Հանրային մուլտիպլեքսում չորս սլոթի համար պայքարում է վեց հեռուստաընկերություն. Հեռուստատեսության և ռադիոյի հանձնաժողովը վերջին մրցույթից 1.5 տարի հետո նոր մրցույթ է հայտարարել, արտահերթ նիստում քննարկել լիցենզավորման հանրապետական սփռման մրցույթի մասնակիցների հայտերը: Նոր մրցույթ անցկացնելու պատճառը դատարանի որոշումն է:
«Հայկական երկրորդ հեռուստաալիքը» 2021-ի հունվարին, չհավաքելով բավարար միավորներ, հրաժարվել էր նաև մասնակցել մայրաքաղաքային սլոթի հատկացմանը և դիմել էր Վարչական դատարան: Ընկերությունը մեկ հայցով վիճարկում էր մրցույթի արդյունքները, որը բավարարվել է, մյուսով՝ պահանջում իրեն հաղթող ճանաչել:
Տիգրան Հակոբյան (ՀՌՀ նախագահ) - Մեկ սլոթը դատարանը որոշեց ազատ թողնել, որպեսզի եթե դատարանը ապագայում որոշի, որ հաղթող կարող է ճանաչվել «Հայկական երկրորդ հեռուստաալիքը», ապա ազատ սլոթ ունենանք, որպեսզի տրամադրենք իրենց և մենք պիտի սպասենք դատավարության ավարտին, որպեսզի այդ մեկ ազատ սլոթը նորից դնենք մրցույթի:
Թեև մեկ սլոթը ազատ է մնացել, լիցենզիայի համար հայտարարված չորս սլոթի մրցույթին ևս «Հայկական երկրորդ հեռուստաալիքը» մասնակցում է: 7 տարվա հանրապետական սփռման հայտ են ներկայացրել նաև «Արմենիա», «Ա-թիվի», «Շանթ», «Կենտրոն» և «Երկիր մեդիա» հեռուստաընկերությունները:
Տիգրան Հակոբյան - Կարելի է շատ գրագետ, շատ գեղեցիկ տեքստեր գրել և լիցենզիա ստանալուց հետո երկրորդ օրվանից խախտել այդ բոլոր խոստումները կամ տեսլականը, և մենք երկու ամիս ունենք բոլորի ծրագրերն ուսումնասիրելու համար, և մեր աշխատակազմը ուսումնասիրում է՝ շատ մանրակրկիտ համադրելով տասնյակ գործոններ: Բոլորը հասկանում են, որ ամենաքիչ հնարավորությունն է լիցենզիա ստանալու այն հեռուստաընկերությունը ենթադրաբար, որը չի կատարում իր պարտավորությունները և որը խախտում է բովանդակության սահմանափակումները, որոնք ընդունված են աշխարհում. դա ատելության խոսքն է, դա ապատեղեկատվություն է, դա միակողմանի տեղեկատվությունն է, դա մարդկանց արժանապատվության ոտնահարումն է:
Ինչպես նախկինում, այնպես էլ հիմա, հանձնաժողովը լիցենզիա տրամադրելիս հաշվի է առնելու ընկերությունների ֆինանսական կայունությունը, տեխնիկական հագեցվածությունը, հայերենի գերակայությունը, ազգային արժեքների պահպանումը և այլ գործոններ: Հանձնաժողովի նախագահն անդրադառնալով Վարչական դատարանի որոշմանը, արձանագրեց՝ եթե հետևեին այդ որոշմանը, ապա օգոստոսին պետք է Հայաստանի ամբողջ տարածքում հեռարձակվող 5 հեռուստաընկերությունների հեռարձակումն անջատեին:
Տիգրան Հակոբյան - Կստացվեր, որ Ադրբեջանի ագրեսիայի ժամանակ Հայաստանում գրեթե չէր մնում հեռուստաընկերություն, որն իր հաղորդումները սփռում էր ամբողջ Հայաստանում, և մնում էին միայն Հանրային հեռարձակողը և մեկ ռուսական պետական ալիք, որին այդ պայմաններում շատ կրիտիկական չեմ կարծում, որ մեզ համար նպաստավոր կամ օբյեկտիվ տեղեկատվություն էին տալիս:
Հակոբյանը հիշեցնում է՝ հանրային մուլտիպլեքսը ռազմավարական օբյեկտ է, և հեռուստաընկերությունների անջատման մասին որոշումները պետք է հիմնավորված լինեն, իսկ դատարանի որոշման մեջ իրենք չեն տեսել այդ հիմնավորումները:
Տիգրան Հակոբյան - Մասնագիտական եզրակացությունները մեզ մոտ տևում են մոտ երկու ամիս, և այդ գործերի մեջ ներգրավված են մոտ 25-30 հոգի: Մենք նաև տասնյակ տարբեր նամակներ ենք հղում՝ ճշտելու համար՝ որքանով է ճշգրիտ այդ ընկերությունների ներկայացրած ծրագիրը, և ընդամենը 1 դատավոր, որը շատ խավար է պատկերացնում մեդիայի գործունեությունը, որը դատական նիստերի ընթացքում որևէ հանձնաժողովի անդամ չի կանչում որպես վկա, որպեսզի հասկանա՝ ինչ է դրված այդ գնահատականների հիմքում:
Տիգրան Հակոբյանի խոսքով՝ իրենք սպասում են մրցույթի ավարտին, որ դիմեն պատկան մարմիններին, նաև Բարձրագույն դատական խորհուրդ, որպեսզի հստակ քննարկեն նման որոշումների դրդապատճառները:
