Գործադիրի նիստը սկսվեց հանձնարարականով: Հայաստան-Թուրքիա հարաբերությունների կարգավորման գործընթացի հատուկ ներկայացուցիչների վերջին հանդիպումից հետո գործնականում պետք է հստակ արդյունքներ լինեն՝ դիմելով նախարարական կաբինետին՝ ասաց Փաշինյանը: Հիշեցրեց, որ հուլիսի 1-ին Ռուբինյանն ու Քըլըչը պայմանավորվել էին սեղմ ժամկետներում Հայաստան-Թուրքիա ցամաքային սահմանը հատելու հնարավորություն ապահովել երրորդ երկրների քաղաքացիների համար և աշխատել այն ուղղությամբ, որ կրկին սեղմ ժամկետներում մեկնարկի Հայաստան-Թուրքիա ուղիղ օդային բեռնափոխադրումների իրականացումը:
Նիկոլ Փաշինյան (ՀՀ վարչապետ) - Հիմա շատ կարևոր է, որ մեր գերատեսչությունները Թուրքիայի համապատասխան գերատեսչությունների հետ աշխատեն, որովհետև քաղաքական պայմանավորվածությունը պայմանավորվածություն, բայց այդ աշխատանքից է կախված դրանց իրագործումը, ու իմ հանձնարարությունն է, որ կոորդինացված աշխատենք՝ հնարավորինս շուտ իրագործելու համար ձեռք բերված պայմանավորվածությունները:
13.3 ՄԼՐԴ ԴՐԱՄ՝ ՇԻՆԱՐԱՐԱԿԱՆ ԱՇԽԱՏԱՆՔՆԵՐԻ ՀԱՄԱՐ
Անցնելով օրակարգին՝ Կառավարությունը 13.3 միլիարդ դրամ հատկացրեց 3 խոշոր ճյուղով շինարարություն իրականացնելու համար: Ոլորտի պատասխանատուն մանրամասնեց՝ գումարից 3.5 միլիարդը կուղղվի Կապսի ջրամբարի կառուցմանը. այժմ փաստաթղթերի ուսումնասիրման փուլն է: Ծրագիրը վարչապետը կարևորեց:
Նիկոլ Փաշինյան - Այնտեղ մենք առաջին անգամ Հայաստանի պատմության մեջ նոր գյուղ ենք կառուցելու: Եվ շատ կարևոր է, որ այս նախագիծը հաջող ընթանա, և մենք 21-րդ դարի գյուղի մոդել կարողանանք այնտեղ ներդնել և քաղաքաշինական նոր մշակույթ բերենք, որը կհամապատասխանի մեր այսօրվա ակնկալիքներին ու պահանջներին:
4.1 միլիարդն էլ՝ Երևանում՝ Արգավանդ-Շիրակ և Բաբաջանյան-Աշտարակ ճանապարհահատվածների շինարարությանը կհատկացվի, ակտիվ աշխատանք է տարվում, դրանք ավարտական տեսքի կբերվեն մինչև տարեվերջ՝ զեկուցեց Սանոսյանը: Վերջին՝ 5.7 միլիարդն էլ կուղղվի 135 կմ ընդհանուր երկարությամբ 10 ճանապարհի միջին նորոգմանը:
Գնել Սանոսյան (ՀՀ տարածքային կառավարման և ենթակառուցվածքների նախարար) - Դրանց մրցութային գործընթացները կավարտեն, և կսկսենք շինարարական աշխատանքները:
26.8 կմ-ը էջմիածինը Արմավիրին կապող ճանապարհն է, Արմավիրն էլ Արագածոտնին կապող 8.5 կմ Շահումյան-Աշտարակ հատվածն է, Գորիս-Քարաշեն-Տեղ՝ 16 կմ, Քաջարան-Մեղրի 3.4, Գյումրիից-Վահրամաբերդ 10 կմ-անոց հատվածը: Ծրագրում ընդգրկվել է՝ Ջրառատ-Մեղրաձոր-Հանքավան 28 կմ հատվածը: Սա վարչապետը կարևորեց որպես Հանքավանի զբոսաշրջային պոտենցիալն ավելացնող օղակ: Կնորոգվեն նաև Սալի-Շատին-Գետափ 14 կմ-ը, Արտենի-Արագածավան 13.5 կմ-ը, 4.6 կմ՝ Ոսկետափ-Վանաշեն-Վեդի ճանապարհը, Ծովագյուղից էլ Սեմյոնոկվկա գնացող 7.7 կմ-ը: Փաշինյանն անդրադարձավ նաև Ստեփանավանի ու Դիլիջանի թունելներին, որոնց համար միջազգային մրցույթ է հայտարարված:
Նիկոլ Փաշինյան - Այստեղ միջազգային բառը շատ կարևոր է. ես խնդիր եմ դրել, որ Ստեփանավանի և Դիլիջանի թունելները պատշաճ տեսքի բերվեն:
ՀԱՆՁՆԱՐԱՐԱԿԱՆՆԵՐ ՆՈՐՈԳՄԱՆ ԱՇԽԱՏԱՆՔՆԵՐԻ ՎԵՐԱԲԵՐՅԱԼ
Թեման շարունակելով՝ վարչապետը մի քանի հանձնարարական էլ տվեց: Նախորդ օրերին տարբեր այցեր է ունեցել, տեսել, որ նորոգման կարիք ունի դեպի Բջնիի ամրոց տանող ճանապարհը: Իսկ Բջնիի Սուրբ Աստվածածին եկեղեցու պատը փլուզման եզրին է:
Նիկոլ Փաշինյան - Ես ԿԳՄՍ նախարարին հանձնարարել եմ, որ մենք իրականացնենք այդ ծրագիրը: Հետո բարեբախտաբար պարզվեց, որ պատրաստի նախագիծ կա, և պետք է ֆինանսավորում ապահովել: Հնարավորինս արագ պետք է խոյակերտ եկեղեցու պատը նորոգենք և նաև հանձնարարականներ եմ տվել Բջնիի ամրոցի հետ կապված, քանի որ դա նույնպես մեր երկրի կարևորագույն պատմական մշակութային հուշարձաններից է: Այնտեղ ճանապարհի խնդիր կա, որը շատ մեծ թեքություն ունի, բայց պետք է ճանապարհը նորոգել, որպեսզի զբոսաշրջային պոտենցիալը ամբողջությամբ իրացվի:
Այժմ նորոգվում է Բջնի-Հրազդան ճանապարհը, որը, Փաշինյանի գնահատմամբ, կակտիվացնի զբոսաշրջային պոտենցիալը Աղվերան-Ծաղկաձոր հատվածում: Հաջորդ տարվա համար էլ, ասաց, կդիտարկվի Աղվերան-Չարենցավան ճանապարհը: Հայաստանի զբոսաշրջային գրավչությունը, վարչապետի կարծիքով, կավելացնի նաև Գագիկ Ծառուկյանի` Հատիս սարի վրա Հիսուս Քրիստոսի արձան կառուցելու նախագիծը: Կառավարության նախնական գնահատականը դրական է, ասաց Փաշինյանը:
Նիկոլ Փաշինյան - Հուսով եմ, որ մեր համապատասխան մարմինները պատշաճ ժամկետներում հարցը կքննարկեն և նախագիծն առաջ կընթանա նախատեսված ձևով:
ՊԵՏԱԿԱՆ ՏՈՒՐՔԻ ԱՐՏՈՆՈՒԹՅՈՒՆ՝ 4 ՄԼՐԴ 162 ՄԼՆ ԴՐԱՄԻ ՉԱՓՈՎ
Ծառուկանին պատկանող «Մուլտի գրուպի» կազմում ընդգրկված «Օնիրա Քլաբ» ընկերության մասին էր հաջորդ նախագիծը: Գործադիրը հաստատեց ու 4 միլիարդ 162 միլիոնի չափով պետական տուրքի արտոնություն տվեց խաղատնային բիզնեսով զբաղվող ընկերությանը: Ֆինանսների փոխնախարարը բացատրեց՝ խնդիրն առաջացել է դեռ 2020-ին, երբ քովիդի պատճառով արգելվեց որոշ տեսակի բիզնեսների, այդ թվում՝ խաղատների գործունեությունը: Չաշխատող խաղատունը պետական տուրքը չի վճարել, իսկ ֆիննախն այդ պատճառով երկրորդ անգամ նրան զրկել է լիցենզիայից։ Ընկերությունը դիմել է դատարան, գործը հասել է մինչև վճռաբեկ, լուծվել հօգուտ «Օնիրա Քլաբի»։ Վարչապետը հստակեցրեց՝ խոսքը պարտավորությունների զրոյացման մասին է:
Նիկոլ Փաշինյան - Եթե մենք հիմա այս կետի վրա կանգնենք, նույն պրոցեսի մեջ ենք մտնելու, փակուղին շարունակվելու է։ Դատական ակտը մեզ վերադարձրել է այն վիճակին, որից սկսվել է այս ամեն ինչը։ Սրա համար երկու տարբերակ կար. կա՛մ պետք է այնպես անենք, որ պատմությունը նորից զրոյից կրկնվի, կա՛մ զրոյացնենք։ Մենք ընտրել ենք երկրորդ տարբերակը։ Մենք հիմա այս որոշմամբ ստեղծում ենք հնարավորություն, որ ընկերությունը հոկտեմբերի 1-ից մաքուր էջից սկսի:
ՏԱՐԿԵՏՄԱՆ ԻՐԱՎՈՒՆՔԸ ԿՎԵՐԱԴԱՐՁՎԻ ԲՈՒՀԱԿԱՆ ՀԱՄԱԿԱՐԳ
Հարցը քննարկվում է թափանցիկ, բաց, որ շահարկումներ չլինեն՝ ասաց վարչապետը: Մեկ այլ նախագծով էլ գործադիրը որոշեց՝ տարկետման ինստիտուտը վերադարձնել բուհական համակարգ: Նախարար Դումանյանը հստակեցրեց՝ ուսումը չընդհատել ու բանակ չգնալ կկարողանան միայն որոշ խմբի ուսանողները, թիրախային մասնագիտություններն ու բուհերը կընտրի Կառավարությունը՝ ըստ իր առաջնահերթությունների: Նախագծով կրթական տարկետում ունեցող ուսանողների զորակոչի տարիքն էլ մեկ տարով կհետաձգվի:
Վահրամ Դումանյան (ՀՀ կրթության, գիտության, մշակույթի և սպորտի նախարար) - Մենք առաջարկում ենք նշված կրթական տարկետում ունեցող ուսանողների զորակոչի տարիքը մեկ տարով հետաձգել՝ մինչև 28 տարեկան, և ուսանողը հանգիստ իր ասպիրանտուրան ավարտի և պաշտպանի թեկնածուական թեզը:
Նախագիծը սպասված է՝ նկատեց նախարարը, վարչապետն էլ շեշտեց՝ պետությունը ներդրում անելով՝ որոշակի պայմաններ կառաջադրի այդ դիմորդների համար՝ օրինակ՝ լուծելու բուհում երիտասարդ դասախոսների կամ հեռավոր գյուղերում ուսուցիչների բացի հարցերը: Դրանք էլ կորոշվեն, իսկ եթե նախագիծն օրենք դառնա, կգործի 2023-ի սեպտեմբերից: