ՆԳ նախարարության նախաձեռնությամբ 2024 թվականի մայիսի 1-ից գործում է տեսալուսանկարահանող սարքերով արձանագրված իրավախախտումների տուգանքը 20 տոկոսով նվազ վճարելու բոնուսային համակարգը։ Այս մասին տեղեկացնում են ՆԳՆ-ից:
«Դրանից օգտվելու համար անհրաժեշտ է
roadpolice.am կայքում ակտիվացնել էլեկտրոնային ծանուցումը, ինչից հետո վարչական իրավախախտման վերաբերյալ որոշումը կուղարկվի էլեկտրոնային փոստին՝ արդեն 20 տոկոս նվազեցված տուգանքով։ Հիշեցնենք՝ համակարգը չի փոխարինում SMS ծանուցմանը։
Գործարկման պահից՝ 2024 թվականի մայիսի 1-ից, մինչև 2026 թվականի հունիսի 23-ը համակարգում գրանցվել և 20 տոկոս զեղչից օգտվելու հնարավորություն է ստացել 150 849 անձ։
Մեկ այլ իրավակարգավորմամբ՝ 2024 թվականի ապրիլի 1-ից ճանապարհային երթևեկության կանոնների խախտման համար նախատեսված տուգանքը 15 օրվա ընթացքում վճարելու դեպքում քաղաքացին օգտվում է լրացուցիչ 30 տոկոս նվազ վճարման հնարավորությունից։
2024 թվականի ապրիլի 1-ից 2026 թվականի հունիսի 23-ը 30 տոկոս նվազ վճարման հնարավորություն է ստացել 638 815 անձ։
Հարգելի՛ քաղաքացիներ,
roadpolice.am համակարգում ակտիվացրե՛ք էլեկտրոնային փոստի միջոցով ծանուցման համակարգը և վճարեք ավելի նվազ»,- ասված է ՆԳՆ-ի տարածած հաղորդագրությունում։
