Տնտեսական հարցերի մշտական հանձնաժողովը ապրիլի 30-ին գումարել է արտահերթ նիստ: Այն վարել է հանձնաժողովի նախագահի տեղակալ Բաբկեն Թունյանը:
Պատգամավորներն անդրադարձել են նախորդ օրը քննարկված, սակայն քվեարկությունը հետաձգված ««Խաղային գործունեության կարգավորման մասին» օրենքում լրացումներ և փոփոխություններ կատարելու մասին» և կից օրինագծերի փաթեթին:
Հեղինակի՝ պատգամավոր Հայկ Սարգսյանի տեղեկացմամբ՝ նախաձեռնության վերաբերյալ 30-ից ավելի առաջարկներ են ներկայացվել, որոնցից միայն 2-ը չեն ընդունվել:
Լրամշակված նախագծերի փաթեթն ընդունվել է առաջին ընթերցմամբ: Հանձնաժողովի փոխնախագահ Բաբկեն Թունյանը նշել է, որ փաթեթի վերաբերյալ մինչև երկրորդ ընթերցում կկազմակերպվի աշխատանքային քննարկում:
Նիստում երկրորդ ընթերցմամբ քննարկվել է «Հայաստանի Հանրապետության հարկային օրենսգրքում փոփոխություններ կատարելու մասին» և կից օրինագծերի փաթեթը: Այն ներկայացրել է ՀՀ պետական եկամուտների կոմիտեի նախագահի տեղակալ Համլետ Սահակյանը:
Փոփոխությունները՝ այստեղ:
Զեկուցողի խոսքով առաջինից երկրորդ ընթերցում կատարվել են փոփոխություններ: Ընդունվել է հանձնաժողովի նախագահի տեղակալ Բաբկեն Թունյանի առաջարկը, ըստ որի՝ տնտեսավարողների մոտ թեմատիկ ուսումնասիրություններ կարող են իրականացվել տարեկան առավելագույնը 3 անգամ: Երկրորդ ուսումնասիրությունը կարող է կատարվել միայն ՊԵԿ նախագահի հրամանով՝ կոնկրետ պայմանների առկայության դեպքում:
ՀՀ ֆինանսների նախարարի տեղակալ Ավագ Ավանեսյանը երկրորդ ընթերցմամբ ներկայացրել է «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» օրինագիծը:
Ըստ զեկուցողի՝ առաջին ընթերցումից հետո Կառավարությունը երկու փոփոխություն է կատարել նախագծում:
Երկրորդ ընթերցմամբ քննարկված նախաձեռնություններն արժանացել են հանձնաժողովի հավանությանը:
