Ընդունելության քննությունների արդյունքները՝ հատկապես «Հայոց լեզու և հայ գրականություն» առարկայից, վերջին օրերին դժոգոհությունների պատճառ են դարձել: 565 աշակերտ անբավարար է ստացել մայրենի լեզվի քննությունից: Քննարկում են, թե վատ արդյունքների պատճառը վատ թեստերն են: Կրթության փորձագետ Արամ Փախչանյանն ասում է՝ ընդունելության այդ թեստերն աշխարհում անորակ են համարվում: Դրանք պարզապես աշակերտի սխալը բռնացնելու համար են: Կարծում է՝ վատ արդյունքների պատճառը միայն թեստերը չեն, Հայաստանում կրթության ոլորտում լճացում է, կրթության որակի նվազում:
Արամ Փախչանյան, կրթության փորձագետ - Կա չափորոշիչ, որի մասին ուսուցիչները տեղեկացված չեն՝ բովանդակային առումով: Կան դասագրքեր, որոնք չեն համապատասխանում ծրագրին: Կան քննություններ, որ չեն համապատասխանում ո՛չ կրթական ծրագրին, ո՛չ կրթությանը:
Քննություններին մասնակցելու համար՝ դպրոցականը պետք է պարապի, սակայն պատրաստվի նաև կրթական գործընթացի միջոցով՝ ասում է փորձագետը:
Արամ Փախչանյան - Մեզ մոտ, ցավոք, կրթական համակարգի տրամաբանությունը միշտ եղել է անգիրը: Ուսուցիչը լավագույն դեպքում ցանկացել է, որ երեխան վերարտադրի իր կարդացածը: Դա չի բերում զարգացում: Բոլորը կրթության մեջ պետք է զարգանան: Դա նշանակում է, որ ուսուցիչը պետք է խթանի զարգացումը երեխայի մեջ, ոչ թե պահանջի հստակ իմացություն, անգիր արած թեմա:
Կրթության, գիտության, մշակույթի և սպորտի փոխնախարարն ասում է՝ հայոց լեզվի քննությունից գրանցած արդյունքները խիստ չեն տարբերվում նախորդ տարիներից: Խնդիրը մշտապես առկա է եղել: Կարծում է՝ այս ու շատ այլ խնդիրներ կարող է լուծել Հանրակրթական չափորոշիչների փոփոխությունը: Այն այս տարի փորձարկվելու է Տավուշի մարզում:
Ժաննա Անդրեասյան, ԿԳՄՍ փոխնախարար - Նոր չափորոշիչներով մենք խնդիր ենք դրել, որ լեզվի ուսուցումը պետք է էապես բարելավվի նաև մյուս առարկաների ընթացքում: Մենք լեզվամտածողություն ենք ձևավորում՝ ինչպես են աշակերտները պատմում հայոց պատմությունը, ինչպես են իրենց միտքը ձևակերպում:
Փոխնախարարը շեշտում է՝ խնդիրները պետք է համակարգային լուծում ունենան: Նոր չափորոշչով դասավանդելու համար կվերապատրաստվեն ուսուցիչները, որը ևս կնպաստի որակի բարելավմանը: Կլինեն միջառարկայական կապեր: Մեկ այլ ծրագիր կա, ցանկանում են հավելյալ աշխատել կարիք ունեցող աշակերտների հետ:
Ժաննա Անդրեասյան - Կարծում ենք, որ երկարօրյա ծառայությունը պետք է լինի պարտադիր ցածր առաջադիմություն ունեցողների համար: Պետությունը աջակցություն պետք է տրամդրի ֆինանսական իմաստով:
Կրթության փորձագետը հավատում է, որ կրթական բարեփոխումներն օգուտ կտան, սակայն բավական չեն: Ըստ նրա՝ պետք է լինի համայնքային ներգրավածություն՝ պետության մասնակցությամբ: Պետք է փոխվեն ուսուցիչների պատկերացումները, դպրոցում կառավարման մոտեցումները, սկզբունքները, կրթական տրամաբանությունը: Կարևորը չլինի լճացում, այլ զարգացում:
Արամ Փախչանյան - Պետք է իրատես լինենք, իրատեսական նպատակներ դնենք, չկանգնենք, չհիասթափվենք, գնանք առաջ: Երևի թե 15-20 տարում կունենաք աշխարի լավագույն համակարգերից մեկը:
Այն, որ փոփոխությունը միանգամից չի լինի, համաձայնում է փոխնախարարը: Փորձելու են դպրոցականների խնդիրները լուծել տարվա ընթացքում: Օրինակ՝ հատուկ համակարգի միջոցով պարզելու են աշակերտների բացակայությունների պատճառը:
