Խորհրդարանը մայիսի 7-ի նիստում երկրորդ ընթերցմամբ քննարկել է մի շարք նախագծեր:
««Քաղաքացիական ծառայության մասին» օրենքում փոփոխություններ կատարելու մասին» և կից ներկայացված օրինագծերի փաթեթը ներկայացրել է ՀՀ աշխատանքի և սոցիալական հարցերի նախարարի տեղակալ Լուսինե Քոչարյանը:
Նախաձեռնությամբ առաջարկվում է վերացնել պետական ծառայության տարբեր ոլորտներում գործող պաշտոն զբաղեցնելու առավելագույն՝ 65 տարեկան տարիքային սահմանափակումը:
Հիմնական կարգավորումները՝ այստեղ:
Լուսինե Քոչարյանի տեղեկացմամբ առաջին ընթերցմամբ ընդունվելուց հետո փաթեթում կատարվել են տեխնիկական փոփոխություններ:
ԱԺ աշխատանքի և սոցիալական հարցերի մշտական հանձնաժողովի անդամ Գայանե Եղիազարյանը ներկայացրել է փաթեթի վերաբերյալ հանձնաժողովի դրական եզրակացությունը:
Հաջորդիվ քննարկվել է ««Բարձր տեխնոլոգիաների ոլորտի պետական աջակցության մասին» օրենքում փոփոխություններ և լրացումներ կատարելու մասին» ու ««Տեղեկատվական տեխնոլոգիաների ոլորտի պետական աջակցության մասին» օրենքն ուժը կորցրած ճանաչելու մասին» օրենքների նախագծերի փաթեթը:
Նախաձեռնության հեղինակի՝ ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանի խոսքով առաջինից երկրորդ ընթերցում կատարվել են խմբագրական բնույթի փոփոխություններ:
Օրենսդրական փաթեթի առաջին ընթերցմամբ քննարկումը ՝ այստեղ:
Գլխադասային՝ Տնտեսական հարցերի մշտական հանձնաժողովի դրական եզրակացությունը ներկայացրել է հանձնաժողովի անդամ Նարեկ Ղահրամանյանը:
Կառավարության դիրքորոշումը նախաձեռնության վերաբերյալ եւս եղել է դրական:
ՀՀ ներքին գործերի նախարարի տեղակալ Արմեն Մկրտչյանը ներկայացրել է ««Ոստիկանության մասին» օրենքում փոփոխություն կատարելու մասին» օրենքի նախագիծը:
Առաջին ընթերցմամբ քննարկումը՝ այստեղ:
Փոխնախարարի խոսքով Կառավարությունը ներկայացրել է Ոստիկանության գվարդիայի ծառայողների սոցիալական ապահովության հարցերը կարգավորող այլ նորմատիվ իրավական ակտերի կիրառմանն առնչվող առաջարկ:
ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը նշել է, որ նախագծին հանձնաժողովը տվել է դրական եզրակացություն:
Երկրորդ ընթերցմամբ է նաև քննարկվել «Արտաքին հետախուզական գործունեության և արտաքին հետախուզության ծառայության մասին» և կից օրենքներում փոփոխություններ և լրացումներ նախատեսող օրենսդրական փաթեթը:
Ըստ ՀՀ արտաքին հետախուզության ծառայության պետ Քրիստիննե Գրիգորյանի՝ առաջինից երկրորդ ընթերցում ընկած ժամանակահատվածում առաջարկներ չեն ստացվել:
Առաջին ընթերցմամբ քննարկումը՝ այստեղ:
Գլխադասային՝ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը բարձրաձայնել է փաթեթի վերաբերյալ հանձնաժողովի դրական եզրակացությունը:
Քննարկված օրենսդրական նախաձեռնություններն ընդունվել են երկրորդ ընթերցմամբ:
