Հայաստանի և Ադրբեջանի արտաքին գործերի նախարարների ու Ամերիկայի Միացյալ Նահանգների պետքարտուղարի եռակողմ հաջորդ հանդիպումը կկայանա Վաշինգտոնում: Ազգային ժողովում հայտնեց Հայաստանի արտգործնախարար Արարատ Միրզոյանը: Պատասխանելով Հայաստանի և Ադրբեջանի միջև բանակցային գործընթացի վերաբերյալ հարցին՝ Միրզոյանը նշեց՝ բոլոր հարցերում հայկական կողմը հանդիպում է Ադրբեջանի առավելապաշտական դիրքորոշումներին: Ըստ նախարարի՝ Ադրբեջանը համարում է, որ կարող է պայմաններ թելադրել:
ԱԳ ՆԱԽԱՐԱՐԸ՝ ՀԱՅ-ԱԴՐԲԵՋԱՆԱԿԱՆ ԲԱՆԱԿՑԱՅԻՆ ԳՈՐԾԸՆԹԱՑԻ ՄԱՍԻՆ
Արարատ Միրզոյան (ՀՀ արտաքին գործերի նախարար) - Սա, իհարկե, իրականություն չի կարող լինել, և՛ երկարատև, և՛ կայուն, համապարփակ խաղաղության այս ճանապարհով հնարավոր չէ հասնել: Լավ նորությունն այն է, որ բոլոր հարցերում, ուղղություններում, որոնք կան մեր հարաբերություններում, կա միջազգային հանրության հստակ ուշադրություն: Այս ուշադրությունը գնալով ավելի մեծանում է, և հատկապես սեպտեմբերի 13-14-ի ադրբեջանական ագրեսիայից հետո. կարծում եմ, միջազգային հանրությունը շատ հստակ ուղերձ հղեց Ադրբեջանին այն մասին, որ ուժի կիրառումը և ուժի կիրառման սպառնալիքը չի կարող լինել հարցերի լուծման ճանապարհ:
Միրզոյանն անդրադարձավ նաև տարածաշրջանային ուղիների ապաշրջափակման վերաբերյալ քննարկումներին:
Արարատ Միրզոյան - Մեր վերջին հանդիպումները, ինչպես նաև հայտարարությունները՝ Հայաստանից դուրս արվող, խոսում են այն մասին, որ որևէ մեկը կասկածի տակ չի դնում այն, որ ապաշրջափակվող և, ենթադրաբար, նոր կառուցվելիք հնարավոր նոր ճանապարհները կամ ենթակառուցվածքները՝ տրանսպորտային, ամբողջապես գտնվելու են այն երկրների սուվերենության ներքո և տարածքային ամբողջականության շրջանակներում, որոնց տարածքով անցնում են:
ՀԱՅ-ԹՈՒՐՔԱԿԱՆ ՀԱՐԱԲԵՐՈՒԹՅԱՆ ԿԱՐԳԱՎՈՐՄԱՆ ԳՈՐԾԸՆԹԱՑԸ
Խոսելով Հայաստան-Թուրքիա հարաբերությունների կարգավորման գործընթացի մասին՝ նախարարը հայտնեց՝ երկխոսությունը շարունակվում է, որոշակի առաջընթաց կա, և մոտ ապագայում կարող են դրական արդյունքներ լինել:
Արարատ Միրզոյան - Խոսակցությունը մի քանի կոնկրետ քայլերի մասին է, այդ թվում և դիվանագիտական անձնագրեր ունեցող անձանց համար սահմանի բացման վերաբերյալ, ինչպես նաև երրորդ երկրների քաղաքացիների համար սահմանի բացման վերաբերյալ:
2023-Ի ԱԳՆ ԲՅՈՒՋԵՆ ԿԿԱԶՄԻ 16 ՄԼՐԴ 510 ՄԼՆ ԴՐԱՄ
Անցնելով պետական բյուջեից հաջորդ տարվա համար արտաքին քաղաքական գերատեսչությանը տրամադրվելիք ֆինանսական միջոցներին, նախարարը նշեց՝ ընդհանուր գումարը 16 մլրդ 510 մլն դրամ է: Այն ուղղվելու է դիվանագետների վերապատրաստմանը, Հայաստանի դիվանագիտական ներկայացուցչությունների աշխատանքի ապահովմանն ու այլ միջոցառումների իրականացմանը: 2023-ին արտգործնախարարությունը մտադիր է մի շարք երկրներում մեր երկրի դիվանագիտական ներկայացուցչություններ ու գրասենյակներ բացել:
Արարատ Միրզոյան - Այս պահին պլանավորում ենք բացել դեսպանություն Ուրուգվայում և գլխավոր հյուպատոսություն Իրանի Իսլամական Հանրապետության Թավրիզ քաղաքում: Նաև դիվանագիտական գրասենյակներ կբացենք, նախատեսում ենք այս պահին Կիպրոսում, որը կգործի Հունաստանում մեր դեսպանության ներքո և Սերբիայում՝ Բելգրադում. այն կգործի Չեխիայում մեր դեսպանության ներքո, Ռուսաստանի Դաշնության Վլադիկավկազ քաղաքում և հյուպատոսական գրասենյակ կբացենք, կարող եք ենթադրել աշխարհագրությունից, որ Վերին Լարսի հետ կապված խնդիրները քիչ դեր չունեն մեր որոշման մեջ՝ բացել գրասենյակ Վլադիկավկազում:
Պետական բյուջեից 133 մլն դրամ էլ Արտաքին գործերի նախարարությունը կհատկացնի Հայաստանի դիվանագիտական ներկայացուցչությունների շենքային պայմանների բարելավմանը:
Հեղինակ՝ Նորայր Շողիկյան
