Կառավարությունը ձեռք է բերել աշխարհահռչակ ամերիկահայ նկարիչ Արշիլ Գորկու «Անվերնագիր» (1944 թ․) գրաֆիկական աշխատանքը:
«Շնորհավորում եմ բոլորիս այսօրվա առիթով, որովհետև Արշիլ Գորկին համաշխարհային կերպարվեստի նշանակալի դեմքերից մեկն է և իհարկե հայկական կերպարվեստի կամ հայկական ծագում ունեցող կերպարվեստի նշանակալի դեմքերից մեկն է»,- Հայաստանի ազգային պատկերասրահում ասաց վարչապետ Նիկոլ Փաշինյանը:
«Այսօրվա մեր միջոցառումը և Կառավարության որոշումը ունեն մի քանի նշանակություն, և բոլոր այդ նշանակություններն իհարկե կապված են հետևյալի հետ: Մենք շատ ենք խոսում նրա մասին, որ պետությունը, պետականությունը, ՀՀ-ն պետք է և է հայկական կյանքի առանցքը և գրավիտացիոն կենտրոնը լինի: Գիտեք՝ մեր ժողովուրդը պատմության տարբեր էջեր է ունեցել, երբեմն հայկական իրականության կենտրոնը եղել է Մադրասը, երբեմն՝ ինչ-որ ժամանակում, հայկական իրականության կենտրոնը եղել է Ստամբուլը, երբեմն՝ ինչ-որ ժամանակում, հայկական իրականության կենտրոնը եղել է Թիֆլիսը, ինչ-որ ժամանակ՝ Վենետիկը և այլն: Կարող ենք էլի քաղաքներ, կենտրոններ թվարկել, մենք ասում ենք, որ հայկական իրականության և կյանքի կենտրոնը բոլոր առումներով՝ մշակութային, գաղափարաբանական, գաղափարախոսական, ՀՀ-ն է, և այս իրադրությունը, որը կա և պետք է զարգանա, պետք է հարատև լինի և ոչ թե ժամանակավոր, և Արշիլ Գորկին, ում ծննդյան վայրը, ինչպես այսօր Վիքիպեդիայում նայեցի, նշվում է Օսմանյան կայսրությունը, մահվան վայրը ԱՄՆ-ն է, մենք այսօրվա միջոցառմամբ ուզում ենք ևս մի այսպիսի սիմվոլիկ ազդարարում անել այն մասին, որ մենք դուրս պետք է գանք և մենք դուրս ենք գալիս պանդխտության, գաղթականության ցիկլից, և հայկական արվեստի ստեղծած կրիտիկական զանգվածը և մշակութային ժառանգությունը պետք է լինի Հայաստանի Հանրապետությունում: Սա առանձին վերցրած միջոցառում չէ: Մենք վերջերս Պատմության թանգարանում ունեցանք այսպիսի շատ կարևոր իրադարձություն: Մենք Մատենադարանում արդեն երկու անգամ նշել ենք այդպիսի իրադարձություն, մենք Ազգային պատկերասրահում այսօր նշում ենք այսպիսի իրադարձություն, և իհարկե սա ամենակարևոր պետական և քաղաքական խնդիրն է, որը մենք լուծում ենք, և թվարկումը նրա մասին է, որ սա առանձին վերցրած միջոցառում և գործողություն չէ, սա քաղաքականություն է, որը մենք որդեգրել ենք: Որտեղ մենք տեսնենք այդ հնարավորությունը, օգտագործելու ենք հայկական ծագման ժառանգությունը՝ մշակույթի, արվեստի, ՀՀ բերելու և որպես հարատև հանգրվան այդ արժեքների համար, և սա լինելու է շարունակական, և կրկին ուզում եմ ասել՝ այս առիթով մենք 30 մլն դրամ ենք հատկացրել, նախորդիվ էլ նշվել է, թե ինչ միջոցներ ենք հատկացրել, և ուզում եմ կրկին շնորհակալություն հայտնել Հայաստանում աշխատող, արդյունք ստեղծող օրենքով սահմանված հարկերը վճարվող քաղաքացիներին, այն քաղաքացիներին, ովքեր տնտեսական գործունեություն չեն ծավալում, անհատ ձեռներեց կամ բիզնեսմեն չեն, բայց ամեն անգամ ցանկացած գնում կատարելիս հարկ են համարում իրենց հետ վերցնել ՀԴՄ կտրոն:
Ես ուզում եմ՝ մենք բոլորս լավ պատկերացնենք, թե ինչպես է Արշիլ Գորկու կտավը հայտնվել ՀՀ-ում: ՀՀ հազարավոր քաղաքացիներ իրենց ամենօրյա գնումները անելիս չեն մոռացել վերցնել կամ տրամադրել հսկիչ դրամարկղային կտրոն: Այդ կտրոնից 5 դրամ, 10 դրամ, 15 դրամ, 1000 դրամ կուտակվել է ՀՀ պետական բյուջեում և տնտեսվարողների վճարած հարկերից, առանձնահատուկ շնորհակալություն խոշոր հարկ վճարողներին, կուտակվել է ՀՀ պետական բյուջեում, և ՀՀ Կառավարությունը հնարավորություն է ունեցել միաժամանակ ներդնել առողջության ապահովագրության համակարգ, որը տասնյակ միլիարդ դրամների ծախս է ենթադրում բյուջետային, հնարավորություն է ունեցել բարձրացնել կենսաթոշակները, հնարավորություն է ունեցել կամավոր ատեստավորման միջոցով բարձրացնել ուսուցիչների աշխատավարձերը, գիտության և գիտնականների ֆինանսավորումը, բանակի ֆինանսավորումը և սպառազինությունների ձեռքբերումը և այլն: Եվ չի ասել՝ Արշիլ Գորկու կտավ առնելու ժամանակ չէ, որովհետև պետության առաջ այնքան խնդիրներ կան, որ մենք չենք կարողանում լուծել, ո՛չ, մենք խնդիրները կարողանում ենք լուծել, և այդ խնդիրներից է նաև Արշիլ Գորկու կտավի վերադարձը, մեր ձեռագիր հուշարձանների վերադարձը, մեր եկեղեցիների դռների վերադարձը և այլն: Եվ ուրեմն, բարով ես եկել ՀՀ, հարգարժան Արշիլ Գորկի, ի վերջո, երկարատև ճանապարհորդությունից հետո այս կտավը գտնվում է ամենաճիշտ տեղում:
Ընդհանրապես շատ է խոսվում այն մասին, որ Հայաստանի Կառավարությունը դանդաղ է գործում, բայց ես ուզում եմ ասել, որ այս դեպքում Կառավարությունը որոշումներ կայացրել է հաշված ժամերի ընթացքում, որովհետև եթե հաշված ժամերի ընթացքում այդ որոշումները չկայացնեին, այդ բոլոր արժեքները աճուրդից ուրիշ գնողներ կգտնվեին: Մենք ամենաարագ ձևով այդ որոշումները կայացրել ենք, սա ևս մեկ անգամ ցույց է տալիս, որ այնտեղ, որտեղ պետք է գործել շատ արագ, մենք գործում ենք շատ արագ, այնտեղ, որտեղ պետք է յոթ անգամ մտածել, մենք մտածում ենք յոթ անգամ»,- նշեց վարչապետը:
