Վազգեն Սարգսյանի անվան ռազմական ակադեմիայում փոխվել են կրթական ծրագրերը։ Այս մասին ֆեյսբուքյան իր էջում հրապարակված տեսանյութերի միջոցով հայտնում է նախարար Սուրեն Պապիկյանը։
«Մեզ մոտ կուրսանտը կարող է սովորել մի շարք լեզուներ, մասնավորապես կրթական ծրագրում կան ռուսերեն, անգլերեն, ֆրանսերեն, ադրբեջաներեն, թուրքերեն լեզուներ, ինչպես նաև համալսարանի, ակադեմիայի հարկի տակ պաշտպանության նախարարության տարբեր սպաներ կարող են սովորել իտալերեն, պարսկերեն և չինարեն։
Սրանք շատ կարևոր ծրագրեր են և, կարծում եմ, լավ խթան են, որպեսզի մարդիկ որոշում ընդունելիս կողմնորոշվեն դեպի ռազմական ոլորտը և մասնագիտությունը»,-նշել է նախարարը։
Պապիկյանը շատ կարևոր է համարել նաև կրթական հիմնական ծրագրերից զատ այն հնարավորությունները, որոնք ստեղծվել են կուրսանտների համար։
«Մասնավորապես, կուրսանտները կարող են օգտվել հետևյալ խմբակներից՝ սուսերամարտ, ձիավարություն, լող։ Ուսուցանվում են նաև սպորտային ուղղվածության այնպիսի մասնագիտություններ, ուժային բնույթի մասնագիտություններ, ինչպիսիք են՝ սամբոն, ձյուդոն և բոքսը։ Եվ, կարծում եմ, սա կուրսանտի զարգացման համար շատ կարևոր է, և, բնականաբար, այն մեծապես նպաստելու է, որպեսզի մեր պատանիները որոշում ընդունեն և դառնան զինվորական»,-ասել է նա։
