Հինգշաբթի Միջազգային օլիմպիական կոմիտեն (ՄՕԿ) խորհուրդ է տվել վերացնել բելառուս մարզիկների նկատմամբ բոլոր սահմանափակումները՝ բացելով նրանց վերադարձը միջազգային մրցումներին, ներառյալ Լոս Անջելեսում կայանալիք 2028 թվականի օլիմպիական խաղերի որակավորման մրցաշարերը, որոնք կմեկնարկեն այս տարի: Սահմանափակումները հաստատվել էին 2022 թվականի փետրվարին Ուկրաինայում պատերազմի մեկնարկից հետո։
Որոշումը կապված է սպորտը որպես ընդհանուր արժեքների վրա հիմնված գլոբալ հարթակ պահպանելու ձգտման հետ, որը պետք է միավորի մարդկանց և հույս ներշնչի, ասվում է ՄՕԿ-ի հայտարարությունում:
Ըստ կազմակերպության՝ մարզիկների մասնակցությունը միջազգային մրցումներին չպետք է սահմանափակվի իրենց կառավարությունների գործողություններով, այդ թվում՝ պատերազմներին կամ հակամարտություններին մասնակցությամբ։
Միաժամանակ, մարզական պաշտոնյաներն ընդգծում են, որ սա միայն առաջարկություն է, և որոշակի մարզաձևերում ու որոշակի մրցումներին մարզիկների մասնակցության թույլտվությունը պետք է տան դրանց կազմակերպիչներն ու միջազգային ֆեդերացիաները:
Հինգշաբթի օրվա որոշումը, սակայն, չի վերաբերում Ռուսաստանին, որի դեմ պատժամիջոցները մնում են ուժի մեջ։ ՄՕԿ-ի իրավական հանձնաժողովը շարունակում է քննարկել Ռուսաստանի օլիմպիական կոմիտեի հեռացման հարցը։
