Լաչինի միջանցքի ապաշրջափակման հարցում միջազգային հանրությունը շատ լուրջ դեր ունի՝ այսօր պնդեց Հայաստանի արտգործնախարարը՝ արձագանքելով «Լուրերի» հարցին: Արցախում արդեն երկու ամիս ձգվող հումանիտար ճգնաժամի ֆոնին Միրզոյանը նկատեց՝ բոլոր խնդիրների լուծման ճանապարհը մեկն է՝ խաղաղ բանակցությունները, այս հարցում ընդգծեց միջազգային հանրության, այդ թվում՝ ԵՄ հստակ գործողությունների կարիքը:
Արարատ Միրզոյան (ՀՀ արտաքին գործերի նախարար) - Բազմաթիվ մեծ ու փոքր պետությունների, միջազգային կազմակերպությունների, հեղինակավոր ոչ կառավարական կազմակերպությունների կոչերն ու հորդորները դեռևս չեն ազդել Ադրբեջանի վարքագծի վրա: Այս պարագայում ցանկանում եմ ընդգծել միջազգային հանրության կողմից հստակ գործողությունների, համապատասխան միջազգային մեխանիզմների կյանքի կոչման անհրաժեշտությունը՝ ուղղված Լեռնային Ղարաբաղի ապօրինի շրջափակումը դադարեցնելուն, արցախահայության էթնիկ զտումն ու արցախահայության հետագա ագրեսիան կանխելու: Այս առումով կարևորում ենք Լաչինի միջանցք ու Լեռնային Ղարաբաղ միջազգային փաստահավաք առաքելության գործուղումը:
Խորվաթիան, որ վերջերս է դարձել Շենգեն գոտու երկիր, Լաչինի միջանցքի հարցում հիշեցնում է Եվրամիության դիրքորոշումը: Պաշտոնական այցով Հայաստանում գտնվող առաջին խորվաթ արտգործնախարարը միտքը կարճ է ձևակերպում, ասում՝ հուսով ենք այս թեման կլուծվի միջազգային հումանիտար չափորոշիչներին համապատասխան:
ԼԱՐՎԱԾՈՒԹՅԱՆ ԹՈՒԼԱՑՄԱՆ ՀԱՄԱՐ ՊԵՏՔ Է ՄԵԿՏԵՂԵԼ ՋԱՆՔԵՐԸ. ՌԱԴՄԱՆ
Շրջափակման թեման, նաև տարածաշրջանային հարցերը այսօր մինչև ասուլիսը Միրզոյան-Ռադման հանդիպման օրակարգում էին: Լարվածությունն աճում է, ու զարգանում նոր էսկալացիայի հավանականությունը՝ այս գնահատականի ֆոնին Միրզոյանն ընդգծում է Հայաստանում երկարաժամկետ դիտորդական առաքելություն տեղակայելու Եվրամիության որոշման կարևորությունը: Խաղաղության ամրապնդման հարցում սա կարևոր որոշում է, շեշտում է նաև խորվաթ նախարարն ու արձագանքում «Լուրերի» հարցին, թե ինչպես դա կարող է կանխել Բաքվի ագրեսիվ գործողությունները:
Գորդան Գրլիչ Ռադման (Խորվաթիայի արտաքին գործերի նախարար) - Շատ ուրախ եմ, որ Հայաստանը ճանաչում է ԵՄ դիտորդական առաքելության կարևորությունը։ Այս առաքելությանը մինչև 100 անձ է մասնակցում և նախատեսված է 2 տարի ժամկետով: Հանձնառությունը ստանձնել ենք՝ որպես տարածաշրջանում կայունությանը շահագրգիռ կողմ։ Հետագա կայուն և երկարաժամկետ խաղաղության հաստատման գործում այս առաքելությունը ժամանակավոր գործիք է, սա որևէ կերպ ստատուս քվո չի երաշխավորում:
Լարվածությունը թուլացնելու համար պետք է մեկտեղել ջանքերը, կարծում է Ռադմանն ու շեշտում՝ Հայաստանը և Ադրբեջանը պետք է վերամեկնարկեն դադարեցված խաղաղության բանակցություններն ու երկխոսությունը:
ԲԱՆԱԿՑԱՅԻՆ ԳՈՐԾԸՆԹԱՑԸ ԿԱՆԳ ՉԻ ԱՌԵԼ. ՄԻՐԶՈՅԱՆ
Միրզոյանը, սակայն, կարծում է՝ բանակցային գործընթացը կանգ չի առել: Երևանն ու Բաքուն փոխանակվում են խաղաղության պայմանագրի շուրջ առաջարկներով: Երեկ Բեռլինում, այսօր էլ Երևանում նա նորից ասաց՝ 10 օր առաջ Հայաստանը ստացել է Ադրբեջանից հերթական առաջարկությունները, այժմ աշխատում են տեքստի վրա: Բայց չմանրամասնեց՝ արդյոք Բաքուն ընդունե՞լ է իր հինգ սկզբունքներն ընդարձակելու, արցախահայության անվտանգության ու իրավունքների հարցերը ներառելու Հայաստանի առաջարկը:
Արարատ Միրզոյան - Առաջարկների բովանդակությունը ես, երևի, այս պահին նպատակահարմար չեմ համարի ամբողջովին բացել, որովհետև դետալների մասին է խոսքը, բանակցային գործընթացի մասին է խոսքը, և հետո կողմերի դիրքորոշումները զանազան հարցերի շուրջ տարբեր փուլերում կարծրացածից, որոշ դեպքերում մոտենում են միմյանց, որոշ դեպքերում շարունակում են մնալ իրարից բավականին հեռու: Հետևաբար, երևի, քաղաքական առումով նպատակահարմար չի վերցնել առանձին որևէ դետալ և ասել, որ այս պահին ինչպիսին են կողմերի դիրքորոշումները այդ հարցի շուրջ, որովհետև վաղը կարող է բոլորովին այլ պատկեր լինի: Կրկնում եմ՝ որոշ հարցերում մեզ մոտեցնել դիրքորոշումները հնարավոր է եղել, բայց հայկական կողմն ունի իր սկզբունքային հարցերն այս գործընթացում, և այդ հարցերը, կարծում եմ, որ նաև հրապարակավ բազմիցս ասել ենք:
Խոսելով դեռ դեկտեմբերին Մոսկվայում չկայացած արտգործնախարարների եռակողմ հանդիպումից, Միրզոյանը շեշտեց՝ այն հետաձգվել է, չի չեղարկվել: Հիշեցրեց՝ Մոսկվա չգնացին Լաչինի միջանցքի արգելափակման պատճառով, նաև նկատեց՝ որոշակի հարմար պահի կգործարկեն հետաձգված հանդիպումը:
ԿԱՆ ԱՆՀԱՄԱՁԱՅՆՈՒԹՅՈՒՆՆԵՐ. ԱՆԴՐԱԴԱՐՁ ՌԴ ՀԵՏ ՀԱՐԱԲԵՐՈՒԹՅԱՆԸ
Նախարարը չափազանցված է համարում, թե հայ-ռուսական հարաբերությունները ճգնաժամային են:
Արարատ Միրզոյան - Կան բազմաթիվ համաձայնություններ, կան որոշակի հարցերում անհամաձայնություններ, ընդ որում՝ հրապարակային, այդ թվում և կապված ՀԱՊԿ-ի դերակատարման և քաղաքական գնահատականների կամ դրանց բացակայության հետ: Ճգնաժամ անվանել դրանք երևի չափազանց ուռճացված կլինի:
Ասուլիսի վերջում գործընկերները ձեռքսեղմամբ բաժանվեցին: Տեղեկացրեցին նաև՝ փոխըմբռնման հուշագիր են ստորագրել ԱԳՆ դիվանագիտական դպրոցի և Խորվաթիայի դիվանագիտական ակադեմիայի միջև դիվանագիտական կրթության և վերապատրաստման ոլորտում գործակցության վերաբերյալ:
