Սովորել անկախ ապրել: Զինծառայության ընթացքում հաշմանդամություն ձեռք բերած անձինք ինքնուրույն կենցաղավարման, մասնագիտական կողմնորոշման, կարիերայի պլանավորման հնարավորություն կստանան կյանքի անկախ կենտրոններում: Կառավարության հաստատած սոցիալական այս ծրագրի պատճառը Արցախյան երկրորդ պատերազմը եղավ: Վերականգնողական կենտրոններում բժշկական օգնություն ստանալուց հետո անկախ կյանքի կենտրոնները քաղաքացիներին կսպասեն՝ բոլորովին այլ ծառայություններով ու առաջարկներով:
Աննա Հակոբյան (ԱՍՀՆ հաշմանդամություն ունեցող անձանց հիմնահարցերի բաժնի պետ) - Այս ծառայություններն ընդգրկում են տնային սպասարկման ծառայություններ, կենցաղավարման ծառայություններ, ոչ թե ծառայություններ, այլ նմանատիպ կարողությունները զարգացնելու հմտություններ, որ ստորին կամ վերին վերջույթը կորցրած մարդիկ կարողանան ինքնուրույն հագնվել, հանվել, լվացվել, պատրաստել ինչ-որ մի բան:
Կենտրոններն ունենալու են մասնագիտական թիմեր, որոնք կգնահատեն շահառուների խնդիրները, ցանկությունները, կուղղորդեն ու կօգնեն հաղթահարել դժվարությունները: Կգնահատվեն նաև շահառուների աշխատանքային կարողությունները, իսկ ովքեր կիսատ են թողել կրթությունը՝ կշարունակեն:
Աննա Հակոբյան - Նաև կենտրոնում ձեռնարկատիրական գործունեության հնարավորություններն ենք դիտարկում, որ հենց տեղում, ելնելով նրա նախասիրություններից, կարողություններից, կարողանա որևէ աշխատանք, արհեստով կամ արվեստով զբաղվելու ունակություններ ձեռք բերել: Եվ, ըստ այդմ, մեծ աշխատաշուկա տեղափոխվել, գտնել աշխատանք:
Չեն բացառում նաև, որ կենտրոնների այցելուները ժամանակի ընթացքում կդառնան աշխատակից:
Մարտի վերջի դրությամբ 44-օրյա պատերազմի հետևանքով հաշմանդամություն ստացած 962 անձ կա, որից 1-ին խումբ է՝ 102-ը, 2-րդ՝ 279-ը և 3-րդ խումբ՝ 581 քաղաքացի:
Հենց վիճակագրությունն էլ կհուշի, թե որ մարզերում առաջնային կարգով կկառուցվեն անկախ կյանքի կենտրոնները: Առաջին փուլի համար սոցիալական հարցերի նախարարությունն առանձնացրել է Լոռու, Արմավիրի, Արարատի, Վայոց ձորի մարզերը: Ի դեպ, կենտրոնները կկառուցվեն զրոյից, ոչ թե կվերազինեն հին կառույցները: Այսպես մատչելիության հարցը կլուծեն՝ այնպես կկահավորեն, որ անվասայլակով ելումուտի խնդիր չառաջանա: Ֆինանսավորման մասին.
Աննա Հակոբյան - Միջնաժամկետ ծախսային ծրագրով մենք արդեն հայտ ենք ներկայացրել՝ աշխատակազմի ֆինանսավորման մասով, կենտրոնների կառուցման՝ որպես տարածք կառուցման մասով քննարկում ենք ՄԱԿ-ի գրասենյակների, տարբեր դոնոր կազմակերպությունների հետ, տարածքային կառավարման նախարարության հետ, որպեսզի լավագույն տարբերակները գտնենք շենքային տարածքներն ունենալու համար:
Նախարարությունում պլանավորել են առաջիկա 3 տարում առնվազն 6 նման կենտրոն ունենալ, հիմա փորձում են մինչև տարեվերջ առաջինը կառուցել-բացել: Անկախ կյանքի կենտրոններից զատ, աշխատանքի և սոցիալական հարցերի նախարարությունում ևս մեկ կարևոր ծրագիր են առանձնացնում՝ նպատակային կրթությունը: Հաշմանդամություն ձեռք բերած զինծառայողը պետբյուջեի հաշվին կարող է կրթություն ստանալ, բայց պայմանով՝ մասնագիտություն ձեռք բերելուց հետո վերադառնալ համայնք և զբաղվել այն գործով, որի համար գործուղվել էր կրթություն ստանալու:
