2022-ԻՆ ԿԳՄՍՆ ԿԱՊԻՏԱԼ ԾԱԽՍԵՐԸ ԳԵՐԱԶԱՆՑԵԼ ԵՆ 19 ՄԼՐԴ ԴՐԱՄԸ
97.3 տոկոս կատարողական, 9 մլրդ դրամ կապիտալ ծախսերի աճ. ԿԳՄՍ նախարար Ժաննա Անդրեասյանը խորհրդարանում ներկայացրեց 2022 թվականի բյուջեի իր ղեկավարած ոլորտի կատարողականը, նշեց՝ 2021 թվականի նկատմամբ բյուջեն 16 տոկոսով աճել է:
Ժաննա Անդրեասյան (ՀՀ ԿԳՄՍ նախարար) - 2022թ կապիտալ ծախսերի մասով կարողացել ենք հասնել 19 մլրդ 357 մլն դրամի, և սա բավականին լուրջ առաջընթաց է՝ 2021թ իրականացված գործընթացների համեմատությամբ
ԳԻՏՈՒԹՅԱՆ ՈԼՈՐՏՈՒՄ ՆԵՐԴՐՈՒՄՆԵՐԻ ԱՐԴՅՈՒՆՔՆԵՐԸ
Խորհրդարանականները նախարարից հետաքրքրվեցին՝ որքանով է արդյունավետ ծախսվում ավելացվող բյուջեն, ինչ արդյունք կա:
Գևորգ Պապոյան (ՀՀ ԱԺ Ֆինանսավարկային և բյուջետային հարցերի մշտական հանձնաժողովի նախագահ) - Ինչ օգուտ է պետությունը ստացել. օրինակ` 24 մլրդի, 240 մլդրի, թե 12 մլն դրամի, գրված է ընտրված կազմակերպությունների թիվ` 67, ինչ է սա ասում` 12.5 մլրդ փողը տվել են 67 կազմակերպության, բայց ինչ արդյունք է ստեղծվել:
Գիտությանն ուղղված դրամաշնորհային ծրագրերը մեկ տարվա համար չեն, այլ՝ 3-5, արդյունքները դեռ պետք է երևան, պատասխանեց նախարարը, բայց մատնանշեց, որ գիտության ոլորտին տրամադրվող դրամաշնորհների 70 տոկոսին մասնակցել են երիտասարդ գիտնականներ, իսկ գիտության շարունակական զարգացման համար սերնդափոխությունն անհրաժեշտ պայման է, ինչպես նաև ոլորտում ներգրավել են արտերկրի գիտական ներուժը, ինչը գիտությունը մրցակցային է դարձրել:
Ժաննա Անդրեասյան - Ամենախոշոր արդյունքներց մեկը, որ պետք է լինի, մեր երկրում գիտության որակի բարձացումն է, և դա մի պարզ թվով երևում է, «Հորիզոն Եվրոպայի» ցուցանիշն եմ ուզում բերել: Մեր շարունակական աշխատանքի հետևանքով մեր գիտական կազմակերպությունների կարողությունները զարգացել են և նրանք կարողացել են վերջին 2 տարիներին ներգրավել այնքան միջոցներ՝ մոտավորապես 2.9 մլն եվրո, ինչքան նախկինում չեն կարողացել ներգրավել շուրջ 7 տարում:
ՀՀ ԴՊՐՈՑՆԵՐԻՑ ԱՐՑԱԽԻ ԴՐՈՇԸ ՀԱՆԵԼՈՒ ՈՐԵՎԷ ՀՐԱՀԱՆԳ ՉԻ ԵՂԵԼ. ՆԱԽԱՐԱՐ
Ընդդիմադիր պատգամավորները հետաքրքրվեցին, թե ինչու է երևանյան դպրոցներից մեկի տնօրենը դպրոցից հեռացրել Արցախի դրոշը: Հայաստանի դպրոցներից Արցախի դրոշները հանելու որևէ հրահանգ չի եղել, վստահեցրեց նախարարը, ավելացրեց, որ միակ հրամանը եղել է «Դրոշի մասին» օրենքին հետևելը, այսինքն՝ Հայաստանի խորհրդանիշը լինի մաքուր և չգունաթափված:
ՆԱԽԱՐԱՐԻ ԱՆԴՐԱԴԱՐՁԸ «ՀԱՅՈՑ ԵԿԵՂԵՑՈՒ ՊԱՏՄՈՒԹՅՈՒՆ» ԱՌԱՐԿԱՅԻՆ
Դպրոցում «Հայոց եկեղեցու պատմություն» առարկայի դասավանդման մասով Եկեղեցու դիրքորոշմանը նախարարությունը հարգանքով է վերաբերվում: Սակայն նախարարի պնդմամբ՝ մասնագիտորեն հիմնավորված չէ այն մտավախությունը, թե առանձին առարկա չունենալը որևէ կերպ կվտանգի կարևոր գիտելիքներն ու արժեքները: Գիտելիքը ներառվում է «Պատմություն», արժեքները՝ «Հասարակագիտություն» առարկաների ծրագրերում:
ՀՌՀ-Ն ՆԵՐԿԱՅԱՑՐԵԼ Է 2022-Ի ՖԻՆԱՆՍԱԿԱՆ ՀԱՇՎԵՏՎՈՒԹՅՈՒՆԸ
Օրենսդիր իշխանությանը ֆինանսական հաշվետվությունը ներկայացրեց Հեռուստատեսության և ռադիոյի հանձնաժողովը. 2022 թվականին իրականացրել են 1 ծրագիր՝ 3 միջոցառումով՝ 325 մլն դրամ բյուջեով։
Տիգրան Հակոբյան (ՀՌՀ նախագահ) - Բյուջեն կատարվել է 99,6 տոկոսով, մենք վերադարձրել ենք բյուջե մուտ 12 մլն դրամ:
Հանրային հեռարձակողի խորհրդի նախագահ Արա Շիրինյանն էլ նշեց, որ յուրաքանչյուր տարվա բյուջետային հատկացումները չեն գերազանցում նախորդ տարվա ֆինանսական հատկացումները: Շիրինյանի գնահատմամբ՝ հանրային հեռարձակողը տեղակատվական անվտանգության առաջին երաշխավորն է:
Արա Շիրինյան (Հանրային հեռարձակողի խորհրդի նախագահ) - Առանց հանրային հեռարձակման` ՀՀ բնակչությունը տեղակատվական իմաստով կենթարկվեր և ենթարկվել է, կան առանձին օրինակներ, տեղակատվական ահաբեկչության: Կանոնավոր լրատվություն, տեղակատվություն, ամբողջական, որը շարադրի փաստեր և կհիմնավորի, ՀՀ-ում գրեթե չկա լրատվամիջոց, բացի «Հանրային ՀԸ»-ից, որը դրանով զբաղված է, մեր ամբողջ մամուլն այսօր պարտադրում է կարծիք:
ԱՆԴՐԱԴԱՐՁ ՀԱՅԿԱԿԱՆ ՖԻԼՄԵՐԻ ԹՎԱՅՆԱՑՄԱՆԸ
Ընդդիմադիր պատգամավոր Լիլիթ Գալաստյանը հայկական ֆիլմերի թվայնացումից հետաքրքրվեց: Հարցին Հանրային հեռուստաընկերության գործադիր տնօրենը պատասխանեց:
Հովհաննես Մովսիսյան (Հանրային հեռուստաընկերության գործադիր տնօրեն) - «Հայֆիլմի» մասով մենք պատասխանատու չենք՝ Կինոկենտրոնին է պատկանում արխիվը, բայց որոշ մասով համագործակցում և թվայնացումն իրականացնում ենք: Իրավիճակն այլ է «Երևան» կինոստուդիայի մասով՝ մեր տիրույթում է, քանի որ մեզ է պատկանում արխիվը, մենք այս մասով թվայնացումն իրականացնում ենք, ուրախությամբ կարող եմ ասել, որ արխիվում գտնում են չմոնտաժված ու չավարտված ֆիլմեր, որոնք գանձեր են ու 100 ամյակի հետ կապված` պլանավորում ենք դրանց ցուցադրությունը:
2015 թվականից մինչև օրս Հանրային հեռուստաընկերության բյուջեն չի փոխվել, տեխնիկապես որոշակի վերազինման համար հեռուստաընկերությունը վարկային միջոցներ է ներգրավել:
Հեղինակ` Անի Օհանյան
