Ֆրանսիայում նախագահի ընտրության առաջին փուլում թեկնածուներից որևէ մեկին չի հաջողվել ստանալ ձայների մեծամասնությունը: Ապրիլի 10-ին կայացած ընտրության քվեաթերթիկների հաշվարկից հետո պարզվել է՝ գործող նախագահ Էմանուել Մակրոնը ստացել է՝ 27,8, իսկ «Ազգային միավորման» թեկնածու Մարին Լը Պենը՝ 23,1 տոկոս ձայն:
Էմանուել Մակրոն (Ֆրանսիայի նախագահի թեկնածու, գործող նախագահ) - Ես կոչ եմ անում իմ հայրենակիցներին, անկախ նրանից, թե ինչ ընտրություն են արել առաջին փուլում, միանալ մեզ: Մեզ համար այս շրջադարձային պահին ես ուզում եմ ձեռք մեկնել նրանց, ովքեր ցանկանում են աշխատել Ֆրանսիայի համար: Մեր առաջարկած նախագիծը շատ ավելի ուժեղ արձագանք է այսօրվա մարտահրավերներին. դուք կարող եք հույս դնել ինձ վրա: Ապրիլի 24-ին Ֆրանսիայի և Եվրոպայի համար մենք կարող ենք նոր դարաշրջանի ընտրություն կատարել, ապրիլի 24-ին մենք պետք է հույսի ընտրություն կատարենք, ապրիլի 24-ին միասին մենք կընտրենք Ֆրանսիան և Եվրոպան:
Քվեարկության երկրորդ փուլը կկայանա ապրիլի 24-ին: Նախագահի ընտրության երկրորդ փուլի անցկացումը Ֆրանսիայում սովորական երևույթ է: 1958 թվականին հիմնադրված հինգերորդ Հանրապետության 64-ամյա պատմության ընթացքում անցկացված 11 ընտրությունից միայն առաջինում է նախագահն ընտրվել մեկ փուլով:
Ուշագրավ է, որ վերջին՝ 2017 թվականին անցկացված նախագահական ընտրության երկրորդ փուլում ևս պայքարում էին Էմանուել Մակրոնն ու Մարին Լը Պենը: 5 տարի առաջ Լը Պենը ստացավ քվեների 33,9%-ը, իսկ Մակրոնը՝ 66,1%ը՝ դառնալով Ֆրանսիայի պատմության ամենաերիտասարդ նախագահը:
Մարին Լը Պեն (Ֆրանսիայի նախագահի թեկնածու) - Ֆրանսիացիներն ասեցին իրենց խոսքը ու պատվի արժանացրեցին՝ անցնելու երկրորդ փուլ: Ես կոչ եմ անում բոլոր ֆրանսիացիներին միանալ այս մեծ ազգային և ժողովրդական հավաքին: Մենք միասին ենք կերտելու այս հաղթանակը, իրականացնելու իշխանության կարևոր փոփոխությունը, որն անհրաժեշտ է Ֆրանսիային և հենց այդ ընտրությունն է տանելու մեր երկիրը դեպի երրորդ հազարամյակ: Փա՛ռք Հանրապետությանը, փա՛ռք Ֆրանսիային:
Նախագահի ընտրության երկրորդ փուլում, ըստ սոցիոլոգիական հարցումների, քաղաքացիների նախապատվությունը Մակրոնի կողմն է. երկրորդ փուլում նրա օգտին է պատրաստ քվեարկել ընտրողների 53 տոկոսը: Պայքարից դուրս մնացած թեկնածուների մեծ մասն արդեն իրենց կողմնակիցներին կոչ է արել աջակցել գործող նախագահին: Ընտրության ելքի վրա կարող է ազդել նաև թեկնածուների միջև սպասվող բանավեճը:
Տիգրան Եգավյան (քաղաքագետ) - Հիմա հստակ է, որ երկու կողմերը լրջությամբ պատրաստվում են շատ ավելի բովանդակալից և մակարդակով բանավեճի, որի կարիքը ֆրանսիացիներն ունեն ու կսպասեն: 2017-ին Մարին Լը Պենը ձախողեց առաջին հերթին այդ բանավեճի պատճառով, որովհետև ակնհայտ եղավ, որ նա պատրաստված չէր Ֆրանսիայի պես երկրին իշխելու:
Քաղաքագետի դիտարկմամբ՝ Մարին Լը Պենը այսօր ավելի պատրաստ է ընտրապայքարին, քան 5 տարի առաջ:
Տիգրան Եգավյան - Ժամանակին Մարին Լը Պենը ենթակա էր բազմատեսակ քննադատությունների, որ նա չէր կարող ոչ միայն իշխել, այլ նաև շատ ծայրահեղ գաղափարներ էր կրում: Նա այս հինգ տարվա ընթացքում կարողացավ իր մոտեցումները, քաղաքականությունը փոխել և մի փոքր ավելի հարմարվել ֆրանսիացիների կարիքներին և նրանց մտահոգությունները հանդարտեցնելուն:
Ընտրապայքարի ընթացքում թեկնածուներն ուշադրություն են դարձնում նաև հայ համայնքին հուզող՝ Հայոց ցեղասպանության թեմային և Արցախյան հիմնախնդրին: Տարբեր տվյալներով, Ֆրանսիայում շուրջ 1.5 միլիոն հայ է բնակվում. թեկնածուների համար կարևոր է յուրաքանչյուրի քվե:
Տիգրան Եգավյան - Մակրոնը վերջին շաբաթներում կարևոր հարցազրույց տվեց ֆրանսիահայ առաջին ամսաթերթին՝ «Նուվելլ դե Արմենի» ամսաթերթին, նշեց, որ Ղարաբաղի հարցը լուծված չէ, և պետք է Ղարաբաղին սատարել, որպեսզի հասնենք արդար խաղաղության: Մարին Լը Պենը մինչև վերջերս շատ հայամետ թեկնածու չի եղել, ընդհանրապես շատ քիչ ուշադրություն է դարձրել Հայաստանին և Հայ դատին:
Երկրորդ փուլին ընդառաջ թեկնածուների մեջ թեժ պայքար է սպասվում, որը էլ ավելի տեսանելի կդարձնի նրանց քաղաքական հայացքների տարբերությունները, իսկ դրանք քիչ չեն:
Եթե Մակրոնն առաջ է տանում Եվրամիության ամրապնդման, տարբեր ուժային կենտրոններից դրա կախվածության թուլացման գաղափարը, Լը Պենը կողմ է Փարիզի նկատմամբ Եվրամիության ազդեցության թուլացմանը և պնդում է, որ ֆրանսիական օրենսդրությունը պետք է գերակա լինի եվրոպական օրենսդրության նկատմամբ: Թեև Մակրոնը պարբերաբար քննադատել է ՆԱՏՕ-ին՝ ուկրաինական զարգացումների ֆոնին, հստակ ընդգծում է՝ դաշինքը առանցքային դերակատարում ունի Եվրոպայի անվտանգային համակարգում, իսկ Մարին Լը Պենը հայտարարել է, որ ընտրվելու դեպքում ցանկանում է դուրս բերել Ֆրանսիան ՆԱՏՕ-ի միացյալ հրամանատարությունից:
Չնայած թեկնածուների մոտեցումներում առկա այս տարբերություններին՝ քաղաքագետը համոզված է՝ թե՛ Մակրոնի վերընտրվելու, թե՛ Լը Պենի հաջողելու դեպքում, արմատական փոփոխություններ արտաքին քաղաքականության ոլորտում չեն լինի:
Հեղինակ՝ Նորայր Շողիկյան
