ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովը մարտի 17-ի արտահերթ նիստում քննարկել է 50 տոկոս և ավելի պետական մասնակցությամբ ձեռնարկությունների, ինչպես նաև մասնավոր սեփականությամբ առևտրային կազմակերպությունների խթանման միջոցով Եվրասիական տնտեսական միության անդամ պետությունների կողմից արդյունաբերության ճյուղերում համատեղ կոոպերացիոն նախագծերի իրականացման հիմնախնդիրները: Այդ մասին հայտնում են ԱԺ-ից:
ՀՀ էկոնոմիկայի նախարար Գևորգ Պապոյանը նշել է, որ ԵԱՏՄ անդամ պետությունների միջև արդյունաբերական համագործակցությունը զարգացնելու նպատակով Բարձրագույն տնտեսական խորհրդի կողմից ձևավորվել է մեխանիզմ, որը ենթադրում է ֆինանսական աջակցություն միջազգային և ազգային ֆինանսական կազմակերպությունների կողմից տրված վարկերի սուբսիդավորման տեսքով, որոնց ցանկը սահմանում է ԵՏՀ խորհուրդը: Ֆինանսական աջակցության մեխանիզմը նախատեսվում է իրականացնել 5 տարի ժամկետով: Ակնկալվում է, որ իրական հատվածում ֆինանսավորման նոր մեխանիզմը կնպաստի ԵԱՏՄ անդամ պետությունների արդյունաբերական հատվածի հետագա տեխնոլոգիական զարգացմանը: ԵՏՀ խորհրդի հրամանով հաստատվել է մեխանիզմ՝ ներդրմանը մասնակցող բանկերի ցանկով: Հայաստանի կողմից առաջարկվել է այդ ցանկում ընդգրկել ռեզիդենտ հանդիսացող լիցենզավորված 16 հայկական բանկ: Ըստ Գևորգ Պապոյանի՝ այս մեխանիզմը դրական գործոն կարող է հանդիսանալ հայկական արդյունաբերական ձեռնարկությունների վերազգային ֆինանսավորմամբ համատեղ կոոպերացիոն նախագծեր իրականացնելու համար: Ըստ կարգի՝ կոոպերացիոն նախագծերին պետք է մասնակցեն առնվազն երեք անդամ պետություններ ներկայացնող ձեռնարկություններ, իսկ ծրագրին մասնակից համարվելու մասնակցության չափը պետք է լինի ոչ պակաս, քան նախագծի ընդհանուր գումարի 45 տոկոսը:
Մինչ այժմ երեք նախագիծ է ներկայացվել, որոնցից առաջինը հետ է կանչվել, իսկ երկուսը քննարկումների փուլում են: Նախագծերից մեկով նախատեսվում է նոր տիպի երկաթգծի սլաքների արտադրություն, իսկ մյուսը վերաբերում է գյուղտեխնիկայի արտադրությանը: Նախարարը հավաստիացրել է, որ իր ղեկավարած նախարարությունը պոտենցիալ մասնակիցներ ներգրավվելու համար իրազեկման լայնածավալ աշխատանքներ է իրականացրել, հանդիպումներ կազմակերպել ոլորտի ներկայացուցիչների մասնակցությամբ: Յուրաքանչյուր հանդիպմանը մասնակցել է տեղական բիզնեսի շուրջ 100 ներկայացուցիչ:
«Պետական մասնակցությամբ առևտրային կազմակերպությունները շուրջ 147-ն են, որոնց մոնիթորինգի ենք ենթարկում: Դրանցից շուրջ 20-ը մեր ենթակայության տակ են, որոնք ընդգրկված են հիմնական մասնավորեցման ծրագրերում»,- այս մասին հայտնել է ՀՀ պետական գույքի կառավարման կոմիտեի նախագահ Առնակ Ավետիսյանն ու հավելել, որ մասնավորեցման ծրագրերում ընդգրկված կազմակերպություններն անարդյունավետ են աշխատում և համապատասխան ներուժ չունեն:
Տարբեր նախարարությունների ենթակայությամբ գործող 50 տոկոս և ավելի պետական մասնակցությամբ ձեռնարկությունների գերակշիռ մասը հիմնականում առողջապահական կազմակերպություններն են՝ շուրջ 78-ը: Դրանք թեև իրենց կազմակերպաիրավական ձևով առևտրային են, բայց հիմնականում ծառայություններ են իրականացնում պետական պատվերի շրջանակում: Այս շարքում են նաև էներգետիկ ու արտադրական ոլորտներում գործունեություն իրականացնող կազմակերպությունները, որոնց մասով եւս Պետական գույքի կառավարման կոմիտեի գործառույթը սահմանափակվում է հիմնականում մոնիտորինգի իրականացմամբ:
«ԵՏՀ-ի շրջանակում կոոպերացիայի հնարավորությունների և տվյալ ծրագրի շրջանակում ներառելու նպատակով մենք կարող ենք համագործակցել Էկոնոմիկայի նախարարության հետ, մեր դիտարկումների ընթացքում նկատի ունենալ նաև այդ ներուժի բացահայտման հանգամանքը, բայց, ինչպես նշեցի, խոսքը սահմանափակ թվով և սահմանափակ հնարավորությամբ կազմակերպությունների մասին է»,- եզրափակել է խոսքն Առնակ Ավետիսյանը:
Հարցուպատասխանի ընթացքում անդրադարձ է եղել պոտենցիալի գնահատման աշխատանքներին, Հայաստանում արտադրություններ ձևավորելու հեռանկարներին, արտադրական հզորությունների համատեքստում մի շարք մասնագիտությունների գծով մասնագետների պատրաստման գործընթացին, ներդրումների գրավչության ապահովմանը, պետություն-մասնավոր հատված համագործակցությանը և ոլորտային այլ հարցերի:
