Հայաստանյան քաղաքական նախորդ շաբաթվա սիիզբը, թերևս, ավելի անորոշ էր, քան մարտյան եղանակը: Քաղաքական ուժերը դիրքավորված սպասում էին մեն-միակ իրադարձության՝ ինչպիսի՞ զարգացում կստանա Հայաստանի Զինված ուժերի Գլխավոր շտաբի պետի շուրջ ստեղծված իրավիճակը: Իշխանության թերևս, միակ ակնկալիքն էր, որ զինվորականություն, այնուամենայնիվ, կարմիր գծերը չի հատի, և գոնե այս ուղղությամբ ջրերը կզուլալվեն: Զուլալվեցին այնքանով, որ պարզ դարձավ՝ Օնիկ Գասպարյանը մարտի 10-ից այլևս Զինված ուժերի Գլխավոր շտաբի պետը չէ՛: Ճիշտ է՝ ինտրիգը չմեռավ: Գեներալ-գնդապետը շարունակում է պահանջել կառավարության հրաժարականն, իսկ իր պաշտոնավարման խնդրով դիմելու է վարչական դատարան:
Մինչ Բաղրամյան պողոտան փակ պահող ընդդիմությունը փորձում էր հասկանալ ու մեկնաբանել Օնիկ Գասպարյանի հայտարարությունը և ավելի ու ավելի էր հակվում տեսակետին, թե գեներալն այս կերպ ջուր լցրեց իշխանության ջրաղացին, նախագահ Սարգսյանն առարկություններով վերադարձրեց Արտակ Դավթյանին Գլխավոր շտաբի պետ նշանակելու վարչապետի միջնորդությունը՝ միաժամանակ հայտարարելով, թե պատրաստվում է հանդիպել իշխանության, խորհրադարանական ընդդիմության և Հայրենիքի փրկության շարժման ներկայացուցիչների հետ: Ըստ պաշտոնական հաղորդագրության՝ նպատակ է դրվել քաղաքական ճգնաժամի պայմաններում երկիրը զերծ պահել ցնցումներից և խուսափել պետության ու պետականության համար անդառնալի կորուստներից:
Արմեն Սարգսյան- ՀՀ նախագահ- «Առաջնորդվելով համապետական ու համազգային շահերով՝ առկա իրավիճակը քննարկելու և ճգնաժամը հաղթահարելուն ուղղված փոխընդունելի լուծումներ գտնելու նպատակով Հանրապետության վարչապետին, խորհրդարանական խմբակցությունների ղեկավարներին և Հայրենիքի փրկության շարժման ղեկավարներին ս/թ մարտի 13-ին ժ. 12:00-ին հրավիրում եմ հանդիպման նախագահական նստավայրում»:
Նախաձեռնությունը ոչ միանգամից և, ամենակարևորը, ոչ միանշանակ ընդունվեց: Իշխանական թևը արձագանքեց, որ պատրաստ է քննարկմանը և վարչապետ Փաշինյանը շաբաթ օրը կայցելի նախագահին: Ոչ անմիջապես, սակայն դրական արձագանք ստացվեց նաև Լուսավոր Հայաստանից: Ինչ վերաբերում է խորհրդարանական երրորդ ուժին, ապա Բարգավաճ Հայաստան կուսակցությունը այս փուլում նախընտրեց արտահայտել արտախորհրադարանական ընդդիմության պահանջին մոտ դիրքորոշում. Քննարկումը, որի ժամանակ խոսք կգնա, մասնավորապես, արտահերթ խորհրդարանական ընտրություններից, իմաստալից կլինի միայն այն դեպքում, եթե ընտրություններին նախորդի կառավարության հրաժարականն ու ժամանակավոր կառավարության ձևավորումը: Նախագահականը սա բնորոշեց որպես սեփական օրակարգի ձևավորման ու ներկայացման փորձ և հայտարարեց, թե այս պահին մեկ սեղանի շուրջ հանդիպման ձևաչափը դառնում է անիրագործելի:
Ասենք՝ նույնիսկ առանձին հանդիպումների ձևաչափը մի պահ կասկածի տեղիք տվեց, քանի որ ուրբաթ օրը հայտարարվեց, թե նախագահ Սարգսյանի ինքնազգացողությունը վատացել է և նրան հետազոտման նպատակով տեղափոխել են Աստղիկ բժշկական կենտրոն: Բարեբախտաբար, խնդիրն, ըստ ամենայնի լուրջ չէր և արդեն երեկ նախագահը հանդիպեց նախ վարչապետ Նիկոլ Փաշինյանին, ապա նաև խորհրդարանական Իմ քայլը խմբակցության ղեկավար Լիլիթ Մակունցին ու Լուսավոր Հայաստան խմբակցության ղեկավար Էդմոն Մարուքյանին:
Թե կոնկրետ ի՞նչ է քննարկվել հանդիպումների ընթացքում, հստակ հայտնի չէ: Բոլոր դեպքերում պաշտոնական հաղորդագրությունները բավական աղքատիկ էին և միայն նշված էր, որ քննարկվել են երկրում ստեղծված իրավիճակը, այն հանգուցալուծելու և ներքաղաքական ճգնաժամը հաղթահարելու ուղիները: Այդ համատեքստում կարևորվել է քաղաքական ուժերի միջև երկխոսությունը և փոխհամաձայնության ձեռքբերումը՝ խորհրդարանական արտահերթ ընտրությունների անցկացման վերաբերյալ: Ենթադրվում է, որ առնվազն վարչապետի հետ հանդիպման ընթացքում քննարկման առարկա է դարձել նաև Զինված ուժերի գլխավոր շտաբի պետի շուրջ ստեղծված իրավիճակը, որն, ի դեպ, Նիկոլ Փաշինյանը նախօրեին հասցրել էր քննարկել հենց Գլխավոր շտաբի սպայակազմի հետ: Դիմելով սպայակազմին, Փաշինյանն ընդգծել էր, որ թե՛ պետությունը, թե՛ ժողովուրդն ապրում են բավական ծանր ժամանակաշրջան, որը, սակայն, հաղթահարելի է, եթե ձևավորվի այդ թվում նաև զինված ուժերի ապագայի վերաբերյալ ընդհանուր տեսլական: Կառավարության ղեկավարն ընդգծել էր, որ Զինված ուժերի կարիքներն ինչպես եղել, այնպես էլ շարունակում ու շարունակելու են մնալ կառավարության ուշադրության կենտրոնում: Փաշինյանը նաև շեշտել էր, որ զինված ուժերի ապագայի մասին պատկերացումները պետք է հիմնված լինեն այն բազմափորձ գեներալների, սպաների կարծիքի և տեսանկյունների վրա, ովքեր Զինված ուժեր, բանակ, բանակի կառավարում հասկացությունները գիտեն ոչ միայն որպես տերմիններ, այլև ամենօրյա աշխատանք, ամենօրյա ջանք, ամենօրյա փորձություն:
Նիկոլ Փաշինյան- ՀՀ վարչապետ- «Ուզում եմ բոլոր ներկաներին խնդրել, որ շարունակեն իրենց ծառայությունը որպես Զինված ուժերի գեներալներ, սպաներ, որպես Հայաստանի անվտանգության և տարածքային ամբողջականության երաշխավորը հանդիսացող մարմնի, կառույցի հենասյուներ: Ես հավատում եմ ձեզ, ես համոզված եմ, որ իսկապես այն ծառայությունները, որ դուք մատուցել եք՝ մատուցել եք անկեղծորեն, և էլի ուզում եմ կրկնել, որ այդ ծառայություններն արժանի են ամենաբարձր գնահատանքի ու այդ գնահատանքը երբեք, որևէ հանգամանքում, որևէ պարագայում չի կարող հօդս ցնդել»:
