ՀՀ վարչապետ Նիկոլ Փաշինյանը Կառավարության նիստի ժամանակ արձանագրել է, որ 2017-ին փաստացի հարկային եկամուտները եղել են 1 տրիլիոն 158 մլրդ դրամ, այս տարվա միայն ավելացած մասը լինելու է 1 տրիլիոն 542 մլրդ դրամ, ավելացած հատվածը՝ պայմանական ավելացված հատվածը, 384 մլրդ դրամով ավելի է, քան 2017-ի ամբողջ պետական բյուջեն, եկամտային մասը։
Փաշինյանը անդրադարձել է նաև ծախսերին։
«Եկամուտների ծախսումն ապահովում են կառավարությունը և պետական մարմինները։ Հավաքելը աշխատանք է, ծախսելը նույնպես աշխատանք է։ Մենք արձանագրում ենք, որ հավաքելու վրա արվող աշխատանքը կրկնակիից ավելի ավելացել է, որովհետև դա աշխատանք է։ Կառավարության անդամները, իրավապահ մարմինների ներկայացուցիչները, մարզպետները և բացակա բազմաթիվ մարդիկ ջանք են գործադրում, ամենօրյա աշխաատանք են ներդնում սրա համար, այսինքն՝ հավաքագրման աշխատանքը կրկնակիից ավելի ավելացել է:
Կա երկրորդ հատվածը՝ ծախսման աշխատանքը, որովհետև այդ գումարները ծախսել և ջանք գործադրել, որ արդյունավետ ծախսվեն, նույնպես աշխատանք է: Այդ աշխատանքն էլ տրամաբանորեն էլի կրկնակիից ավելի ավելացել է, հետևաբար 2025 թվականին 2017 թվականի համեմատ պետական բոլոր մարմինները 4 անգամ ավելի են աշխատում. կրկնակի ավելացել է ջանքը հավաքելու ուղղությամբ, կրկնակի ավելացել է աշխատանքը ծախսելու ուղղությամբ, ընդ որում՝ շատ կարևոր է արձանագրել, որ 2021 թվականից 2025 թվական, մինչև 2026 թվականը վստահ ենք, այդտեղ որևէ խնդիր չկա: Կառավարությունը և խորհրդարանական մեծամասնությունը կատարել են, այսօր արդեն վստահ կարող ենք ասել, կատարել են տարեկան միջինում 7 տոկոս տնտեսական աճ ապահովելու իրենց խոստումը։ Սա նշանակում է, որ պետական մարմինները լավ են աշխատել։ Սա մեր իրականության մեջ և առավել ևս իմ կողմից հաճախ հնչող գնահատական և նախադասություն չէ, բայց ինչքան էլ ես քննադատաբար վերաբերվեմ, ես ինքս պարտավոր եմ առերեսվել այս իրականությանը: Դա չի նշանակում, որ մեր աշխատանքն անթերի է, բայց երբ մենք այդ թերությունների հետևից գնում ենք, տեսնում ենք, որ այդ թերությունների մի զգալի մասը կախված է այդ թվում այն իրավիճակից, երբ մենք ներդրումներ չենք անում կառավարման որակի բարելավմանը, պետական մարմիններում աշխատանքն առավել գրավիչ դարձնելու և աշխատանքի լրացուցիչ խթաններ և երաշխիքներ ներդնելու ուղղությամբ։
Եթե մենք նման որոշումներ չկայացնենք, նշանակում է, որ Հայաստանի զարգացման ճանապարհին առկա մի կարևոր խոչընդոտ հրաժարվում ենք վերացնել: Դա այն է, որ պետական մարմիններում աշխատանքը պետք է գնալով ավելի ու ավելի գրավիչ և մրցունակ լինի մասնավոր հատվածի հետ, էլ չեմ ասում՝ պետականությունը որպես բացարձակ առաջնահերություն համարելու մեր ռազմավարության շրջանակներում պետական աշխատանքի հարգը պետք է ավելանա շարունակաբար, իհարկե, այն տրամաբանությամբ, ինչպես ես առիթ ունեցա ասելու պետական մարմինների աշխատողների առաջին համաժողովի ընթացքում, մենք պարտավոր ենք յուրաքանչյուր քաղաքացու վերաբերվել որպես գործատուի, բայց էլի ասում եմ, որ սա էլ ունի իր առանձնահատկությունները, շերտերը: Մենք պարտավոր ենք առաջնորդվել այն տրամաբանությամբ, որ պետությունը պետք է ուժեղացնի մարդուն, մարդը պետք է ուժեղացնի պետությանը։
Մենք հիմա շատ մոտ ենք և պետք է մի եզրափակիչ ջանք gործադրենք Հայաստանում ծայրահեղ աղքատությունը վերացնելու ճանապարհին։ Մենք պետք է առերեսվենք այն իրողության հետ, որ ծայրահեղ աղքատությունը վերացնելու ճանապարհին կրթությունը առաջնային ռազմավարություն է»,- ասաց նա։
