Կառավարությունը հավանություն տվեց Հայաստանի Հանրապետության կառավարության 2020 թվականի մարտի 26-ի N 385-Ն որոշման մեջ լրացումներ և փոփոխություններ կատարելու մասին նախագծին, որը վերաբերում է վարորդական վկայականներին։
«Որոշման նախագծով առաջարկում ենք այս ոլորտում որոշ փոփոխություններ անել։ Ես ուզում եմ հատուկ ընդգծել այն հանգամանքը, որ հաշվառման-քննական ծառայությունների շրջանակներում մենք անընդհատ շարունակում ենք երկխոսությունը քաղաքացիների հետ, և առավելապես քաղաքացիների և նախարարության միջև տեղի ունեցած երկխոսության շրջանակներից դուրս ենք բերում լուծումներ և դրանք արդեն տարբեր փաթեթների շրջանակներում փորձում ենք կարգավորել։
Առաջինը վերաբերում է թվայնացման մեր հանձնառության շրջանակներում այս ոլորտում արդյունավետ կառավարում երաշխավորելուն։ Ինչի՞ մասին է խոսքը։ Այս պահի դրությամբ շատ ենք ունենում դեպքեր, երբ, օրինակ, բժշկական հաստատությունների, կոնկրետ այս դեպքում՝ «Արմեդի» հետ ինտենսիվ կապի բացակայությամբ պայմանավորված, շատ հաճախ մենք շարունակում ենք վարելու իրավունք տալ այն անձանց, որոնք կարող են թմրաբանական կամ հոգեբուժական հաստատությունում հաշվառում ունենալ։ Հընթացս, երբ բացահայտում ենք այդ հանգամանքը, նոր միայն դադարում է վարորդական իրավունքը։ Բայց այս պահի դրությամբ համագործակցություն ենք երաշխավորում «Արմեդի» հետ, երբ կկարողանանք ավտոմատ եղանակով այս հանգամանքները բացահայտել, և անգամ երբ քաղաքացին չի գալիս հաշվառման-քննական ստորաբաժանում, բայց մենք ազդակ ենք ստանում «Արմեդից», սա հիմք է հանդիսանալու իրավունքի դադարման համար։
Երկրորդ փոփոխությունը վերաբերում է տեսական քննությունը հանձնելու դեպքում դրա դրական արդյունքը պահպանելու ժամանակահատվածին։ Այս պահի դրությամբ, տեսական քննությունը դրական հանձնելու դեպքում մեկ տարի ժամանակ ունեն մեր քաղաքացիները՝ գործնական քննությունը հաղթահարելու՝ պահպանելով տեսական քննության արդյունքները։
Պիտի փաստեմ, որ վերջին տարիներին հատկապես բավական մեծացել է հաշվառման-քննական ծառայություններին դիմելու թիվը, աճ ունենք բավականին, և հերթերի կառավարման տեսանկյունից շատ հաճախ այս մեկ տարին բավարար չի լինում անձանց՝ դիմելու և գործնական քննությունը հաղթահարելու համար։ Երկրորդ իրավիճակում շատ են դեպքերը, երբ գործնական քննությունների բազմաթիվ արդյունքներ բացասական են լինում, և կրկին մեկ տարվա ժամանակահատվածը բավարար չի լինում այս տեսանկյունից։ Երրորդ իրավիճակը՝ շատ են դիմում նաև այս առումով քաղաքացիները. մեկ տարվա ընթացքում չեն հասցնում ավարտել ավտոդպրոցներում իրենց ուսումնառությունը և խնդրում են, որպեսզի հետաձգվի քննությունը։ Սա շատ դրական ազդակ է, որովհետև սկսել են ավելի պրոֆեսիոնալ զբաղվել վարորդական ուսումնառությամբ և նոր անցնել քննությունը։ Մենք նախատեսում ենք, որ մեկ տարվա փոխարեն երկու տարի հնարավոր կլինի պահպանել տեսական քննության դրական արդյունքը, հետո արդեն հերթագրվել և գործնական քննության համար օր նշանակել։
Երրորդ փոփոխությունը, որը կրկին գալիս է մեր քաղաքացիներից, վերաբերում է վարելու իրավունքի տեսական քննության հարցաշարերին։ Այս պահի դրությամբ շատ են քննարկումները, որ մենք, օրինակ, թեթև մարդատար ավտոմեքենաների համար նախատեսված վարելու իրավունքի քննության հարցաշարում ներառում ենք նաև ավտոբուսների վարման հետ կապված հարցեր։ Հիմա դարձնում ենք շատ ավելի նույնական․ կոնկրետ կարգին կամ ենթակարգին բնորոշ հարցեր պետք է նախատեսվեն հարցաշարում, ինչը կօգնի մեզ դարձնել ավելի արդյունավետ այս կառուցակարգերը։ Այս փոփոխությունն առաջարկում եմ ուժի մեջ դնել սեպտեմբերի 1-ից, որպեսզի հասցնենք մեր թվային համակարգերը հարմարեցնել այս փոփոխությանը։
Վերջին փոփոխությունը, որը ևս մեր քաղաքացիների հետ երկխոսությունից է ի հայտ եկել։ Վերջերս Ազգային ժողովի կողմից ընդունվեց օրենսդրական նախաձեռնություն, որով փոփոխեցինք վարորդական իրավունքից զրկված անձանց վարորդական իրավունքի վերականգնման մոդելը, և դրա հիման վրա Կառավարության որոշումը պետք է սպասարկի այս օրենսդրական նախաձեռնությունը։ Նախատեսել ենք որոշակի փոփոխություններ, որոնք կօգնեն իմպլեմենտացման փուլը սահուն անցկացնել։ Մեր քաղաքացիները շատ են հետաքրքրվում այս օրենսդրական նախաձեռնության ուժի մեջ մտնելու ժամկետով։ Ես ուզում եմ փաստել, որ հուլիսի 6-ից օրենսդրական նախաձեռնությունն ուժի մեջ է մտնում, և մնացած ընթացակարգերը, որոնք նախատեսված են, մտնում են գործընթացի մեջ, և քաղաքացիները կարող են դիմել՝ իհարկե պահպանելով բոլոր ընթացակարգերը»,- ասաց Արփինե Սարգսյանը՝ նշելով, որ կարող են դիմել, վճարել 50 հազար դրամ և վերականգնել վարորդական իրավունքի վկայականը։
Վարչապետ Նիկոլ Փաշինյանը հայտարարեց, որ վարորդական իրավունքից զրկված անձանց վերաբերյալ նախատեսվող նոր կարգավորումները կվերաբերեն միայն վարչական կարգով զրկման դեպքերին և չեն տարածվի օրինական ուժի մեջ մտած դատավճռով իրավունքից զրկվածների վրա։
«Մենք նախկինում խոսել ենք, որ այն դեպքերում, երբ օրինական ուժի մեջ մտած դատավճիռներով են զրկվել, այս կարգավորումը չի տարածվելու, այսինքն՝ զուտ վարչական կարգով զրկումների վրա է տարածվելու։
Ակնհայտ է, որ մենք պետք է ճանապարհային երթևեկության անվտանգությանն ավելի ու ավելի մեծ ուշադրություն դարձնենք և ունենանք սկզբունքային դիրքորոշում, որովհետև խոսքը մարդկանց կյանքերի մասին է։ Երկրորդը՝ ինձ ուղղված նամակների բովանդակությանը ծանոթանալիս վերականգնվում է այն համոզմունքը, որ նախկինում քննությունները, թեստերը առանձնապես պրակտիկ նշանակություն չեն ունեցել, գուցե այն տրամաբանությամբ էլ գրվել են, որ հնարավոր չլինի դրանք հանձնել, մարդիկ գան, հանգիստ վճարեն, բոլորը գոհ ու երջանիկ լինեն։ Բայց քանի որ մենք հիմա մտել ենք իրական քննությունների փուլ, մարդիկ կան, որ իսկապես նկարագրում են իրավիճակներ, որոնց դեպքում ասում ես՝ այստեղ մի քիչ տրամաբանությունն այն չէ։ Ես ամիսներ առաջ նախարարին հանձնարարել եմ աշխատել, որպեսզի թեստերն ու քննությունների ընթացքը բերենք տրամաբանորեն ճիշտ վիճակի»,- նշեց Նիկոլ Փաշինյանը։
