ՌԴ ԱԳՆ պաշտոնական ներկայացուցյիչ Մարիա Զախարովան մեկնաբանել է Վաշինգտոնում տեղի ունեցած Հայաստանի, Ադրբեջանի և ԱՄՆ-ի բանակցությունները և ստորագրված փաստաթղթերը:
«Տեղին է հիշեցնել, որ հայ-ադրբեջանական կարգավորման ներկա փուլը մեկնարկել է Ռուսաստանի անմիջական աջակցությամբ և կենտրոնական դերակատարմամբ՝ 2020 թվականի նոյեմբերի 9-ի բարձր մակարդակի եռակողմ հայտարարության ընդունմամբ՝ հրադադարի և Լեռնային Ղարաբաղի հակամարտության գոտում բոլոր մարտական գործողությունների դադարեցման մասին։ Տարածաշրջանում տեղակայվել է ռուսական խաղաղապահ զորախումբ, որն անփոխարինելի ներդրում է ունեցել իրավիճակի կայունացման գործում։ Հիշենք ծառայողական պարտքը կատարելիս զոհված մեր խաղաղապահներին։
Հետևողականորեն աջակցում ենք բոլոր ջանքերին, որոնք նպաստում են տարածաշրջանային անվտանգության համար առանցքային այս նպատակին հասնելուն։ Այդ կապակցությամբ Վաշինգտոնում Ամերիկյան կողմի միջնորդությամբ հարավկովկասյան հանրապետությունների ղեկավարների հանդիպումն արժանի է դրական գնահատականի։ Հուսով ենք, որ այս քայլը կօգնի խաղաղության օրակարգի առաջմղմանը»,- նշել է Զախարովան։
Միևնույն ժամանակ, նա հայտարարել է, որ երկրների հաշտեցումը պետք է տեղավորվի տարածաշրջանային համատեքստում և հիմնված լինի շահերի հավասարակշռության և կողմերի ու հարևան պետությունների առաջնահերթությունների անվերապահ հարգանքի վրա:
«Արդիական են մնում Ռուսաստանի մասնակցությամբ եռակողմ պայմանավորվածությունները, որոնցից կողմերից ոչ մեկը դուրս չի եկել։ Կարևոր է հաշվի առնել նաև ԵԱՏՄ միասնական մաքսային տարածքին Հայաստանի անդամակցության գործոնը, մասնավորապես՝ Հանրապետության տարածքով տարանցիկ բեռնափոխադրումների կազմակերպման հարցում: Չի կարելի անտեսել նաև այն փաստը, որ Հայաստանի և Իրանի սահմանը պահպանվում է 1992 թ. սեպտեմբերի 30-ի միջպետական պայմանագրի համաձայն՝ տեղակայված ռուս սահմանապահների կողմից»,- նշել է դիվանագետը:
Նրա խոսքով՝ Հարավային Կովկասի խնդիրների լուծման լավագույն տարբերակը հենց տարածաշրջանի երկրների կողմից իրենց անմիջական հարևանների՝ Ռուսաստանի, Իրանի, Թուրքիայի աջակցությամբ մշակված լուծումների որոնումն ու հետագա իրականացումն է: Զախարովան նաև նշել է, որ Հայաստանի և Ադրբեջանի միջև խաղաղության վերջնական հաստատման համար կարևորագույն նշանակություն կունենա երկու երկրների միջև խաղաղության և դիվանագիտական հարաբերությունների հաստատման համաձայնագրի ստորագրումը և դրա ուժի մեջ մտնելը:
«Արտատարածաշրջանային խաղացողների միացումը պետք է աշխատի խաղաղության օրակարգի ամրապնդման համար և լրացուցիչ դժվարություններ ու բաժանարար գծեր չստեղծի»,- եզրափակել է դիվանագետը:
