ԿԳՄՍ նախարար Ժաննա Անդրեասյանը 1-ին կարգի դիպլոմներ է հանձնել 2025-2026 ուստարվա դպրոցականների հանրապետական առարկայական օլիմպիադաների հաղթողներին։ Այս մասին տեղեկացնում են ԿԳՄՍՆ-ից:
ԿԳՄՍ նախարարության նախաձեռնությամբ միջոցառումն անցկացվել է Բյուրականի աստղադիտարանում․ ներկա են եղել ԿԳՄՍ նախարարի տեղակալ Արաքսիա Սվաջյանը, աստղադիտարանի տնօրեն Արեգ Միքայելյանը, առարկայական օլիմպիադաների կազմակերպիչները և դիպլոմակիրները։
Առարկայական օլիմպիադաների հանրապետական փուլին 2025-2026 ուստարում մասնակցել է 1463 աշակերտ: 1-ին կարգի դիպլոմներ է ստացել 83 աշակերտ: Եղել են նաև կրկնակի հաղթողներ: Ընդհանուր առմամբ՝ օլիմպիադաների դպրոցական փուլին բոլոր առարկաներից փաստացի մասնակցել է 1259 դպրոցի 112673 աշակերտ։
Ողջունելով ներկաներին՝ նախարար Ժաննա Անդրեասյանը շնորհավորել է դպրոցականներին գրանցած հաջողությունների համար: Նրա դիտարկմամբ՝ առարկայական օլիմպիադաներում հաջողությունները վկայում են դպրոցական ծրագրից դուրս գիտելիքը խորացնելու, նոր գիտելիքներ ձեռք բերելու և ինքնազարգացման ձգտման մասին։
«Սա շատ խրախուսելի և ողջունելի ձգտում է, որը դուք բոլորդ դրսևորել եք: Եթե այսօր այստեղ եք, նշանակում է՝ չեք բավարարվում այն պարտադիր նվազագույնով, որը նախատեսված է դպրոցական ծրագրում, և ուզում եք ավելին իմանալ»,- նշել է նախարարը՝ ընդգծելով, որ այդ մոտեցումն է ձևավորում ապագայի հաջողությունները։
Ժաննա Անդրեասյանը նշել է, որ նախարարությունն արդեն ձևավորված ավանդույթ ունի՝ հանդիպելու առարկայական օլիմպիադաներում հաջողություններ գրանցած դպրոցականների հետ՝ նպատակ ունենալով յուրաքանչյուր հանդիպում դարձնել նաև ճանաչողական ու կրթական գործընթաց։ Նրա խոսքով՝ այս հանդիպումը դպրոցականների համար նաև աստղադիտարանը բացահայտելու հնարավորություն է՝ հաշվի առնելով նաև, որ որոշներն առաջին անգամ էին այս կառույցում։ Նախարարը շնորհակալություն է հայտնել աստղադիտարանի տնօրինությանը և աշխատակազմին համագործակցության համար:
ԿԳՄՍ նախարարի դիտարկմամբ՝ Բյուրականի աստղադիտարանում անցկացված հանդիպումը նաև հնարավորություն է դպրոցականների համար ծանոթանալու գիտական հետազոտություններով և աստղագիտությամբ զբաղվելու առանձնահատկություններին, որը կարող է նրանցից շատերի համար դառնալ ուղենշային՝ մասնագիտական կողմնորոշման կամ գիտությամբ զբաղվելու հետագա հետաքրքրությունները խրախուսելու առումով։
«Կարևոր է, որ յուրաքանչյուր սովորող հնարավորություն և անհրաժեշտ պայմաններ ունենա օլիմպիական շարժման մաս դառնալու համար»,- ընդգծել է Ժաննա Անդրեասյանը՝ ընդգծելով, որ հաղթողները նաև օրինակ են դառնում մյուս աշակերտների համար՝ ցույց տալով, որ հետևողական աշխատանքի և ջանքի շնորհիվ հնարավոր է հասնել հաջողությունների։
Նախարարն առանձնահատուկ կարևորել է նաև միջազգային օլիմպիադաներում հայ դպրոցականների մասնակցությունը՝ նշելով, որ Հայաստանը շարունակելու է ընդլայնել իր ներգրավվածությունը միջազգային հարթակներում։ Նա հիշեցրել է, որ 2022 թ. Հայաստանում անցկացվել է կենսաբանության միջազգային 33-րդ օլիմպիադան, և տեղեկացրել՝ 2028 թվականին նախատեսվում է հյուրընկալել նաև Ինֆորմատիկայի միջազգային օլիմպիադան։
Նրա խոսքով՝ վերջին տարիներին հատկապես տեխնոլոգիական ոլորտում օլիմպիադաները դարձել են առավել բազմազան․ ի հայտ են եկել նոր ուղղություններ, այդ թվում՝ արհեստական բանականության ոլորտում: Ժաննա Անդրեասյանի խոսքով՝ նախարարությունը քննարկում է լրացուցիչ հնարավորություններ՝ դպրոցականների մասնակցությունն ավելի լայն և հասանելի դարձնելու համար։
«Համակարգված աշխատանքի շնորհիվ պետք է որակական հստակ չափանիշներ սահմանվեն՝ խրախուսելով երեխաների մասնակցությունը բոլոր այն միջոցառումներին, որոնք իսկապես կարող են օգտակար ու հեղինակավոր լինել կրթական և մասնագիտական տեսանկյունից»,- ասել է նա՝ կարևորելով որակի հսկողությունը։
Նախարարը շնորհավորել է հաղթողներին՝ նրանց մաղթելով շարունակական հաջողություններ թե՛ դպրոցական, թե՛ հետագա ուսանողական տարիներին․ «Հուսով եմ՝ այս ավանդույթը կշարունակեք նաև ձեր հետագա կյանքում՝ դառնալով ձեր ընտրած ուղղության առաջամարտիկները։ Մենք հիմա դպրոցներում ասում ենք՝ «լավ սովորեք, որ լավ ապրեք», բայց սա շատ ավելի լայն իմաստ ունի, քան պարզապես բարեկեցությունը։ Խոսքը լավ մասնագետ դառնալու, ընտրած ոլորտում կայանալու, լավ կրթություն, գիտելիքներ և հմտություններ ունենալու մասին է: Վստահ եմ՝ ձեզնից յուրաքանչյուրի ներկայությունն այսօր արդեն վկայում է, որ դուք այդ ճանապարհին եք»։
Պարգևատրման արարողությունից հետո դպրոցականների համար կազմակերպվել է էքսկուրսիա Բյուրականի աստղադիտարանում և Վիկտոր Համբարձումյանի տուն-թանգարանում։
