Բրիտանական հակահետախուզության նախկին ղեկավար Ռիչարդ Դիրլավը հայտնի Daily Mail պարբերականի էջերում հիշատակել է Բեռլինի պատի անկման 30-ամյակի տոնակատարությունները և վերապրել այն հուզական վերելքը, որ ժամանակին առաջացրել էր այս իրադարձությունը:
«Արևելյան Գերմանիան տեղափոխվեց ազատ արևմուտք: Ռեպրեսիվ բռնատիրությունը, որ տևեց 45 տարի, հասավ իր դրամատիկ ավարտին»,- գրել է Դիրլավը՝ նշելով, որ հետո «գաղտնի ոստիկանության արխիվներում հետո արդեն յոթ մղոնանոց փաստաթղթեր հայտնաբերվեցին՝ մարդու իրավունքների համակարգված զանգվածային խախտումների վերաբերյալ»:
«Ես ապրում ու աշխատում էի երկաթյա վարագույրի ետևում: Մեզնից նրանք, որոնք անձամբ են դիմակայել Սառը պատերազմին, պարտավո՛ր են նախազգուշացնել երիտասարդ սերնդին այնպիսի կոմունիստական ռեժիմներից եկող վտանգների մասին, ինչպիսին՝ Արևելյան Գերմանիայի ռեժիմն էր»,- անկեղծացել է MI-6-ի նախկին ղեկավարը և մտահոգություն հայտնել առ այն, որ «խորհրդարանական ժողովրդավարության ծննդավայր Բրիտանիան» ներկայում հայտնվել է վտանգավոր խաչմերուկում:
Ինչու՞. որովհետև, շատ հնարավոր է, որ ժամանակին Արևելյան Գերմանիայի քաղաքական ու տնտեսական կառավարման մոդելին հավանություն տված լեյբորիստ Ջերեմի Քորբինը Բրիտանիայի նոր վարչապետը դառնա:
«Ի՞նչ է սա՝ գիշերային մղձավա՞նջ, ֆանտաստիկ հորինվա՞ծք: Ցավոք՝ ո՛չ: Պարզապես նայեք Ջերեմի Քորբինի երկու հիմնական խորհրդականների գրառումները»,- խորհուրդ է տալիս հեղինակը՝ ակնարկելով Էնդրյու Մյուրեյին, որ երկար տարիներ եղել է Մեծ Բրիտանիայի Կոմունիստական կուսակցության նշանավոր անդամ, և Շեյմաս Միլնենին, որը ջանասիրաբար աջակցում է ծայրահեղական քաղաքական շարժումներին՝ նպատակն արդարացնում է միջոցները տրամադրվածությամբ:
Դիրլավը նշում է, որ 38 տարի MI-6-ում անցկացնելով, պայքարելով սովետական կայսրության և ահաբեկիչների դեմ՝ միշտ տեսել է, որ Լեյբորիստներն ու Պահպանողականները երբեք կոմպրոմիսի չեն գնացել ազգային շահերն առաջ տանելու հարցում, երբեք չեն կասկածել պայքարի կարևորության մեջ, որովհետև գիտակցել են, որ անվտանգությունը քաղաքական կուսակցության խնդիր չէ, և այդ պատճառով են կառավարությունները փոխարինվել, բայց գաղափարների նվիրվածությունը կասկածի տակ չի դրվել:
«Այսօր ամեն ինչ այլ է: Քորբինը և նրա մերձավոր գործընկերները վարկաբեկված են իրենց անցյալով…նույնիսկ մտքներովդ չանցկացնեք վարչապետի նստավայրի բանալիներն այդ քաղաքական գործչին հանձնել: Այս բարեհամբույր, տեսքից քաղաքավարի ծերուկն ամենևին էլ այն չէ, ինչ ինքը կցանկանար ներկայանալ»,- համոզված է MI-6- ի նախկին ղեկավարը:
