Պետական պատվերով հիվանդանոցային և արտահիվանդանոցային դժվարամատչելի բժշկական օգնության և սպասարկման ծավալը տարեցտարի աճում է: Առողջապահության նախարարության տվյալով` եթե, օրինակ, 2017-ին գրանցվել է պետպատվերով ծառայություններից օգտվելու գրեթե 350 հազար դեպք, 2022-ին այդ թիվը հասել է մոտ 787 հազարի:
Պետական առողջապահական գործակալության պետը այս վիճակագրությունը մի քանի պատճառով է բացատրում:
Ահարոն Բարսեղյան (ՀՀ ԱՆ պետական առողջապահական գործակալության պետ) - Ծավալները տարեցտարի աճում են, և դա` հիմնականում պետության կողմից հատկացված ֆինանսական միջոցների աճին զուգահեռ:
Ծառայությունները ավելի քան կրկնակի հասանելի են դարձել ֆինանսավորումն էլ գրեթե նույնքան մեծացնելու արդյունքում. 2017 թվականին պետական բյուջեից առողջապահությանը հատկացվել է մոտ 83 մլրդ, իսկ արդեն 2022-ին` մոտ 144 մլրդ դրամ:
Արդյունքում ընդլայնվել է թե՛ պետպատվերից օգտվելու իրավունք ունեցող շահառուների, թե՛ պետության տրամադրած անվճար ծառայությունների թիվը:
Ահարոն Բարսեղյան - Սոցիալապես անապահովություն և հատուկ միավոր ունեցող անձանց շեմն է իջեցվել մինչև 28 միավոր, 7 տարեկան երեխաների շեմն է բարձրացվել մինչև 18 տարեկան, այսինքն՝ 0-18 տարեկան երեխաները իրավունք ունեն պետության կողմից երաշխավորված անվճար բժշկական օգնության ու սպասարկման և այլն:
Պետպատվերով մատուցվող ծառայությունների անվանացանկը նույնպես պարբերաբար ընդլայնվում է: Վերջինը աորտայի շերտազատման վիրահատությունն է, որն անվճար իրականացվում է այս տարվանից: Հատկացվող ֆինանսավորմանը և բարձր տեխնոլոգիական ծառայությունների ընդգրկմանը զուգահեռ` քաղաքացիների կողմից աճում է նաև բժշկական ծառայությունների օգտագործման հաճախականությունը: Քաղաքացիները ավելի շատ են դիմում պետպատվերի շրջանակում բուժօգնություն ստանալու համար. որակն է բարձրացել:
Ուշագրավ պատկեր է նաև մարզերում: Եթե ավանդաբար բնակիչները ստիպված էին լինում այս կամ այն բուժօգնության համար հասնել Երևան, վերջին տարիներին իրավիճակի փոփոխության որոշակի միտում կա:
Արմինե Աղաջանյան (ՀՀ ԱՆ բժշկական օգնության քաղաքականության վարչության առողջապահության գլխավոր կազմակերպիչ) - Մարզային բժշկական կազմակերպությունները նորագույն սարքավորումներով վերազինելը, հմուտ մասնագետներով համալրելը, ինչպես նաև մատուցվող բժշկական օգնության և սպասարկման ծառայությունների ընդլայնումը նախարարության կարևորագույն ռազմավարություններից է:
Նշված ծառայություններից են, օրինակ, սրտի ստենտավորման ծրագիրը, որը իրագործվում է նաև Գյումրիում, Վանաձորում ու Գորիսում: Գլխուղեղի իշեմիկ կաթվածի բուժման ծրագիրը ևս Երևանից բացի արդեն նաև Գյումրիում կա: Հեմոդիալիզի ծառայությունը հասանելի է դարձել նաև Հրազդանում, Արթիկում, Իջևանում ու Արտաշատում:
Արմինե Աղաջանյան - 2021-2022 թթ. պարբերաբար նախարարությունը մարզային բժշկական հաստատությունները վերազինում է նորագույն սարքավորումներով: 18-ից ավելի տեսակ սարքավորումներ են մատուցվել մարզային բուժհաստատություններին. դրանք թե ռենտգեն սարքավորումներ են, թե շարժական ուլտրաձայնային հետազոտության սարքավորումներ: Օրինակ՝ օրեր առաջ Սպիտակի ԲԿ-ն հագեցվել է նոր՝ 20-22 թվականի արտադրության համակարգչային շերտագրման սարքավորմամբ, որը շատ մեծ առավելություններ ունի:
Վանաձորի բժշկական կենտրոնում ստացիոնար բուժօգնության համար 2017 թվականին դիմել է մոտ 9900 պացիենտ, 2018-ին՝ 9600: 2022-ին այդ թիվն անցել է 13.200-ից:
Սպիտակի բժշկական կենտրոնը 2017-ին մոտ 2120 պացիենտ է ունեցել, 2018-ին՝ 2490, 22-ին՝ մոտ 3290:
Հեղինակ` Աննա Զախարյան
