Թայվանի խնդիրը ԱՄՆ-Չինաստան հարաբերությունների ամենակարևոր հարցն է, և դրան գրագետ մոտեցումը կերաշխավորի երկու երկրների միջև կայունությունը, հայտարարել է Չինաստանի նախագահ Սի Ծինփինը` Պեկինում ԱՄՆ նախագահ Դոնալդ Թրամփի հետ հանդիպման ժամանակ։ Այդ մասին հաղորդել է «Սինհուա» գործակալությունը։
«Եթե այս հարցը արդյունավետորեն չլուծվի, ԱՄՆ-ի և Չինաստանի միջև կառաջանան հակամարտություններ, որոնք կհանգեցնեն երկկողմ հարաբերությունների լուրջ վատթարացման և երկու երկրներին էլ վտանգավոր դրության մեջ կդնեն»,- զգուշացրել է Սին։
Նա ընդգծել է, որ Թայվանի անկախության տեսլականը և Թայվանի նեղուցում խաղաղությունն անհամատեղելի են։
Երկու առաջնորդի հանդիպումից առաջ Վաշինգտոնում Չինաստանի դեսպանատունը Չինաստանի համար սահմանել է չորս կարմիր գիծ Միացյալ Նահանգների հետ հարաբերություններում։ Դրանց թվում են Թայվանի հարցը, ժողովրդավարությունն ու մարդու իրավունքները, քաղաքական համակարգերը, ինչպես նաև Չինաստանի զարգացման իրավունքը։
«Ռոյթերս»-ը հաղորդել է, որ ԱՄՆ-ն, հավանաբար, կխնդրի Չինաստանին Իրանին մղել համաձայնության: Չինաստանն, իր հերթին, կարող է խնդրել Վաշինգտոնին փոխադարձաբար զիջումներ անել Թայվանի հարցում:
