Ազգային ժողովը անցնող շաբաթ, առանց ընդդիմության աջակցության, 82 կողմ ձայնով ընդունեց Ընտրական օրենսգրքում փոփոխությունների նախագիծը։ Հանվեց 2016 թվականին ներդրված ռեյտինգային ընտրակարգը, որով քաղաքացիները, բացի կուսակցություններից, հնարավարություն ունեին քվեարկեու նաև տվյալ ընտրատարածքում առաջադրված կոնկրետ թեկնածի օգտին։
Այսպիսով, առաջիկա արտահերթ ընտրությունը կանցկացվի պարզ համամասնական ընտրակարգով, քաղաքացին ընտրատեղամասում կընտի միայն քաղաքական ուժին: Նախագծի համահեղինակ, տևական ժամանակ ընտրական ռեֆորմները համակարգող Համազասպ Դանիելյանի գնահատմամբ՝ արված փոփոխությամբ ընտրությունները կդառնան ավելի քաղաքական, ծրագրակենտրոն:
Համազասպ Դանիելյան (ԱԺ «Իմ քայլը» խմբակցության պատգամավոր) - Պարզ համամասնական ընտրակարգը թիվ մեկ պարզ լուծումն է, որ մեր ընտրություններն ավելի է մոտեցնելու այն նշաձողին, որ ՀՀ կուսակցությունների մեծամասնությունը, 90-ականններից սկսած, ակնկալում էր ունենալ:
Ընտրական փոփոխությունների ամբողջական փաթեթը ուղարկվել է Վենետիկի հանձնաժողով, որը հատուկ ընթացակարգով կքննարկի և մինչև ապրիլի 20-ը Հայաստանին կտրամադրի նախագծի վերաբերյալ եզրակացություն: Այդ ժամանակ էլ խորհրդարանը կքննարկի ամբողջ փաթեթը:
Համազասպ Դանիելյան - Մենք այդ մեծ փաթեթից առանձնացրել ենք առանցքային մասը, որի շուրջ մեծ կոնսենսուս կա և դա փորձել ենք հնարավորինս շուտ ընդունել, որպեսզի քաղաքական խաղացողների համար պարզ լինի, թե ինչ խաղի կանոններով են տեղի ունենալու սպասվող ընտրությունները:
Պարզ համամասնականի անցնելու սուր քննադատներից «Լուսավոր Հայաստանը» չմասնակցեց քվեարկությանը: Ըստ խմբակցության քարտուղարի՝ փոփոխությունն արվել է, որ «Իմ քայլը» խորհրդարանում ունենա ոչ թե պատգամավորներ, այլ կոճակ սեղմողներ:
Գևորգ Գորգիսյան (ԱԺ «Լուսավոր Հայաստան» խմբակցության քարտուղար) - Այս մթնոլորտում չի լինելու գաղափարական պայքար, լինելու է հակառակը՝ մարդիկ ընտրելու են վարչապետ և նա նշանակելու է պատգամավորներ, այսինքն՝ երկրի միակ ներկայացուցչական մարմինը այլևս կապ չի ունենալու քաղաքացիների հետ:
«Լուսավորը» համարում է, որ արտահերթ ընտրությունից առաջ խաղի կանոնների փոփոխությունը կասկածի տակ է դնելու նոր ձևավորվելիք խորհրդարանի լեգիտիմությունը: Բացի այդ, Գորգիսյանի պնդմամբ, շատերը սկսել էին պատրաստվել ընտրության գործող կանոններով:
«Խաղի կանոններ, իհարկե, փոխվում են, բայց խաղի վատ կանոններն են փոխվում»,- ասում է «Թրանսփարենսի Ինթերնեշնլ» հակակոռուպցիոն կենտրոնի գործադիր տնօրեն Սոնա Այվազյանը: Նրա գնահատմամբ՝ ամբողջ գործընթացը պարզեցված կլինի բոլոր դերակատարների համար: Խաղի կանոնների փոփոխության մասին դժգոհություններն էլ, ըստ Այվազյանի, չափազանցված են:
Սոնա Այվազյան («Թրանսփարենսի Ինթերնեշնլ» հակակոռուպցիոն կենտրոնի գործադիր տնօրեն) - Գործընթացն ավելի հեշտացվում է, շատ ավելի ազնվացնում է, ոչ թե փչացնում է:
Այվազյանը հույս ունի, որ կառավարող ուժը չի բավարարվի միայն այդ դրույթի ընդունմամբ և Եվրոպայի խորհրդի փորձագիտական մարմնի կարծիքը ստանալուց հետո, արտահերթին ընդառաջ, այլ փոփոխություններ էլ կիրականացնի:
Իսկ արդեն արված փոփոխությամբ, ընտրությունների որակը, Սոնա Այվազյանի կարծիքով, նկատելի կփոխվի: Մինչև այժմ գործող ռեյտինգայինի դեպքում յուրաքանչյուր ուժ, բացի կուսակցական ցուցակից, 13 ընտրատարածքում պետք է ունենար առնվազն հինգ թեկնածու: Պայքարը, ընդ որում, ընթանում էր ոչ միայն այլ ուժերից առաջադրված թեկնածուների, այլև նույն ուժի անդամների միջև:
Ազգային ժողովի ընդունած փոփոխությունը ուժի մեջ կմտնի ՀՀ նախագահ Արմեն Սարգսյանի ստորագրելուց հետո:
