Որևէ բնակավայրում մեզ հետ շփումների ընթացքում կարող են չբարձրացնել ջրի հետ կապված հարցերը, որովհետև մենք գիտենք, որ ՀՀ-ում գործնականում չկա այդպիսի բնակավայր, որը ջրի հետ կապված պրոբլեմ չունենա: Այդ մասին Կառավարության՝ ապրիլի 30-ի նիստին ասաց վարչապետ Նիկոլ Փաշինյանը:
Ըստ նրա՝ նաև բազմաթիվ բնակավայրերում ոռոգման ջրի բացակայության պատճառով մարդիկ ոռոգման նպատակով օգտագործում են խմելու ջուր, ինչի հետևանքով խմելու ջրի ծավալը նվազում է:
«Հաջորդ 5 տարում ջրային խնդիրները մեզ համար լինելու են 5 առաջնահերթություններից մեկը: Ինչպես նախորդող շրջանում խաղաղության օրակարգն էր մեզ համար առաջնահերթություն, հաջորդ հնգամյակում ջրի հետ կապված հարցերը լինելու են բացարձակ առաջնահերթություն, որովհետև մեր տնտեսությունը եկել, հասել է մի կետի, որ առանց ջրային ոլորտում ֆունդամենտալ փոփոխությունների՝ մենք տեղապտույտի վիճակում կհայտնվենք»,- ասաց նա:
Ըստ Փաշինյանի՝ սա սպոնտան որոշում չէ, արդեն 2 տարի է, ինչ այս որոշումը կա, և քայլ-քայլ նախապատրաստական աշխատանքներ են իրականացվում:
«Եթե մի քիչ էլ սուր ձևակերպենք, խոսքը հանրապետության ամբողջ ջրային ենթակառուցվածքը փոխելու կամ հիմնանորոգելու մասին է»,- ասաց նա՝ ընդգծելով, որ խնդիր է նաև ջրահեռացման համակարգերի բացակայությունը, և որ 21-րդ դարում դեռ կան Երևանի թաղամասեր, որոնք կոյուղի չունեն:
«Բոլոր գյուղերի և քաղաքների պրոբլեմները, այդ թվում՝ ջրային ոլորտի, կլուծվեն: Կառավարությունը և ես դրա դիմաց մի պայման ունենք. ոչ ոք որևէ գնում անելիս դուրս չի գալիս առանց հսկիչ դրամարկղային կտրոնի»,- ասաց նա:
