ԿԳՄՍ նախարարությունից տեղեկացնում են ՝ նախարարի տեղակալ Ալֆրեդ Քոչարյանը մասնակցել է «Հայաստանի զբոսաշրջությունը. որտեղ ենք և դեռ ինչ պետք է անել» թեմայով պանելային քննարկմանը, որը կազմակերպվել է համաեվրոպական Executive MBA ծրագրի շրջանակում։
Հանդիպման նպատակն էր բաց երկխոսության ձևաչափով անդրադառնալ Հայաստանի զբոսաշրջության ներկային, զարգացման ռազմավարությանը, ենթակառուցվածքներին, ներդրումներին և կայուն զարգացման հեռանկարներին։
ԿԳՄՍ նախարարի տեղակալը շնորհակալություն է հայտնել Հայաստանի զբոսաշրջության զարգացման տեսլականը համատեղ ձևակերպելու հնարավորության համար և խնդրին անդրադարձել ՀՀ մշակույթի զարգացման քաղաքականության տեսանկյունից:
«Վերջին տարիներին պետությունը կոնկրետ քայլեր է ձեռնարկել բաց և ներառական մշակութային միջավայր ստեղծելու ուղղությամբ։ Պետական քաղաքականության հիմնական մոտեցումն այն է, որ մշակույթը պետք է ապակենտրոնացվի, և մշակութային կյանքին հաղորդակցման հավասար պայմաններ ապահովվեն ոչ միայն հանրապետության մեծ քաղաքներում, այլև բոլոր համայնքներում: Այդ համատեքստում հատկապես մեծ ուշադրություն ենք դարձնում համայնքային մշակութային նախագծերին, որոնք խրախուսում են բնակչության ներգրավվածությունը տեղական մշակութային կյանքի ձևավորման գործում»,- ասել է Ալֆրեդ Քոչարյանը՝ թվարկելով մարզերում կազմակերպվող փառատոները, համերգային ծրագրերը և այլ միջոցառումները:
Ներկայացնելով կատարված աշխատանքները՝ նա նշել է, որ պետությունը վերջին տարիներին իրականացրել է համակարգային բարեփոխումներ․ ընդունվել են «Թանգարանների մասին» օրենքը և դրանից բխող ավելի քան երկու տասնյակ ենթաօրենսդրական ակտեր, որոնք ապահովում են ոլորտի լիարժեք կարգավորումը և կառավարման արդյունավետության բարձրացումը։
Ալֆրեդ Քոչարյանը կարևոր ձեռքբերում է համարել նաև մշակույթի կառավարման արդիականացումը՝ շեշտելով, որ ներդրվել է թանգարանների միասնական էլեկտրոնային տոմսային համակարգը, որին արդեն միացած են տասնյակ թանգարաններ և դրանց մասնաճյուղերը։ «Թանգարանների միասնական տոմսային համակարգը ոչ միայն բարելավում է այցելուների սպասարկումը, այլև ստեղծում է միասնական տվյալների բազա զբոսաշրջային հոսքերի վերլուծության և կառավարման համար»,- ասել է նա։
Որպես պետական քաղաքականության կարևոր ուղղություն՝ նա նշել է մշակութային քաղաքականության միջազգայնացումը․ վերջին տարիներին նախարարության ենթակայության թանգարաններն իրականացրել են տասնյակ միջազգային ցուցադրություններ, որոնցից առանձնահատուկ նշանակություն ունի Հայաստանի պատմության թանգարանում իրականացված «Մայր Աստվածություն. Անահիտից Մարիամ» միջազգային ցուցահանդեսը, որը կազմակերպվել է Բրիտանական թանգարանի հետ համատեղ: Ներկայում դեռ ընթանում է Հայաստանի պատմության թանգարանում կազմակերպված «Սրբազան երկխոսություն. Լուվրից Հայաստանի պատմության թանգարան» միջազգային ցուցադրությունը, որի շրջանակում առաջին անգամ Հայաստանում ներկայացված են Լուվրի թանգարանի հավաքածուներից տասնվեց ուշագրավ ցուցանմուշներ՝ համադրված Հայաստանի պատմության թանգարանի երկու տասնյակից ավելի արժեքավոր թանգարանային առարկաների հետ։
Նախարարի տեղակալ Ալֆրեդ Քոչարյանի խոսքով՝ Հայաստանի ազգային պատկերասրահն իրականացրել է Հայկական իմպրեսիոնիզմի գույներն ու լույսերը խորագրով ցուցահանդեսը՝ Ֆրանսիայի Բարբիզոնի «L'ESQUISSE» մշակութային կենտրոնում, իսկ Եղիշե Չարենցի անվան գրականության և արվեստի թանգարանը Հայաստանում ԱՄՆ դեսպանատան հետ համագործակցությամբ իրականացրել է «Սարոյանական գույներ․ բառերից անդին» միջազգային ցուցահանդեսը: ԿԳՄՍ նախարարի տեղակալի դիտարկմամբ՝ նշյալ միջոցառումների շրջանակում հազարավոր զբոսաշրջիկներ հնարավորություն են ունեցել ծանոթանալու հայկական մշակույթին:
Մշակութային քաղաքականության մյուս կարևոր ուղղությունը, ըստ նախարարի տեղակալի, միջազգային կառույցների հետ համագործակցության զարգացումն է։ Այդպիսով, հայկական մշակութային ժառանգությունը ներառված է ՅՈՒՆԵՍԿՕ-ի կոնվենցիաներով ստեղծված ցանկերում, և համալրման գործընթացը շարունակաբար իրականացվում է: Ներկայում Համաշխարհային ժառանգության ցանկում Հայաստանը ներկայացված է հետևյալ մշակութային ժառանգության օբյեկտներով`
1. «Հաղպատի և Սանահինի վանքեր» (1996թ.)
2. «Էջմիածնի Մայր տաճար և եկեղեցիներ (Սբ. Հռիփսիմե, Սբ. Գայանե, Սբ. Շողակաթ) և Զվարթնոցի տաճարի հնավայր» (2000թ.)
3. «Գեղարդի վանք և Ազատ գետի վերին հովիտ» (2000թ.)
Համաշխարհային ժառանգության նախնական ցանկում են գրանցված հետևյալ հայտերը`
1. «Երերույքի բազիլիկը և հնավայրը» (1995թ.)
2. «Դվին քաղաքի հնավայրը/հնագիտական հուշարձանը» (1995թ.)
3.«Տաթևի և Տաթևի Անապատ վանքերը և Որոտանի դաշտավայրի հարակից տարածքները» (1995թ.)
4. «Նորավանքը և Ամաղու դաշտավայրի վերին հատվածը» (1995թ.)
5. «Տիրինկատար հնավայրի վիշապաքարերը և մշակութային լանդշաֆտը» (2024թ.)
«Երևանի ուրարտական ժառանգությունը» (2025թ.)
6. «Գառնի հնագիտական համալիրը և Քարերի սիմֆոնիան» (2025թ.)
Քննարկմանը որպես բանախոսներ հանդես են եկել ՀՀ զբոսաշրջության կոմիտեի նախագահ Լուսինե Գևորգյանը, ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը, Executive MBA ծրագրի տնօրեն, Յորքի համալսարանի եվրոպական կամպուսի Բիզնես դպրոցի դեկան, պրոֆեսոր Լեսլի Սզամոզին, պաշտոնատար այլ անձինք:
