Երևանի կենդանաբանական այգու Բունկա փղի հարցը միջազգային հնչեղություն է ստացել: Կենդանասերները պահանջում են, որ միայնակ ապրող կենդանուն բնություն վերադարձնեն, քանի որ փղերը խմբերով են ապրում:
«Ազատություն Բունկային» խորագրով ստորագրահավաքին արդեն 73 հազարից ավելի մարդ է մասնակցել: Արշավի նախաձեռնողներն առաջարկում են փղին վերականգնողական կենտրոն տանել՝ Թաիլանդ կամ Հնդկաստան։ Այս պահին նրանք Հայաստանում են, որ ուսումնասիրեն կենդանու վիճակը:
Մարկ Սթրեթոն (բրիտանացի լրագրող) - Բազմաթիվ երկրներում ուսումնասիրությունները ցույց են տվել, որ փղերը բարձր ինտելեկտով կենդանի են, նրանց պահանջմունքները մեր պատկերացրածից ավելին են: Այսօր նկատվում է միտում ամբողջ աշխարհում, որ տարբեր կենդանաբանական այգիներից ազատում են փղերին և տեղափոխում են վերականգնողական կենտրոններ և կացարաններ, որտեղ նրանք հնարավորություն են ունենում ապրել ավելի ազատ պայմաններում:
Երևանի կենդանաբանական այգու գիտական գծով փոխտնօրեն Աշոտ Ասլանյանն ասում է՝ որ Բունկան միանյակ չմնա, նախատեսում են տարածքը մեծացնել և երկրորդ փիղ բերել: Երկու կենդանու համար նախատեսված ընդհանուր տարածքը 4000 քառակուսի մետր է, իսկ Բունկայինն ընդամենը մոտ 1000 քառակուսի մետր է:
Աշոտ Ասլանյան (Երևանի կենդանաբանական այգու գիտական գծով փոխտնօրեն) - էս պահի դրությամբ մեկ փղի համար դրված չափորոշիչների մեր պայմանները բավարարում են: Այստեղ հարցը դրվում է արդեն ոչ թե մեր Բունկայի համար պայմանները լավը չեն, Բունկայի համար պայմանները լավն են, հարցը դրվում է այս կերպ` մենք ունենք ընդամենը երկու տարի ժամանակ, որ ունենանք երկրորդ կամ երրորդ փղի համար համապատասխան տարածք:
Արու և էգ փղերը բնության մեջ էլ միասին չեն բնակվում, կենդանաբանական այգուց տեղեկացնում են, որ երկրորդ կենդանու տեղափոխության դեպքում նրանց միջև արգելապատնեշ կլինի, սակայն փորձագետների խոսքով՝ ցանկացած պարագայում երկու փիղն էլ միայնակ են մնալու:
Ինգո Շմիդինգեր (անազատ պայմաններում պահվող վայրի կենդանիների բարեկեցության փորձագետ) - Իհարկե բարդ հարց է, թե ինչը այսօր նպաստավոր կլինի Բունկայի համար, քանի որ նա ծնվել և 15 տարի ապրում է անազատության մեջ: Վերլուծություններից հետո կհասկանանք՝ եթե կենդանուն տեղափոխելու անհրաժեշտություն լինի, ապա տեղափոխելու համար պայմաններ կստեղծենք, իսկ եթե այլևս հնարավոր չլինի նրան վերադարձնել բնություն, կհասկանանք, թե տեղում ինչ պայմաններ պետք է ստեղծվեն:
Երևանի ավագանու անդամ Արման Անտոնյանն ասում է՝ քաղաքային իշխանությունը Բունկային տեղափոխելու հարցը չի քննարկում: Ցանկանում են պայմանները բարելավել և տարածքը վերանորոգել:
Արման Անտոնյան (Երևանու ավագանու անդամ) - Ծրագիրը դեռ քննարկվում էր գարնանը, որովհետև մենք գիտենք, որ նախ առաջինը` Բունկան միայնակ չպետք է մնա, և երկրորդը՝ որտեղ որ Բունկան հիմա ապրում է, դեռ շատ տարիներ նույն ազատավանդակն է, իր չափսերով անփոփոխ, և նախատեսված է նախ երկրորդ փիղ` Բունկայի համար զուգընկեր, Երևանի կենդանաբանական այգի բերել և համապատասխան չափորոշիչներին համապատասխան նոր ազատավանդակի կառուցում:
Բունկայի ճակատագիրն այս պահին անորոշ է: Միջազգային փորձագետները հետազոտության տվյալները կհայտնեն մի քանի օրից:
Հեղինակ` Լիանա Խաչատուրյան
