Վերին Լարսում իրավիճակն այս պահին կայունանում է՝ խորհրդարանում տեղեկացրեց տարածքային կառավարման փոխնախարարը, ասաց՝ հիմա վրացական կողմում 1200-ից ավելի բեռնատար կա մնացած, որից 450-500-ը՝ հայկական: Հայաստանը Ռուսաստանին կապող միակ ցամաքային ճանապարհին կուտակումների հերթական ալիքը սկսվել էր հոկտեմբերի 8-ից՝ Ղրիմի կամրջի պայթյունից հետո, նշեց Արմեն Սիմոնյանը: Նրա խոսքով՝ անվտանգությամբ պայմանավորված լրացուցիչ ստուգումների հետևանքով Լարսի թողունակությունը կտրուկ նվազել էր, բայց այժմ դրական տեղաշարժ է նկատվում:
Արմեն Սիմոնյան (ՀՀ տարածքային կառավարման և ենթակառուցվածքների նախարարի տեղակալ) - Երեկ, օրինակ՝ 492 բեռնատար տրանսպորտային միջոցներ են թույլատրել անցնել, գլոբալ առումով այս պահին վիճակը Լարսում կայունանում է, և միջինում բեռնատարները 5-7 օրվա ընթացքում, կախված բեռի տեսակից, որովհետև արագ փչացող բեռներն ավելի արագ են բաց թողնում, միջինում 5-7 օրում Լարսի անցակետը անցնում են:
Որ Լարսն անցնի 365-օրյա ռեժիմի, վրացական կողմը նոր՝ 22 կմ ճանապարհ է կառուցում, քովիդի պատճառով դրա շահագործումն ուշացավ, հիմա 2024-ի վերջ է նախանշված՝ նշեց Սիմոնյանը, սա կլուծի եղանակով պայմանավորված անցակետի փակման հարցը: Տարածաշրջանային և եվրասիական ինտեգրման հարցերի մշտական հանձնաժողովի նիստում, որտեղ քննարկվում էին ԵԱՏՄ-ում ապրանքների ազատ տեղաշարժի համատեքստում պարենային անվտանգության ապահովման հարցերը, պատգամավոր Խաչատուր Սուքիասյանը նկատեց՝ սա մշտական խնդիր է, պետք է ակտիվ քայլեր ձեռնարկել, որ հարցը լուծվի, հայ արտահանողը չտուժի:
Խաչատուր Սուքիասյան (ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովի անդամ) - Տնտեսվարողը վնասվում ա, և մենք նայում ենք մեկս մյուսի երեսին, ոչ թե զբաղվում ենք, էդ գործողություններն են անում:
Պատգամավորի դիտարկմանն արձագանքեց փոխնախարարը, ասաց՝ ԵԱՏՄ տարածքում մաքսային մարմիններն արդեն մշակել են նավիգացիոն կապարակնիքներով փոխադրման համաձայնագիրը, հիմա վավերացման փուլն է, դրա կիրառումը թույլ կտա արագ փոխադրումներ անել՝ առանց թղթային քաշքշուկի: ՊԵԿ նախագահի տեղակալն էլ զեկուցեց՝ ռուսական կողմի հետ պայմանավորվել են մինչև վավերացումը երկկողմ փոխադրումների դեպքում օր առաջ կիրառել համակարգը, կանաչ լույս վառել:
Աշոտ Մուրադյան (ՊԵԿ նախագահի տեղակալ) - Նավիգացիոն պլոմբը ինքը տեխնիկական ԱյԹի լուծում է և հնարավորություն է տալիս իր մեջ զետեղել այն անհրաժեշտ տեղեկատվությունը, որը անհրաժեշտ է համապատասխան մաքսային անցման կետում ապրանքների ձևակերպման համար, և սարքը կարա նույնիսկ հնարավորություն տա հեռավորությունից այդ ինֆորմացիան կարդալ:
Զուգահեռ բանակցում են Թբիլիսիի հետ, որ նավիգացիոն կապարակնիքով հայկական բեռնատարներն առանց հերթի նաև Վրաստանով անցնեն՝ ասաց Մուրադյանը: Սա էլ փոխադարձ սկզբունքի վրա կհիմնվի, արագ ու անհպում մաքսային հսկողություն իրականացնելու նախագիծը քննարկումների վերջնական փուլում է: Ըստ ՊԵԿ պաշտոնյայի՝ Լարսում նոր մաքսային կցորդ էլ ունենք, որն արդեն երկու շաբաթ ակտիվ աշխատում է: Գումարած դրան այս տարի Լարսում հայկական բեռնատարների համար լրացուցիչ տարածք է հատկացվել, որտեղ առանց հերթի մաքսային հսկողություն է իրականացվում:
Աշոտ Մուրադյան - Եթե կարիքը լիներ այդ տարածքը մեծացնելու, մեր ռուս գործընկերները պատրաստ էին նաև ավելացնելու, բայց այս պահին դրա անհրաժեշտությունը չկա, որովհետև դանդաղությունն ու թողունակության բանը պայմանավորված են հիմնականում սկանավորելու անհրաժեշտությամբ, որը ազգային անվտանգության խնդիրներից է բխում, այլ ոչ մաքսային:
Կարևորելով առաջիկայում ներդրվելիք համակարգը՝ հանձնաժողովի նախագահ Վաղարշակ Հակոբյանն էլ հիշեցրեց վիճակագրությունը՝ Հայաստանի արտաքին առևտրի թիվ մեկ գործընկերը մնում է Ռուսաստանը, առաջին 9 ամսում փոխադարձ առևտրի՝ 3.2 միլիարդ դոլարի ցուցանիշ է գրանցվել՝ 21-ի նույն ժամանակահատվածի համեմատ աճելով 80.5 տոկոսով, իսկ ԵԱՏՄ երկրների հետ առևտրաշրջանառությունն աճել է 82.7 տոկոսով:
Հեղինակ՝ Անուշ Մուրադյան
