Համայնքների խոշորացման ծրագրով 2021 թվականին Լոռու մարզի Դսեղ, Չկալով և Ձորագետ համայնքները կմիավորվեն Թումանյան խոշորացված համայնքին: Միավորմանը, սակայն, դեմ են դսեղցիները, Դսեղի ավագանին և, հատկապես, համայնքի ղեկավարը:
Գառնիկ Հովսեփյան, Դսեղի գյուղապետ - Մենք, եթե համեմատում ենք մեր ցուցանիշները Թումանյան խոշորացված համայնքի հետ, մերն առավել է՝ հիմնականում հարկերի հավաքագրումն օրինակ բերեմ: Անցյալ տարի 100 տոկոս է եղել մերը, որքան որ տեղյակ եմ՝ Թումանյան խոշորացված համայնքում շատ ավելի ցածր:
Թումանյան արդեն խոշորացված համայնքի կազմում են Թումանյան քաղաքն ու վեց փոքր գյուղ՝ Աթան, Շամուտ, Լորուտ, Մարց, Քարինջ ու Ահնիձոր: Անասնապահությամբ զբաղվող այս գյուղերի և Դսեղի զարգացման հեռանկարներն ու հնարավորությունները տարբեր են: Դսեղում բազմաթիվ հյուրատներ են բացվել, մեծ հյուրանոց է կառուցվում, հանգստի ու ժամանցի գոտիներ: Ամռան ամիսներին այստեղ մինչև 100 000 զբոսաշրջիկ է այցելում, հովեկներ են գալիս հանգստանալու: Մեկ համայնքում միավորվելը կնվազեցնի Դսեղի զարգացման տեմպերը՝ անհանգստանում են այստեղ:
Գառնիկ Հովսեփյան - Ես այս պահին ավելի շատ արտահայտում եմ մեր քննարկումը, որ արել ենք ավագանու և բնակիչների հետ, որոնք խնդրել եմ փոխանցել կառավարությանը, որ լսեն բնակիչների ձայնը:
Դսեղում կարծում են՝ ճիշտ կլինի համայնքին հատուկ կարգավիճակ տրվի մի շարք պատճառներով:
Էդուարդ Շեկոյան, Դսեղի դպրոցի տնօրեն - Կոնկրետ մեր համայնքի պարագայում ճիշտ կլիներ, որ հատուկ կարգավիճակ տրվեր, քանի որ այն մշակութային և հոգևոր կարևոր նշանակություն ունի և ճիշտ կլիներ, որ մոտեցումը մի փոքր այլ լիներ:
Էդուարդ Շեկոյանը նման խոշորացման դեպքում նաև համայնքների շահերի բախման խնդիր էլ է տեսնում: Փոքր ու լեռնային գյուղերի շահերը ստորադասվելու են Դսեղի ու Թումանյան քաղաքների շահերին: Թումանյանի տուն թանգարանում էլ կարծում են, որ Դսեղի նման համայնքների նկատմամբ վերաբերմունքն այլ պիտի լինի:
Վերա Աղաջանյան, Հովհաննես Թումանյանի Դսեղի տուն թանգարանի ֆոնդապահ - Դսեղը զբոսաշրջային կենտրոն է, թանգարան են այցելում տարբեր երկրներից զբոսաշրջիկներ, լրագողներ, որոնց կապը պետք է լինի նաև գյուղապետարանի հետ:
Ի դեպ, թանգարան այցելողները կարիք են ունենում գործուղման թերթիկներ կնքել, մինչև հիմա նրանց ուղղորդել են գյուղապետարան: Այսուհետ ստիպված են լինելու ուղղորդել 40-50 կմ հեռու նոր համայնքային կենտրոն: Իսկ գյուղապետն էլ նշում է, որ ամեն տարի նաև տասնյակ արտակարգ դեպքեր են լինում, երբ գյուղապետարան օպերատիվ արձագանքում է զբոսաշրջիկների հետ կապված արտակարգ դեպքերին:
Գառնիկ Հովսեփյան - Շատ են դեպքեր եղել, հանգստի գոտում հանգստացողների հետ են դեպքեր եղել կամ Սուրբ Գրիգոր եկեղեցում են մարդիկ մնացել՝ ճամփա չիմանալու պաատճառով, բայց մենք մեր աշխատակիցներով ձորից հանել ենք վնասվածք ստացած մարդկանց:
Իր ղեկավարած համայնքը Դսեղին միավորելուն դեմ է նաև Թումանյան համայնքի գործող ղեկավարը, թեպետ որոշել է առաջիկա ընտրությանը չառաջադրվել:
Լևոն Զավարյան, Թումանյան խոշորացված համայնքի ղեկավար - Ձորագետը Թումանյանին միանալու խնդիր չի լինի, Ձորագետը խնդիր չի ունենա, բայց Դսեղն ու Չկալովը միացնելով՝ օգուտ չեն բերի, քանի որ ժամանակին Դսեղը եղել է վեց գյուղերի կենտրոն: Ես, օրինակ, այդ աստիճանի խոշորացմանը դեմ եմ:
Թումանյանը մեր երկրում առաջին խոշորացված համայնքն է: Ի սկզբանե նախատեսվում էր, որ իր շրջակա այլ գյուղերի հետ Դսեղն ինքը կհանդիսանա խոշորացված համայնքի կենտրոն: Բայց Դսեղի գյուղապետին ՏԿԵ փոխնախարարն ասել է, թե այն ժամանակ սխալվել են՝ այդպես մտածելով:
