Հանրային սննդի փակ և բաց տարածքներում ծխել այսուհետև չի թույլատրվի: Համապատասխան իրավական կարգավորումներն ուժի մեջ են մտնում մարտի 15-ից: Առողջապահության նախարարության մասնագետն ընդգծում է՝ խնդիրը ոչ թե ինչ-որ բան արգելելն է, այլ համալիր միջոցառումների արդյունքում մարդու առողջության պահպանումը:
Մարիամ Մնացականյան (ՀՀ ԱՆ հանրային առողջության բաժնի գլխավոր կազմակերպիչ) - Ծխախոտի ծխի մեջ ավելի քան 7000 քիմիական միացություն կա, շատ մեծ թիվ է: Էդ 7000 միացություններից 250-ը տոքսիկ ազդեցություն ունեն, 70-ից ավելին ունեն կանցերոգեն ազդեցություն:
Ծխելը բացասաբար է ազդում բոլոր օրգան-համակարգերի, բայց հիմնականում՝ սրտի ու անոթների վրա: Ծխողները 4 անգամ հաճախ են սրտի կաթված ստանում:
Հայաստանում մահվան պատճառների դասակարգման մեջ էլ սիրտանոթային հիվանդությունները առաջին տեղում են՝ կազմելով դեպքերի 47%-ը: Ընդհանրապես ծխելու հետևանքով երկրում գրանցվում է տարեկան 5500 մահ: Տնտեսությունը ևս մեծ վնասներ է կրում: ՄԱԿ-ի համահեղինակությամբ հրապարակված զեկույցի համաձայն՝ ծխախոտի օգտագործմամբ պայմանավորված հիվանդությունները Հայաստանի տնտեսության համար ամեն տարի առաջացնում են ավելի քան 273 միլիարդ դրամի ծախսային բեռ: Խոսքը բուժման համար պետության և անհատի ծախսերի մասին է: Նաև՝ աշխատունակ տարիքի կրճատման ու վաղ մահացության:
Ինչ վերաբերում է հանրային սննդի բացօթյա վայրերում ծխելու արգելքի հետ շատ ծխողների անհամաձայնությանը, Մարիամ Մնացականյանը հակադարձում է.
Մարիամ Մնացականյան - Մարդկանց կուտակում կարող է լինել, և երկրորդային ծխի ենթարկվածությունը ավելի բարձր է:
Ծխել չի թույլատրվում նաև երեխաների համար նախատեսված խաղահրապարակներում ու պուրակներում: Դիանա Սերոբյանը, որ 90-ականների սկզբից ընտանիքի հետ տեղափոխվել է Մոսկվա, 2021-ի ամռանը քրոջ հետ Երևանում սրճարան է հիմնադրել, որտեղ ծխել չի թույլատրվել առաջին իսկ օրից, չնայած օրենսդրական արգելք դեռ չկար:
Դիանա Սերոբյան (սրճարանի սեփականատեր) - Մեզ համար զարմանալի է, որ մինչև հիմա Հայաստանում դեռ կան սրճարաններ և ռեստորաններ, որտեղ կա համ ծխողների համար, համ չծխողների, որովհետև մենք երկար տարիներ ապրել ենք Մոսկվայում, ու Մոսկվայում արդեն շատ երկար տարիներ չկա ծխողների համար ընդհանրապես: Նույնը՝ Եվրոպայում և Ամերիկայում:
Շատ տնտեսվարողներ մտավախություն ունեն, թե ծխելու սահմանափակումը հարվածելու է բիզնեսին: Քույրերը գործի հաջողությունը հենց սկզբից դրանով չեն պայմանավորել: Համոզված են՝ առաջին հերթին առաջարկվող արտադրանքն է կարևոր, հետո նոր՝ ծխելու հնարավորությունը:
Փոքրիկ սրճարանի հաճախորդներից մեկը նշում է՝ ինքը ծխող չէ և խուսափում է ծխողների համար նախատեսված վայրեր այցելելուց: Ասում է՝ սահմանափակող օրենքը մշակույթի առումով մեկ քայլ առաջ է:
Արտյոմ Թադևոսյան (գործարար) - Դա, գիտեք ինչ, մարդկանց գիտակցություն էլ է փոխում, ինչ-որ մի ժամանակ հետո բոլորն արդեն կհասկանան, որ դա իսկապես բոլորի համար է արված, ոչ թե ծխողների կամ չծխողների կամ ինչ-որ և այլն:
Քաղաքացին հույս հայտնեց, որ օրենքի տվյալ դրույթն իսկապես կկիրառվի ու չի մնա թղթի վրա: Հանրային սննդի վայրերում ծխախոտային արտադրատեսակների օգտագործման դեպքում սահմանված է տուգանք՝ ֆիզիկական անձի համար՝ 50 հազար դրամ, տնտեսվարողի համար՝ 150-200 հազար: Երեք ամսվա ընթացքում դեպքը կրկնվելու պարագայում տնտեսվարողի համար նախատեսված տուգանքը կկրկնապատկվի:
