ԼՌՈՒԹՅԱՆ ՐՈՊԵ ԱԺ-ՈՒՄ՝ Ի ՀԻՇԱՏԱԿ ՈՃՐԱԳՈՐԾՈՒԹՅԱՆ ԶՈՀԵՐԻ
Ազգային ժողովը հոկտեմբերի 27-ի հերթական նիստը սկսեց մեկ րոպե լռությամբ:
Ռուբեն Ռուբինյան (ՀՀ ԱԺ նախագահի տեղակալ) - Ուղիղ 22 տարի առաջ այս դահլիճում ԱԺ-Կառավարության հարցուպատասխանի ժամանակ տեղի ունեցավ հոկտեմբերի 27-ի ոճրագործությունը: Առաջարկում եմ մեկ րոպե լռությամբ հարգել զոհերի հիշատակը:
ԸՆԴԴԻՄՈՒԹՅԱՆ ՀԱՅՏԱՐԱՐՈՒԹՅԱՆ ՆԱԽԱԳԻԾԸ ՉԻ ԸՆԴՈՒՆՎԵԼ
Հիշատակի արարողությունից հետո խորհրդարանն անցավ Հայաստանի և Արցախի շուրջ ստեղծված վիճակի վերաբերյալ Ազգային ժողովի հայտարարության նախագծի քննարկմանը: Այն մշակել էին ընդդիմադիր «Հայաստան» և «Պատիվ ունեմ» խմբակցությունները՝ նախորդ օրը «Հայաստանի Հանրապետության և Ադրբեջանի Հանրապետության շփման գծում տիրող իրավիճակը և սահմանազատման խնդիրները» թեմայով տեղի ունեցած փակ քննարկումից հետո:
Տիգրան Աբրահամյան (ԱԺ «Պատիվ ունեմ» խմբակցության պատգամավոր) - Ազգային ժողովը դատապարտում է Ադրբեջանի և Թուրքիայի կողմից ահաբեկչական խմբավորումների և վարձկանների ներգրավմամբ 2020թ. սեպտեմբերի 27-ից Արցախի դեմ սանձազերծված լայնամասշտաբ զինված ագրեսիան: Պատանդների նկատմամբ արձանագրվող կոպտագույն խախտումները, պատերազմական հանցագործությունները, Արցախի տարածքների բռնազավթումը, շարունակաբար ուժի գործադրումը, հայատյացության չդադարող հռետորաբանությունը, միջազգային հանրության խեղաթյուրված տեղեկատվության տրամադրումը: Պահանջում է ՀՀ կառավարությունից՝ զերծ մնալ որևէ բանակցությունից, գրավոր կամ բանավոր համաձայնություններից, որոնք կխախտեն ՀՀ Սահմանադրության պահանջներն ու հայ ժողովրդի կամքը՝ արտահայտված անկախության հռչակագրով: Ընթացող գործընթացների վերաբերյալ խորհրդարանական տարբեր ձևաչափերով ապահովել ԱԺ-ին հավաստի տեղեկատվության տրամադրումը, լինել հնարավորինս հրապարակային, քննարկման դնել ինչպես մասնագիտական, այնպես էլ խորհրդարանական տարբեր ձևաչափերով:
«Քաղաքացիական պայմանագիր» խմբակցության ղեկավար Հայկ Կոնջորյանն արձանագրեց՝ հայտարարության նախագիծը կոնսենսուսային չէ:
Հայկ Կոնջորյան (ԱԺ «Քաղաքացիական պայմանագիր» խմբակցության ղեկավար) - Ցանկանում եմ հստակ շեշտել, որ նախագծում տեղ գտած այն թեզերն ու դրույթները, որոնք վերաբերում են Ադրբեջանի կողմից սանձազերծած պատերազմին, պատերազմական հանցագործություններին, մենք այդ դրույթների հետ որևէ խնդիր չենք տեսնում: Հայտարարության մեջ նաև տեղ են գտել ներքաղաքական բովանդակություն ունեցող ձևակերպումներ, ընդդիմության քաղաքական նարատիվի մաս հանդիսացող մոտեցումներ, որոնք նման հայտարարության մեջ չեն կարող տեղ գտնել:
Քննարկումից հետո որոշման նախագիծը դրվեց քվեարկության, քաղպայմանագիրը չմասնակցեց դրան:
Ռուբեն Ռուբինյան - Կողմ՝ 26, դեմ՝ 0, ձեռնպահ՝ 1. որոշումը չի ընդունվել:
ԱԺ-ՈՒՄ ԿՍՏԵՂԾՎԻ ԵՎՍ ՄԵԿ ՔՆՆԻՉ ՀԱՆՁՆԱԺՈՂՈՎ
Օրակարգային հաջորդը հարցը ևս ընդդիմադիրների նախաձեռնությունն էր: Ազգային ժողովում կստեղծվի քննիչ հանձնաժողով, որը կուսումնասիրի «Հայաստան» համահայկական հիմնադրամի հավաքած և Հայաստանի Հանրապետության պետական բյուջե փոխանցած միջոցների օգտագործումը:
Արծվիկ Մինասյան (ԱԺ «Հայաստան» խմբակցության քարտուղար) - Անհրաժեշտ է այս համահայկական կարևոր նախաձեռնության նկատմամբ վստահությունը բերել հավուր պատշաճի, և մեր գլխավոր խնդիրն է բացահայտել, եթե եղե՞լ են ապօրինություններ, անօրինականություններ, դրանք բոլորը բացահայտելով հանդերձ՝ մեղավորներին առաջադրել պատասխանատվություն»:
«Իմ քայլը» խմբակցության քարտուղար Նազելի Բաղդասարյանն ընդգծեց՝ իշխանությունն ունի բավարար քաղաքական կամք՝ ցանկացած հարցին տալ սպառիչ պատասխաններ, բայց առանց քաղաքական ենթատեքստերի, օբյեկտիվ քննության դաշտում:
Նազելի Բաղդասարյան (ԱԺ «Քաղաքացիական պայմանագիր» խմբակցության քարտուղար) - Խորհուրդ կտամ զերծ մնալ քաղաքական երանգներից, որովհետև, եթե մենք հիմա մտնենք այդ դաշտ, կարող է պարզվի, որ նույն հիմնադրամը տարիներ շարունակ նախկինում շատ ու շատ գումարներ է վատնել: Կարող է պարզվի, որ մասնավոր ընկերությունների ատկատների խողովակ է հանդիսացել, ինչու չէ, կազինոներում խաղադրույքի հիմնական գումար է հանդիսացել:
Ընդդիմադիր պատգամավորների առաջարկն ընդունվեց միաձայն: Քննիչ հանձնաժողովը կունենա 11 անդամ, այն կղեկավարի ընդդիմադիր «Հայաստան» խմբակցության քարտուղար Արծվիկ Մինասյանը:
ԱՐՏԱԿ ՄԱՆՈՒԿՅԱՆՆ ԸՆՏՐՎԵՑ ԿԲ ԽՈՐՀՐԴԻ ԱՆԴԱՄ
Ազգային ժողովը քննարկեց նաև Կենտրոնական բանկի խորհրդի անդամի ընտրության հարցը: Այս պաշտոնում «Քաղաքացիական պայամանգիր»-ն առաջադրել էր 7-րդ գումարման խորհրդարանի պատգամավոր, տնտեսագետ Արտակ Մանուկյանի թեկնածությունը: Փակ և գաղտնի քվեարկության արդյունքում Մանուկյանը Կենտրոնական բանկի խորհրդի անդամ ընտրվեց 65 կողմ 20 դեմ ձայնով:
ՔՆՆԱՐԿՎԵՑ ԵՎՍ ՄԵԿ ՔՆՆԻՉ ՀԱՆՁՆԱԺՈՂՈՎ ՍՏԵՂԾԵԼՈՒ ՀԱՐՑԸ
Քվեարկությանը զուգահեռ խորհրդարանը քննարկեց ևս մեկ քննիչ հանձնաժողովի ստեղծման հարցը:
Այս անգամ ընդդիմադիր պատգամավորներն առաջարկում են ուսումնասիրել դատական գործերի մակագրման էլեկտրոնային համակարգի խափանման, ինչպես նաև Արդարադատության նախարարի կողմից դատավորների նկատմամբ հարուցված կարգապահական վարույթների հարցը:
Արամ Վարդևանյան (ԱԺ «Հայաստան» խմբակցության պատգամավոր) - Այսօր Հայաստանում, թե՛ քաղաքացիական գործերի, թե՛ քրեական գործերի համակարգչի միջոցով մակագրման համակարգը չի գործում: Հայաստանում դատարաններ հայցադիմումներ են ներկայացվում օրվա կտրվածքով հարյուրավոր, քրեականներով տասնյակ միջնորդություններ: Միջնորդությունները նախաքննության փուլում ձեռքով էին մակագրվում, բայց դրանց դեմ վերաքննիչ տասնյակ բողոքները արդեն համակարգչային ծրագրով էին բաշխվում»:
«Քաղաքացիական պայմանագիր» խմբակցության անդամ Վլադիմիր Վարդանյանի կարծիքով՝ այս հարցերի ուսումնասիրությունն ընդհանրապես խորհրդարանի իրավասության տիրույթում չէ:
Վլադիմիր Վարդանյան (ԱԺ «Քաղաքացիական պայմանագիր» խմբակցության պատգամավոր) - Մենք համարում ենք, որ այս գործընթացն ի սկզբանե հակասահամանադրական է և որևէ եղանակով հիմնավորված չէ, որևէ կերպ չենք մասնակցելու այս գործընթացին, դուք գտնում ենք, որ սահմանադրականության խնդիր կա, խնդրեմ, դիմեք ՍԴ և ստացեք ձեզ հուզող հարցերի պատասխանը: Կոչ եմ անում ՔՊ խմբակցության բոլոր գործընկերներիս, խնդրում եմ նաև իմ ընդդիմադիր գործընկերներին՝ զերծ մնալ այս հարցի վերաբերյալ որևէ քննարկումից, քվեարկությունից, որովհետև մենք սրանով ոտնահարում ենք դատական իշխանությունը:
Քննիչ հանձնաժողովի անդամների թիվը սահմանելու նախագծի քվեարկությունը տեղի կունենա վաղը:
Հեղինակ՝ Նորայր Շողիկյան
