Մարտի 26-ին Շիրակի մարզի Անի և Սյունիքի մարզի Սիսիան խոշորացված համայնքներում ՏԻՄ արտահերթ ընտրություններ էին: Երկու համայնքում էլ ձայների գերակշիռ մեծամասնություն է ստացել «Քաղաքացիական պայմանագիր» կուսակցությունը:
Անիում «Ազգ-համայնք» կուսակցությունների դաշինքի օգտին տրվել է 3 134 քվե, «Հայկական երազանք» կուսակցության օգտին՝ 795, «Իմ հզոր համայնք» կուսակցության օգտին՝ 744 քվե: Իսկ «Քաղաքացիական պայմանագիրը» ստացել է 5 180 ձայն:
Սիսիանում «Քաղաքացու որոշում» սոցիալ-դեմոկրատական կուսակցությունը ստացել է 1 443 քվե, Հայաստանի հանրապետական կուսակցությունը՝ 2 553, «Քաղաքացիական պայմանագիրը»՝ 7 325:
Ընտրախախտումներ արձանագրվել են, բայց ոչ այնպիսիք, որոնք կարող էին ազդել ընտրության արդյունքի վրա. ընտրատեղամասերում ամբողջ օրը դիտորդական առաքելություն իրականացրած «Անկախ դիտորդ» հասարակական դաշինքի ներկայացուցիչ Դանիել Իոաննիսյանի գնահատականն է: Արգելված վայրերում պաստառներ, բուկլետների բաժանում. առանձնացնում է 2 համայքնում արձանագրած հիմնական խախտումները:
Դանիել Իոաննիսյան («Անկախ դիտորդ» հասարակական դաշինքի ներկայացուցիչ) - Թե՛ Անի, թե՛ Սիսիան համայնքներում խնդիրների բնույթը նման էին: Որոշ դեպքերում օրենսգրքի կարգավորումներին չէին տիրապետում, այդ թվում` վստահված անձինք, դիտորդներ, ընտրողներ: Մի քանի դրվագ տեսել ենք քվեարկության գաղտնիության հետ կապված, բայց բացառիկ դեպքեր էին:
Ընտրակաշառքի հետ կապված որևէ արժանահավատ ահազանգ չեն ստացել՝ մամուլում տարածվող լուրերին է արձագանքում Իոաննիսյանը:
Դանիել Իոաննիսյան - Մթնոլորտը նաև այնպիսին չէր, որ կարողանայինք ասել` շրջանառվում է ընտրակաշառք, այն մանիպուլյատիվ տարածվեց մամուլում, ՔՈ-ն նշել էր, որ կարող է լինել նման բան, լրատվամիջոցերը հակաքարոզ էին անում` պնդելով որ կա, չնայած ՔՈ հաղորդագրության մեջ նման տող չկար: Լրատվամիջոց կար, որ քվեարկության օրը հենց ՔՊ-ի դեմ քարոզչական նյութեր էր տարածում: Բոլոր դեպքերով գնալու ենք վարչական դատարան:
Նախընտրական քարոզարշավի ընթացքում «Քաղաքացիական պայմանագիրը» թույլ է տվել խախտում՝ լռության և դրա նախորդ օրերին ֆեյսբուքում ակտիվացնելով թեկնածուի գովազդ: Կրկին դիմելու են վարչական դատարան:
Քվեարկության օրը դիտորդները կուտակումներ արձանագրել են, բայց դա եղել է գյուղերում՝ պայմանավորված մարդկանց հոսքով:
Դանիել Իոաննիսյան - Սիսիանում եղել են նաև, որ շրջակայքում եղել են թեկնածուները, կուսակցության ներկայացուցիչները, բայց ֆորմալ առումով խախտում չի, հարցեր առաջացնող պահվածք է, բայց 50 մետրը պահում էին:
Հանցագործության մասին մեկ հաղորդում են ներկայացնելու՝ կապված ընտրողի քվեարկության գաղտնիության խախտման հետ:
Դանիել Իոաննիսյան - Մի քաղաքացի գրանցվում է որպես օգնող, բայց ինքը չի օգնում, պարզապես կողքը կանգնած վերահսկում է քվեարկությունը, կամերաներով երևում է:
Ընդգծում է՝ Կենտրոնական ընտրական հանձնաժողովը բոլոր ընտրատեղամասերը ապահովել էր տեսախցիկներով, որոնք աշխատել են ամբողջ օրը՝ անխափան:
Ընտրողներն էլ, ըստ Իոաննիսյանի, եղել են ակտիվ: Սիսիանում ավագանու արտահերթ ընտրություններին մասնակցել է քվեարկելու իրավունք ունեցող ընտրողների 49,63 %-ը, Անիում՝ 62,01:
Ըստ կենտրոնական ընտրական հանձնաժողովի հաղորդագրության՝ Անի համայնքում արձանագրվել է 10 գրառում, Սիսիանում՝ 39, որոնք դեռ ուսումնասիրվելու են ընտրատարածքային ընտրական հանձնաժողովների կողմից` օրենքով սահմանված կարգով և ժամկետում։
Ընտրության արդյունքներին արձագանքել է նաև վարչապետ Նիկոլ Փաշինյանը, շեշտել՝ ընտրողների վստահությունը պարտավորեցնող է։
Հեղինակ` Իրինա Մկրտչյան
