Իրանում ուրբաթ երեկոյան՝ հունվարի 9-ին, շարունակվել են զանգվածային բողոքի ակցիաները՝ փոխանցում է
DW-ն։ Չնայած ցուցարարների նկատմամբ Իրանի անվտանգության ուժերի կոշտ գործողություններին և ինտերնետի արգելափակմանը, Թեհրանի և երկրի այլ խոշոր քաղաքների փողոցներ են դուրս եկել մեծաթիվ ցուցարարներ։
AFP գործակալության կողմից հրապարակված տեսագրություններում երևում է, թե ինչպես են Իրանի մայրաքաղաքի հյուսիսում գտնվող Սաադաթաբադ շրջանում ցուցարարները հարվածում կաթսաները և վանկարկում «Մահ Խամենեիին» կարգախոսը՝ իրենց ուղերձը հասցեագրելով Իրանի հոգևոր առաջնորդ այաթոլլա Ալի Խամենեիին։
Զանգվածային ցույցերի ֆոնին իշխանությունները խստացնում են վերահսկողությունը Թեհրանի փողոցներում։ Իրանի մայրաքաղաքի գլխավոր մայրուղիներից մեկում անվտանգության ուժերի հատուկ ստորաբաժանումները յուրաքանչյուր 10 մետրը մեկ տեղադրել են հսկիչ կետեր, որոնք զբաղեցրել են ավտոմատ Կալաշնիկովներով զինված ուժայինները։
Միևնույն ժամանակ Թեհրանի քաղաքապետ Ալիռեզա Զաքանին պատմել է հունվարի 9-ի գիշերը տեղի ունեցած բողոքի ակցիաների հետևանքով պատճառված վնասների մասին։ Նրա խոսքով՝ հրկիզվել է ավելի քան 50 բանկ և մի քանի պետական հաստատություն, իսկ կրակի հետևանքով ոչնչացվել է ավելի քան 30 մզկիթ։
Իրանում մարդու իրավունքների կենտրոնի (CHRI) իրավապաշտպանները՝ հղում անելով ականատեսների վկայություններին, հայտնել են, որ Թեհրանի, Մեշհեդի և Կարաջի հիվանդանոցները լեփ-լեցուն են վիրավորված ցուցարարներով։ HRANA գործակալության տվյալներով՝ բողոքի ակցիաների ընթացքում զոհվել է առնվազն 62 մարդ, այդ թվում՝ անվտանգության ուժերի 14 աշխատակից և 48 ցուցարար, 2300 ցուցարար ձերբակալվել է։
Իրանի գերագույն առաջնորդ այաթոլլա Ալի Խամենեին կտրուկ դատապարտել է զանգվածային բողոքները։ Նա դրանց մասնակիցներին անվանել է «սադրիչներ» և մարդիկ, որոնք «վնասում են երկիրը»։
«Կան մարդիկ, որոնց գործն ավերումն է»,-հայտարարել է Խամենեին հունվարի 9-ին։ Նրա խոսքով՝ նրանք ավերածություններ են իրականացնում «միայն այն բանի համար, որ ԱՄՆ նախագահը ուրախանա»` նկատի ունենալով Դոնալդ Թրամփին։
ՄԱԿ-ում Իրանի դեսպան Ամիր Սաիդ Իրավանին նույնպես մեղադրել է Վաշինգտոնին և Իսրայելի իշխանություններին` «ապակայունացնող գործողությունների» և «խաղաղ բողոքի ցույցերը բռնի վանդալիզմի վերածելու» համար` հաղորդել է Reuters գործակալությունը։
