Մեկնարկել են Հովհաննես Շարամբեյանի 100-ամյակի հոբելյանական միջոցառումները

Այսօր լրանում է հայ մշակույթի և ժողովրդական արվեստի նշանավոր գործիչ, ՀԽՍՀ վաստակավոր նկարիչ, Դիլիջանի պատվավոր քաղաքացի, Հովհաննես Շարամբեյանի անվան ժողովրդական արվեստների թանգարանի հիմնադիր Հովհաննես Շարամբեյանի ծննդյան 100-ամյակը։

ԿԳՄՍՆ-ից հայտնում են. որ հոբելյանի կապակցությամբ ԿԳՄՍ նախարար Ժաննա Անդրեասյանը Դիլիջանի գեղարվեստի մանկական դպրոցում ծաղիկներ է խոնարհել Շարամբեյանի կիսանդրու առջև: Բրոնզե կիսանդրին և հուշատախտակը բացվել են օգոստոսի 16-ին հոբելյանական միջոցառումների շրջանակում՝ Շարամբեյանի ընտանիքի նախաձեռնությամբ:

Արարողությանը մասնակցել են նաև ԿԳՄՍ նախարարի տեղակալ Ալֆրեդ Քոչարյանը, Դիլիջանի համայնքապետ Դավիթ Սարգսյանը, Հովհաննես Շարամբեյանի անվան ժողովրդական արվեստների թանգարանի տնօրեն Լուսինե Թորոյանը, Հովհաննես Շարամբեյանի ընտանիքի անդամներ, այդ թվում՝ թոռը՝ Նարեկ Վան Աշուղաթոյանը:

Հոբելյանական միջոցառումների մեկնարկի շրջանակում Հովհաննես Շարամբեյանի անվան ժողովրդական արվեստների թանգարանի մասնաճյուղում՝ Հայկական գործվածքի թանգարանում, տեղի է ունեցել «Երկխոսություն տեքստիլի շուրջ» միջազգային ցուցահանդեսի բացումը: Այն կայացել է ԿԳՄՍ նախարարության, ՅՈՒՆԵՍԿՕ-ի հովանու ներքո գործող Հարավարևելյան Եվրոպայի ոչ նյութական մշակութային ժառանգության պահպանության տարածաշրջանային կենտրոնի և «Գրին ռոք» հիմնադրամի ֆինանսական աջակցությամբ, ինչպես նաև Հովհաննես Շարամբեյանի անվան ժողովրդական արվեստների թանգարանի և «Մշակույթի զարգացման» հիմնադրամի համագործակցությամբ։

Նշանավորելով մեծանուն գործչի ժառանգությունը և կարևորելով հոբելյանական տարին՝ ԿԳՄՍ նախարար Ժաննա Անդրեասյանը նշել է. «Հովհաննես Շարամբեյանն իր թողած ժառանգությամբ, ուղերձներով և արժեքներով այսօր միավորել է բոլորիս այստեղ: Ուրախալի է տեսնել, թե ինչպես է ամեն անգամ նրա շուրջ համախմբվելը նոր օրակարգ բացում մեզ համար՝ այս անգամ նաև միջազգային համագործակցության հնարավորություններ ընձեռելով և Դիլիջանը դարձնելով միջազգային երկխոսության կենտրոն»:

Նախարարի խոսքով՝ Դիլիջանը դառնում է բազմաթիվ քաղաքացիների ու զբոսաշրջիկների սիրելի վայրերից մեկը: Նա վստահություն է հայտնել, որ այդ փաստն առաջին հերթին կուրախացներ հենց Շարամբեյանին, երբ նա տեսներ՝ Դիլիջանը մշակութային քաղաք է, որտեղ կան մշակութային աշխույժ կյանք և ակտիվ միջավայր:

Նա անդրադարձել է վերջերս պետության ջանքերով վերաբացված թանգարանի գործունեությանը: Նախարարը կարևորել է՝ թանգարանը, որը որպես հուշարձան շենք նոր շունչ է ստացել, այսօր արդեն հյուրընկալում է միջազգային ցուցադրություն՝ գրավելով նոր հորիզոններ: «Ուրախ եմ, որ այսպիսով նաև Հայկական գործվածքի թանգարանը դառնում է տեքստիլի շուրջ երկխոսության միջազգային հարթակ՝ ցույց տալով, որ ստեղծարար մտքի ուժն է նաև մեզ առաջ տանում»,- ասել է Ժաննա Անդրեասյանը՝ առանձնակի շնորհակալություն հայտնելով Շարամբեյանի ընտանիքին, թանգարանի անձնակազմին և համագործակցող բոլոր կողմերին:

Ամփոփելով խոսքը՝ նախարարը հավաստել է՝ հոբելյանական տարին թույլ կտա վայելել Շարամբեյանին նվիրված յուրաքանչյուր միջոցառում՝ ոչ մշակութային ժառանգության միջոցով նյութականացնելով նրա ուղերձները:

Ցուցահանդեսը մեկ հարթակում է համախմբել տեքստիլ մշակույթի վարպետների Հայաստանից, Բուլղարիայից, Մոլդովայից, Վրաստանից, Ռումինիայից, Հունաստանից, Բոսնիա և Հերցեգովինայից՝ ներկայացնելով տարբեր երկրների տեքստիլ ավանդույթները, դրանց պահպանման և փոխանցման փորձն ու ժամանակակից ստեղծագործական մեկնաբանությունները։

Հովհաննես Շարամբեյանի անվան ժողովրդական արվեստների թանգարանի տնօրեն Լուսինե Թորոյանը շնորհակալություն է հայտնել բոլոր կողմերին համագործակցության և Շարամբեյանին ու նրա գործն արժևորելու գաղափարի շուրջ համախմբվելու համար. «Թանգարանի որևէ միջոցառում կազմակերպելիս մեզ համար կարևոր է հասկանալ՝ որն է Հովհաննես Շարամբեյան արվեստագետի ամենաառանցքային գործը, որը, որպես թանգարան, պարտավոր ենք շարունակել. պատասխանը միանշանակ է՝ նրա գաղափարախոսությունը, որի շուրջ նա կառուցել է իր գործունեությունը»:

Ողջունելով ներկաներին և կարևորելով օրվա խորհուրդը՝ Հովհաննես Շարամբեյանի թոռը՝ Նարեկ Վան Աշուղաթոյանը, նշել է. «Ժամանակին, երբ Հովհաննես Շարամբեյանն իր ժառանգությունն ու տունը հանձնեց պետությանը, արդեն հասկացել էր, որ պետությունն է իր գործունեության շարունակականության հենքը: Այսօր այստեղ մեր ներկայությունը փաստում է, որ նա ճիշտ էր, և այդ որոշումն ուներ ռազմավարական նշանակություն»:

Նշենք, որ «Երկխոսություն տեքստիլի շուրջ» միջազգային ցուցահանդեսի իրականացումն ուղղված է ոչ նյութական մշակութային ժառանգության արժևորմանն ու հանրահռչակմանը, մասնագիտական նոր կապերի ձևավորմանը, փորձի փոխանակմանը և միջազգային համագործակցության նոր հնարավորությունների ստեղծմանը։ Միաժամանակ, նախաձեռնությունը նպատակ ունի նպաստելու Դիլիջան համայնքի մշակութային կյանքի աշխուժացմանը և Հայկական գործվածքի թանգարանի գործունեության հանրահռչակմանը՝ այն զարգացնելով որպես մշակութային երկխոսության, կրթության և ստեղծարար նախաձեռնությունների հարթակ։

Ցուցահանդեսն ուղեցվել է հայ և օտարերկրյա վարպետների ցուցահանդես-վաճառքով, երաժշտական ծրագրով. հանդես է եկել «ԿԱՅԹ» բենդը։

Ցուցահանդեսը կշարունակվի օգոստոսի 18-ին՝ ժամը 15:00-18:00-ը, Հայաստանից և արտերկրից ժամանած վարպետների մասնակցությամբ վարպետաց դասերով։ Այցելուները հնարավորություն կունենան անմիջականորեն ծանոթանալու տարբեր տեքստիլ ավանդույթներին և տեխնիկաներին, հաղորդակցվելու վարպետների հետ, բացահայտելու տարբեր մշակույթների ընդհանրություններն ու առանձնահատկությունները:

Օրվա շրջանակում տեղի է ունեցել «Մեծանուն հայեր. Հովհաննես Շարամբեյանի ծննդյան 100-ամյակ» փոստային բացիկի շնորհանդեսը, ստորագրվել է համագործակցության հուշագիր Հովհաննես Շարամբեյանի անվան ժողովրդական արվեստների թանգարանի և «Գրին ռոք» հիմնադրամի միջև՝ Հովհաննես Շարամբեյանի ծննդյան 100-ամյակին նվիրված 2026-2027 թվականների ծրագրերի և նախաձեռնությունների համատեղ իրականացման նպատակով։ Հուշագիրը հիմք կդառնա հոբելյանական ծրագրի շրջանակում նախատեսվող մի շարք նախաձեռնությունների իրականացման և հետագա համագործակցության զարգացման համար։

Հոբելյանական տարեդարձի կապակցությամբ 2026-2027 թվականներին նախատեսվում է իրականացնել մշակութային, կրթական, գիտական և հանրահռչակման մի շարք միջոցառումներ ու նախաձեռնություններ, որոնք ուղղված կլինեն Հովհաննես Շարամբեյանի կյանքի և գործունեության, նրա թողած հարուստ մշակութային ժառանգության, ինչպես նաև հայկական ժողովրդական արվեստի պահպանության, զարգացման և հանրահռչակման գործում ունեցած բացառիկ ներդրման արժևորմանը։

Դիտումների քանակ34