ՀԱՐԿԵՐ-ՀՆԱ ՑՈՒՑԱՆԻՇԸ 2021-ԻՆ ԿԱԶՄԵԼ Է 22.7 ՏՈԿՈՍ. ԲԱԴԱՍՅԱՆ
Չնայած 2020 թվականին բռնկված կորոնավիրուսի համավարակն ու 44-օրյա պատերազմն իրենց ազդեցությունն են ունեցել Պետական եկամուտների կոմիտեի 2021 թվականի աշխատանքի վրա, հնարավոր է եղել ապահովել պետական բյուջեի եկամուտները նախատեսված ցուցանիշներով: Ազգային ժողովում ֆինանսավարկային և բյուջետային ու տնտեսական հարցերի մշտական հանձնաժողովների համատեղ նիստում պետական բյուջեի 2021 թվականի տարեկան հաշվետվության քննարկման ժամանակ հայտնեց ՊԵԿ նախագահ Ռուստամ Բադասյանը:
Ռուստամ Բադասյան (ՊԵԿ նախագահ) - Հարկեր-ՀՆԱ ցուցանիշը, որը հարկային վարչարարության էֆեկտիվության ամենաէական գործոններից մեկն է, կազմել է 22.7%, որը 0,2 տոկոսային կետով գերազանցել է 21 թվականի համար սպասվող ցուցանիշը և 0,3 տոկոսային կետով՝ 20 թվականի ցուցանիշը:
Եկամուտների աճ գրանցվել է բոլոր հարկատեսակների գծով, բացառությամբ ակցիզային հարկի:
Ռուստամ Բադասյանն ընդգծեց՝ եկամտային հարկի գծով վերադարձված գումարները 2021-ին 83.8 տոկոսով կամ 14.9 մլրդ դրամով գերազանցել են նախորդ տարվա ցուցանիշը:
Ռուստամ Բադասյան - Հիփոթեքային վարկի սպասարկման համար վճարվող տոկոսների մասով վարկառուներին և համավարկառուներին է վերադարձվել 22.7 մլրդ դրամ եկամտային հարկ, որը նախորդ տարվա համեմատ աճել է 70.4 տոկոսով կամ 9.4 մլրդ դրամով:
«Քաղաքացիական պայմանագրից» Ծովինար Վարդանյանը հետաքրքրվեց կրիպտոարժույթների վերաբերյալ Պետեկամուտների կոմիտեի դիրքորոշման մասին: Բադասյանը նկատեց՝ ոլորտը կարգավորված չէ, հստակեցված չէ, թե ինչ են կրիպտոակտիվները, ինչ իրավական կարգավիճակ ունեն:
Ռուստամ Բադասյան - Աշխարհը գնացել է կարգավորման ճանապարհով, և մենք Կենտրոնական բանկին բազմիցս խնդրել ենք, որ այդ ոլորտն անպայման կարգավորվի, որովհետև չկարգավորելով՝ մենք թույլ ենք տալիս բազմաթիվ ստվերային գործարքներ, մինչդեռ աշխարհում դրա փորձն արդեն կա: Եվ կրիպտոակտիվների միջոցով թե´ հարկերից խուսափելու, թե´ փողերի լվացման դեպքեր, բնական է, որ կան, և բնական է, որ այդ հարցը շուտափույթ պետք է կարգավորել, այդ թվում՝ հարկային վարչարարությունը կազմակերպելու համար:
ՍԱՆՈՍՅԱՆԸ՝ ՀՅՈՒՍԻՍ-ՀԱՐԱՎ ՃԱՆԱՊԱՐՀԻ ԿԱՌՈՒՑՄԱՆ ՄԱՍԻՆ
Տրանսպորտ, ջրային տնտեսություն, էներգետիկ և բնական պաշարների ոլորտ, ՊԵԿ նախագահից հետո խոսափողին մոտեցավ Տարածքային կառավարման և ենթակառուցվածքների նախարարը: Կատարողականի արդյունքները ներկայացնելուց հետո Գնել Սանոսյանն անդրադարձավ 2009 թվականից կառուցվող Հյուսիս-հարավ ճանապարհին: Նախարարն ընդգծեց՝ 13 տարում կառուցվել է դեռ 5-6%-ը:
Գնել Սանոսյան (ՀՀ տարածքային կառավարման և ենթակառուցվածքների նախարար) - Վերջին երկու-երեք տարիներին բավական ակտիվ աշխատանք կա տարբեր տրանշների հատվածում, մասնավորապես, նախորդ տարի մեզ հաջողվեց 50 կմ ասֆալտապատել, որը վերջին տարիների ամենաբարձր ցուցանիշն էր: Այս տարի, կարծում ենք, այդ ցուցանիշը կգերազանցենք: Մի շարք առաջ եկած խնդիրներ, ոչ ամբողջովին, բայց որոշ հարցեր հաղթահարված են, և դրական տենդենցով առաջ ենք գնում:
Մայրուղու տրանշ-2-ի հատվածներից մեկում 8 կմ-ի համար մրցույթ է հայտարարվել, այս տարի այդ հատվածում կսկսվեն աշխատանքները՝ ասաց Սանոսյանը:
Գնել Սանոսյան - Աշտարակից Թալին գնացող հատվածի 8 կմ-ն է:
ՀՈՒԼԻՍԻՆ ՍԵՎԱՆԱ ԼՃԻ ՋՐԻ ՄԱԿԱՐԴԱԿԻ ԲԱՐՁՐԱՑՈՒՄ Է ԿԱՆԽԱՏԵՍՎՈՒՄ
Պատգամավոր Միքայել Թումասյանը հետաքրքվեց ջրամբարների լցվածությունից: Գնել Սանոսյանը հայտնեց՝ նախորդ տարվա նույն օրվա համեմատ, այսօր հիմնական ոռոգվող ջրամբարներում 207 մլն խորանարդ մետր ավելի շատ ջուր է ամբարված, դրանից 198 մլն-ը՝ Ախուրյանի ջրամբարում: Անդրադառնալով Սևանա լճին էլ, նշեց՝ նախորդ տարվա հունիսի 1-ի համեմատ այսօր ջրի մակարդակը ցածր է 19 սանտիմետրով, սակայն կանխատեսվում է, որ հուլիս ամսվա սկզբին որոշակի բարձրացում կլինի:
Գնել Սանոսյան - Այս տարի ոռոգման սեզոնը որոշակի հետ է ընկել, եթե նախորդ տարի մայիսի 25-ից էր Սևանա լճից ջուր վերցվում, այս տարի մոտ օրերս, մոտ 2-3 օրից նոր կսկսենք Սևանից ջուր վերցնել՝ հաշվի առնելով, որ գետերում ու Մարմարիկում եղած ջուրը բավարարում է:
2021-ԻՆ ԻՐԱՆԻ ՀԵՏ ԱՌԵՎՏՐԱՇՐՋԱՆԱՌՈՒԹՅՈՒՆՆ ԱՃԵԼ Է 25 ՏՈԿՈՍՈՎ
Էկոնոմիկայի նախարար Վահան Քերոբյանն էլ կարևորեց տարբեր երկրներում Հայաստանի առևտրային կցորդների դերը: Առանձնահատուկ անդրադարձավ Իրանում նշված պաշտոնյայի աշխատանքի արդյունավետությանը:
Վահան Քերոբյան (ՀՀ էկոնոմիկայի նախարար) - Աշխատանքի շնորհիվ մենք կարողացել ենք այնպես անել, որ անցած տարի ատևտրաշրջանառությունը ԻԻՀ-ի հետ, չնայած այն բազմաթիվ խոչընդոտներին, որ եղան, աճեց 25 տոկոսով, մոտ 400 մլն դոլարից դարձավ 500 մլն դոլարից ավելի: Այս տարվա տեմպերն էլ շատ լավն են, Կարծում ենք, որ այս տարի էլ ոչ պակաս արդյունքներ կունենանք աճի առումով:
Իրանի հետ աշխատանքներ են տարվում Հնդկաստան-Իրան-Հայաստան-Վրաստան-Եվրոպա տրանսպորտային միջանցքը հղկելու և աշխատեցնելու ուղղությամբ՝ ասաց Քերոբյանը: Տնտեսական հարաբերությունների զարգացման ուղղությամբ ակտիվ աշխատում է նաև Չինաստանում Հայաստանի առևտրային կցորդը:
Վահան Քերոբյան - Այնտեղ էլ այս տարվա համար արդեն ունենք լավ պլաններ, թե ինչ միջոցառումների պետք է մասնակցենք, ինչպես պետք է ներգրավենք ներդրումներ:
ԵՐԵՎԱՆՈՒՄ ԿԱՌՈՒՑԱՊԱՏՈՒՄՆԵՐԻ ՀԱՐՑԸ՝ ՔՆՆԱՐԿՄԱՆ ԱՌԱՆՑՔՈՒՄ
Քննարկման հաջորդ ոլորտը քաղաքաշինությունն էր, առանցքում՝ Երևանում կառուցապատումների հարցը: Քաղաքաշինության կոմիտեի նախագահը հայտնեց՝ քաղաքապետարանի կողմից իրականացվում են Երևանի գլխավոր հատակագծի մշակման ուղղությամբ աշխատանքներ: Փաստաթուղթը կկանոնակարգի մայրաքաղաքում կառուցապատման գործընթացները: Գործադրվում են նաև ոլորտի կարգավորման այլ մեխանիզմներ:
Արմեն Ղուլարյան (Քաղաքաշինության կոմիտեի նախագահ) - Շրջանառության մեջ ենք դրել Երևանի փոքր կենտրոնի մասին օրենքը: Գտնում ենք, որ պետք է խիստ սահմանափակել Երևանի կենտրոնում շինարարության ծավալները:
Կադաստրի կոմիտեի ղեկավարի ելույթի ընթացքում էլ Բաբկեն Թունյանը հետաքրքրվեց՝ օրեր առաջ տիեզերք արձակված Հայաստանի Հանրապետության առաջին արբանյակը ինչ հնարավորություններ կստեղծի կադաստրային ոլորտում:
Սուրեն Թովմասյան (Կադաստրի կոմիտեի ղեկավար) - Արբանյակի առկայությունը մեզ թույլ է տալու ավելի թարմացված տվյալներ ներբեռնել ազգային գեոպորտալ, որը Կադաստրի կոմիտեն մոտ ապագայում գործարկելու է, յուրաքանչյուր գեոպորտալի բազային շերտերի մեջ ներառվում են հենց արբանյակային ու օդային լուսանկարները և դրանց պարբերաբար թարմացումը թույլ կտա մեր քաղաքացիներին տեսնել իրականությունը արդեն համակարգչի վրա, այլ ոչ թե տեղում այցելություն կատարելով:
ԸՆԴԴԻՄՈՒԹՅՈՒՆԸ ԴԱՐՁՅԱԼ ՉՄԱՍՆԱԿՑԵՑ ԲՅՈՒՋԵՏԱՅԻՆ ՔՆՆԱՐԿՄԱՆԸ
Հանձնաժողովների համատեղ նիստում բյուջեի կատարողականի արդյունքները ներկայացրին նաև Բարձր տեխնոլոգիական արդյունաբերության նախարարության, Հանրային ծառայությունները կարգավորող հանձնաժողովի և Մրցակցության պաշտպանության հանձնաժողովների ներկայացուցիչները: Մայիսի 31-ից մեկնարկած բյուջետային քննարկմանը այսօր ևս չմասնակցեցին Ազգային ժողովի ընդդիմադիր «Հայաստան» և «Պատիվ ունեմ» խմբակցությունների պատգամավորները:
Բաբկեն Թունյան (ՀՀ ԱԺ տնտեսական հարցերի մշտական հանձնաժողովի նախագահի տեղակալ) - Այսօր կլինի մի ամիս՝ Ազգային ժողով չեն ներկայանում, բայց, ենթադրում եմ, որ այսօր կստանան մայիս ամսվա աշխատավարձը:
Խորհրդարանի մշտական հանձնաժողովները քննարկումները կշարունակեն հունիսի 2-ի համատեղ նիստում:
Հեղինակ՝ Նորայր Շողիկյան
