Հակակոռուպցիոն կոմիտեի տարեկան հաղորդման շրջանակում իր ելույթում ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանը ևս անդրադարձավ ընդդիմադիր պատգամավոր Աննա Գրիգորյանի մեղադրանքներին, նրան հորդորեց ԱԺ ամբիոնը չօգտագործել «դեռահասների ֆլիրտին բնորոշ արտահայտությունների համար»:
«Քաղաքականությունը դրա տեղը չի, տիկի՛ն Գրիգորյան: Բայց քաղաքականությունը նաև ստելու տեղը չի: Եկել եք, ամբիոնից հայտարարում եք՝ 2025-ին 1,6 միլիարդ է վերադարձվել»,- հայտարարեց պատգամավորը՝ ներկայացնելով, թե դատարանի վճիռներով որքան գույք ու հողատարածքներ են վերադարձվել պետությանը:
Հերքելով Գրիգորյանի մեղադրանքները՝ Ալեքսանյանը հայտնեց՝ միայն մեկ ծրագրով 5176 բիզնես ստացել է աջակցություն:
«Կարող է գիտեք՝ բոլոր բիզնեսները կա՛մ Քոչարյանինը պետք է լիներ, կա՛մ Քոչարյանի խնամունը, կա՛մ խնամու ծանոթինը: Հազար ներողություն, էս երկրում ուրիշ բիզնես չի՞ կարող լինել: Չի՞ կարող լինել բիզնես, որն ատում է ձեզ, որովհետև դուք իրեն թալանել եք, ստիպել եք, որ լքի հանրապետությունը, որովհետև ժամանակին Քոչարյանի խնամու խնամին ինչ-որ տարօրինակ ձևով է տենդերները շահել»,- ասաց պատգամավորը:
Նրա խոսքով՝ ընդդիմադիրները չեն կարող գալ ամբիոնի մոտ և խոսել թոշակներից, քանի որ նրանց կառավարման տարիներին թոշակները չափազանց քիչ էին:
Ալեքսանյանը 2000 թվականին թվագրվող տեսանյութ ցուցադրեց ամբիոնից, որտեղ մի խումբ թոշակառուներ պահանջում էին թոշակների բարձրացում:
«Սա, ի դեպ այն, ընթացքն է, երբ փոքրիկ իշխանը («Հայաստան» խմբակցության պատգամավոր Լևոն Քոչարյան - խմբ.), դոլարային միլիոնատեր էր արդեն դարձել, բայց դուք եկել եք այստեղ, ասում եք՝ թոշակները.... Ձեզ թվում է՝ դուք կարո՞ղ եք թոշակներից խոսել: Հիմա ՀՀ-ում թոշակառու են այս մարդկանց որդիներն ու դուստրերը: Հիմա գիտեք՝ այդ մարդիկ որքան են ստանում: 3000 դրամ էիք թոշակ տալիս, հիմա նվազագույնը ստանում են 46 հազար դրամ՝ 10 հազար դրամ էլ հետվճարով:
Գիտե՞ք, որ այս մարդիկ միլիոն դրամանոց սրտի, աչքի վիրահատություն են ստանում, առողջապահական ապահովագրություն ունեն: Ձեզ թվում է՝ կարող եք գալ այստեղ ու մարդկանց աչքերին փոշի փչե՞լ: Չեք կարող, որովհետև դուք էս հանրապետության քաղցկեղն եք ձեր ամբողջ կազմով, որ նստած ծծել եք Հայաստանի Հանրապետության արյունը, ՀՀ քաղաքացիների աշխատանքը, նրանց սոցիալական երաշխիքները, ՀՀ քաղաքացիների կյանքը: Դա եք արել, որովհետև ուրիշ բանի ընդունակ չեք»,- ասաց Ալեքսանյանը՝ նշելով՝ ՀՀ քաղաքացին լավ է հասկանում ու ընկալում այդ ամենը:
«Հայաստանի Հանրապետության քաղաքացին հունիսի 7-ին գնալու է ընտրատեղամաս ու բոլորիդ՝ հատ առ հատ ուղարկելու է Դոնբաս՝ հանգստի: Հիմիկվանից ձեր հանգստյան ուղեգրերը վերցրեք»,- խոսքը եզրափակեց պատգամավորը:
