Երևանի ընդհանուր իրավասության դատարանում շարունակվում է Հայաստանի ֆուտբոլի ֆեդերացիայի նախկին նախագահ, ՀՀԿ-ական նախկին պատգամավոր Ռուբեն Հայրապետյանի որդու՝ Ռաֆիկ Հայրապետյանի և նրա ընկերների գործով դատական նիստը:
Շուշանիկ Իսրայելյան (մեղադրող դատախազ) - Քրեական գործը հարուցվել է 2020 թվականի մարտին` մի խումբ անձանց կողմից նախնական համաձայնությամբ կյանքի ու առողջության համար վտանգավոր բռնություն գործադրելով Հայկ Շահնազարյանին ազատությունից ապօրինի զրկելու ինչպես նաև առանձնապես խոշոր չափերի շորթում կատարելու դեպքերի առթիվ:
Մոտ մեկ տարի տևած գործի քննությունը ձգձգվում էր. պատճառը Երևանի ընդհանուր իրավասության դատարանից վարույթի փոխանցումն էր Գեղարքունիքի դատարան: Այս վեճը, սակայն, լուծել է Վճռաբեկը և գործի վարույթը կրկին փոխանցել Երևան: Դատարանն այս փուլում հետազոտում է գրավոր ապացույցները, սակայն այն տեսանկարահանելու «Լուրերի» միջնորդությունը դատավորը մերժեց պաշտպանական կողմի առարկության պատճառով:
Ըստ մեղադրանքի՝ Ռուբեն Հայրապետյանի կազմակերպմամբ` տուժողն ազատությունից ապօրինի զրկվել ու շուրջ 22 օր պահվել է «Հարսնաքարում»՝ ենթարկվելով ծեծի ու նվաստացումների։ Հայրապետյանի դրվագը, սակայն, դատարանում չէ, նա հետախուզվում է: Իսկ դատարանում արդեն իսկ հրապարակվել է նրա որդու և ընկերների վերաբերյալ մեղադրական եզրակացության եզրափակիչ մասը:
Շուշանիկ Իսրայելյան - Տուժողը հանդիսացել է Ռուբեն Հայրապետյանի ընտանիքին պատկանող և Ռաֆիկ Հայրապետյանի սեփականությունը հանդիսացող «Նորալուսին» ՍՊ ընկերությունում գործադիր մարմնի ղեկավար և ունեցել է այդ ընկերության անունից հանդես գալու, պայմանագրեր կնքելու լիազորություն:
Նա 2016 թվականին Հայրապետյանների ընտանիքին պատկանող բանկից 57,5 միլիոն դրամ վարկ է ստացել, որոշ մասն օգտագործել է համալիրի գործունեությունն ապահովելու համար, իսկ 40 միլիոնը կանխիկացրել և կեսն օգտագործել անձնական բիզնես հիմնելու համար:
Իմանալով այս հանգամանքի մասին` Ռուբեն Հայրապետյանը և Ռաֆիկ Հայրապետյանը, ներգրավելով նաև Ռաֆիկ Հայրապետյանի ընկերներին, 2016 թվականի հուլիսի 26-ից մինչև օգոստոսի 18-ն ընկած ժամանակահատվածում «Հարսնաքար» ռեստորանահյուրանոցային համալիրի քոթեջներից մեկում, ինչպես նաև տարբեր սենյակներում, ապօրինի ազատությունից զրկել են Հայկ Շահնազարյանին:
Ըստ մեղադրանքի՝ այդ ընթացքում մեղադրյալները ձեռքերով և ոտքերով, ինչպես նաև մահակներով հարվածներ են հասցրել տուժողին:
Շուշանիկ Իսրայելյան - Սպառնալիքներ են տվել գումարը չվերադարձնելու դեպքում նրան Սևանա լճում կենդանիների կեր դարձնելու, անտառ տանելու, այնտեղից հետ չբերելու եղանակներով, ինչպես նաև Ռաֆիկ Հայրապետյանը աքցանով փորձել է կտրել ճկույթը, բացի դա, մկրատով վնասել ձախ ականջը: Յուրի Միքայելյանն ու Անդրանիկ Զորողլյանը նաև կրակայրիչով այրել են Հայկ Շահնազարյանի թևերը և փորձել աքցանով քաշել եղունգները:
Մեղադրող դատախազը հավելում է՝ Ռաֆիկ Հայրապետյանը տուժողին տեղափոխել է իրենց առանձնատուն, որտեղ արդեն Ռուբեն Հայրապետյանը ապտակել ու հայհոյել է նրան:
Շուշանիկ Իսրայելյան - Ռուբեն Հայրապետյանը նրանից, իսկ հետագայում նաև Արմենուհի Գորովիցից, որը Հայկ Շահնազարյանի մայրն է, պահանջել է 120 հազար ԱՄՆ դոլար, այդ թվում` այն գումարը, որը Հայկ Շահնազարյանը ուղղել էր ընկերության բնականոն գործունեությունը ապահովելու նպատակով:
Ռաֆիկ Հայրապետյանը մեղադրանքը չի ընդունում: Նրա պաշտպանը պնդում է, որ կատարվել է կողմնակալ քննություն:
Ամրամ Մակինյան (Ռաֆիկ Հայրապետյանի պաշտպան) - Հոլիվուդյան սցենարիստները կերազեին, որ այդպիսի երևակայություն ունենային, դա բացարձակ անհեթեթություն է:
Պաշտպանը պնդում է՝ այս գործով տուժողը ոչ թե Հայկ Շահնազարյանն է, այլ՝ Ռաֆիկ Հայրապետյանը: Դա, ըստ Մակինյանի, արձանագրել է նաև դատարանը՝ նշելով, որ կատարվել է 57 միլիոն դրամի հափշտակություն:
Ամրամ Մակինյան - Մի դեպքում, երբ խոսքը վերաբերում է Ռաֆիկ Հայրապետյանին, վարույթն իրականացնող մարմինը անհնարին ջանասիրությամբ գործում է, իսկ մյուս դեպքում, երբ որ Ռաֆիկ Հայրապետյանը տուժող է, և մեր իրավունքները խախտված են, վարույթն իրականացնող մարմինն ընդհանրապես, տվյալ դեպքում` նաև դատախազությունը, անգործություն է ցուցաբերում, և հասկանում եմ, որ դատախազությունը ունի անձնական շահագրգռվածություն, և իր գործունեությունը պայմանավորված է եղել քաղաքական ղեկավարների կողմից տրված ցուցումներ կատարելով, բայց չեմ կարծում, որ անձնական դաշտ անցնելով և վրեժխնդրությամբ պայմանավորված մեր իրավունքները խախտելով` որևէ լավ տեղ կարող են հասնել:
Մեղադրողը նկարագրում է նաև Ռուբեն Հայրապետյանի գործողությունները, նշում՝ Հայրապետյանը, հայհոյանքներ տալով, նաև էլեկտրական մահակով հարվածել է տուժողի դեմքին՝ պահանջելով գումարը։
Ամրամ Մակինյան - Իրենք ուղղակի մոռացել են կամ չեն իմացել, որ պարոն Ռուբեն Հայրապետյանը այդ ժամանակ եղել է շատ ծանր վիրահատությունից նոր վերադարձած և, պայմանավորված իր առողջական վիճակով` շատ ծանր պայմաններում է եղել, ուղղակի իրենք այդ մասին չեն իմացել դրա համար պարոն Հայրապետյանին վերագրել են այդպիսի ինչ-որ գործողություններ կատարելը:
Ըստ մեղադրանքի՝ խմբի անդամները ստիպել են «Հարսնաքար» կանչել տուժողի հարազատներին և ընկերներին, որոնց ներկայությամբ սպառնալիքներ են տվել, պահանջել գումարը:
Շուշանիկ Իսրայելյան - Հայկ Շահնազարյանի ընտանիքի և ընկերների կողմից փոխանցվել են պահանջված գումարի որոշակի մասը, մի մասը` կանխիկ գումարի տեսքով, մի մասը` ոսկյա իրերի:
Գործի համաձայն՝ հայր և որդի Հայրապետյանները պահանջել են տուժողի տատի` ապօրինի շինություն հանդիսացող առանձնատունը, որն ընտանիքի միակ կացարանն է եղել: Ըստ մեղադրանքի՝ Շահնազարյանը ազատ է արձակվել առողջական վիճակի էական վատթարացումից հետո միայն: Ինչ վերաբերում է տուժողի՝ ընկերությունից հափշտակություն կատարելու դեպքին, ապա դատախազության փոխանցմամբ՝ այդ մասով ևս քննություն է կատարվում:
Հեղինակ` Տաթև Խաչատրյան
