ Հայաստանն իր գործողություններով ձգտում է վերսկսել խաղաղության համապարփակ բանակցությունները, այդ թվում՝ Լեռնային Ղարաբաղի հակամարտության կարգավորման շուրջ, և դրանով իսկ կայունություն և խաղաղություն հաստատել տարածաշրջանում, Ադրբեջանը շարունակում է սադրիչ գործողությունների և ուժի կիրառման սպառնալիքների իր քաղաքականությունը։ Ուկրաինայում ստեղծված իրավիճակից հետո ադրբեջանական զինուժը ներխուժեց Լեռնային Ղարաբաղի Փառուխ գյուղ, որին նախորդել էին գյուղերի և քաղաքացիական ենթակառուցվածքների շարունակական ռմբակոծումները, հարևան գյուղերի խաղաղ հայ բնակչությանը ուժի կիրառման սպառնալիքների ներքո հասցեագրված կոչերը՝ լքելու իրենց տները, աննախադեպ ցուրտ եղանակային պայմաններում գազատարի աշխատանքի մի քանի շաբաթով խափանումը և այլն։
Շարունակելով թեման՝ Արարատ Միրզոյանը վերահաստատել է՝ չնայած ադրբեջանական իշխանությունների պնդումներին, թե Լեռնային Ղարաբաղը՝ որպես սուբյեկտ, այլևս գոյություն չունի, հակամարտությունն էլ ավարտված է, իրականությունն ու միջազգային հանրության դիրքորոշումը հակառակն են ապացուցում:
Արարատ Միրզոյան - Լեռնային Ղարաբաղը գոյություն ունի, գոյություն ունի իր հայ բնակչությամբ, որը շարունակում է ապրել իր նախնիների հողում, և որի անվտանգությունն այժմ ապահովում են ռուս խաղաղապահները՝ համաձայն 2020 թվականի նոյեմբերի 9-ի եռակողմ հայտարարության, որով դադարեցվեց ավերիչ պատերազմը։ Հակամարտությունը չի դադարում գոյություն ունենալ միայն այն պատճառով, որ կողմերից մեկը հայտարարում է, թե այն գոյություն չունի։ Դա ինքնախաբեություն է։ Ավելին, մեր բազմաթիվ միջազգային գործընկերների և կազմակերպությունների, այդ թվում՝ միջնորդ երկրների պաշտոնական հայտարարությունները նույնպես հստակ ցույց են տալիս, որ Լեռնային Ղարաբաղի հակամարտությունը դեռևս վերջնական կարգավորում պետք է ստանա բանակցությունների միջոցով՝ ԵԱՀԿ Մինսկի խմբի համանախագահության մանդատի ներքո. կարգավորում, որը կերաշխավորի արցախահայության անվտանգությունը և բոլոր իրավունքների պաշտպանությունը, և համապատասխանաբար, դրանից բխող Լեռնային Ղարաբաղի վերջնական կարգավիճակը։
ՀԱՐԱՎԱՅԻՆ ԿՈՎԿԱՍՈՒՄ ԽԱՂԱՂՈՒԹՅԱՆ ՀՆԱՐԱՎՈՐՈՒԹՅՈՒՆ ԿԱ. ՄԻՐԶՈՅԱՆ
Անդրադառնալով Հայաստանի և Ադրբեջանի միջև հարաբերությունների կարգավորման հարցին՝ Արարատ Միրզոյանը վերահաստատել է երկու երկրի միջև սահմանազատման և սահմանային անվտանգության, տարածաշրջանում տնտեսական և տրանսպորտային հաղորդակցության ապաշրջափակման հանձնառությունը, սակայն ընգծել՝ գործընթացն ավելի հարթ ու արդյունավետ կընթանար, եթե Ադրբեջանը զերծ մնար հայատյաց հռետորաբանությունից ու վերադարձներ Բաքվում պահվող հայ ռազմագերիներին և քաղաքացիական անձանց:
Արարատ Միրզոյան - Ընդհանուր առմամբ, մենք կարծում ենք, որ չնայած այն ամբողջ արյանն ու ատելությանը, որը եղել է տարածաշրջանում, Հարավային Կովկասում խաղաղության իրական հնարավորություն կա։ Հայաստանը բազմիցս վերահաստատել է երկարաժամկետ կայունություն հաստատելու և տարածաշրջանում խաղաղ զարգացման դարաշրջան բացելու իր պատրաստակամությունը։ Միևնույն ժամանակ, ակնհայտ է, որ այդ ջանքերը չեն կարող միակողմանի լինել, և այդ ուղղությամբ մենք ակնկալում ենք նույնքան կառուցողական մոտեցում և անկեղծ գործնական քայլեր ադրբեջանական կողմից։
ՀՀ-Ն ԱՋԱԿՑՈՒՄ Է ՀՈՒՆԱՍՏԱՆԻ ՏԱՐԱԾՔԱՅԻՆ ԱՄԲՈՂՋԱԿԱՆՈՒԹՅԱՆԸ
Հայ-թուրքական հարաբերությունների կարգավորման համար էլ՝ Հայաստանը կոնկրետ քայլեր ձեռնարկելու պատրաստակամություն և քաղաքական կամք է ակնկալում թուրքական կողմից,- նշել է Միրզոյանը, անդրադարձել նաև հույն-թուրքական սահմանի իրավիճակին և Կիպրոսի հարցին:
Արարատ Միրզոյան - Հայաստանը լիովին աջակցում է Հունաստանի Հանրապետության տարածքային ամբողջականությանը և ինքնիշխանությանը: Հայաստանն անընդունելի է համարում ցանկացած գործողություն և քայլ, որը կարող է կոպտորեն խախտել միջազգային իրավունքի նորմերը, միջազգային ծովային իրավունքը, ինչպես նաև ՄԱԿ-ի կանոնադրությունը։ Ինչ վերաբերում է Կիպրոսի խնդրին, ինչպես Լեռնային Ղարաբաղի հիմնախնդրում, այս հարցում ևս մեզ համար անընդունելի է ուժի կիրառման հետևանքները որպես լուծում ներկայացնելու ցանկացած փորձ։
Հայաստանի արտաքին գործերի նախարարը կարևոր է համարել նաև Հայաստան-Հունաստան-Կիպրոս եռակողմ ձևաչափի շարունակականությունը: Անդրադառնալով Հայաստան-Հունաստան երկկողմ գործակցությանը, Արարատ Միրզոյանը անհրաժեշտ է համարել այն հասցնել ռազմավարական գործընկերության մակարդակի։
Հեղինակ՝ Նորայր Շողիկյան
