«Իմ քայլը» հիմնադրամը 2022 թվականին իրականացրել է 4 հիմնական հեղինակային ծրագիր. նախորդ տարվա հաշվետվությունը ներկայացնելով՝ ասաց գործադիր տնօրեն Մխիթար Հայրապետյանը: Հիմնադրամի գործունեությունն ուղղված է մարդկային կապիտալի զարգացմանը, հետևաբար` կրթությանն ու գիտությանը: Պատերազմի մասնակիցների մասնագիտական ներուժի բացահայտման պիլոտային ծրագիրն իրականացվում է Շիրակի մարզում: Շահառուները 132-ն են, բյուջեն՝ 54 մլն դրամ:
Մխիթար Հայրապետյան («Իմ քայլը» հիմնադրամի գործադիր տնօրեն) - Մենք կարողացանք երկխոսություն ծավալել իրենց հետ և հասկանալ, թե որոնք են նրանց երազանքները եղել մինչև պատերազմը, որքանով են դրանք փոփոխություն կրել պատերազմի հետևանքով, ինչ երազանքներ ունեն նրանք հիմա այս պահին, և որքանով են դրանք իրատեսական:
Հիմնադրամն օգնել է գնալ երազանքի հետևից. կրթական տարբեր գործընթացների միջոցով նրանց փոխանցվել են անհրաժեշտ գիտելիքներ ու հմտություններ, որոնք ամենօրյա աշխատանքում պետք է օգնեն արժեք ստեղծել, դառնալ ինքնաբավ ու անկախ: Իսկ այն դեպքում, երբ երազանքները գնահատվել են ոչ այնքան իրատեսական, վերաձևակերպվել են, կազմվել են իրագործման պլաններ:
Մխիթար Հայրապետյան - Կային տղաներ, որոնք ընտրել էին ձեռներեցությունը, նրանց համար նախատեսվեցին բիզնես պլաններ, և «Իմ քայլը» հիմնադրամը իր գործընկերների, տարատեսակ նվիրատուների, բարերարների հետ մեկտեղ նաև կարողացավ համաֆինանսավորել այդ բիզնես պրոյեկտները, որոնք, իհարկե, համեմատաբար փոքր են իրենց ծավալներով, բայց, անշուշտ, շատ կարևոր են: Այս տարի ծրագիրը կներդրվի նաև Արմավիրի և Լոռու մարզերում:
Մյուս ծրագիրը «Քվանտա»-ն է՝ 152 մլն դրամ բյուջեով: Քվանտային և մեզոսկոպիկ ֆիզիկայի մագիստրոսական ծրագրի շրջանակում հիմնականում դասավանդում են աշխարհի առաջատար բուհերից հրավիրված բարձրակարգ հայազգի դասախոսներ:
Մխիթար Հայրապետյան - Երբ մենք խոսում ենք քվանտային տեխնոլոգիաների, քվանտային համակարգերի մասին, նախ նկատի ունենք ռազմարդյունաբերության ոլորտը, այսինքն` այն մասնագետները, որոնք կստանան համապատասխան գիտելիքներ, ինչու ոչ, նաև կկարողանան ներգրավվել տարատեսակ տեխնոլոգիական ընկերություններում, հիմք դնել հայրենական տեխնոլոգիական ընկերությունների, զբաղվել գիտահետազոտական աշխատանքներով, ներգրավվել բանկային համակարգում և այսպես շարունակ:
Հանրակրթության ոլորտում էլ հիմնադրամը նախատեսում է լաբորատոր սարքավորումներ տրամադրել դպրոցներին: Արդեն որոշում կա ԵՊՀ ՍՏԵՄ ավագ դպրոցին փոխանցել 8 սարքավորում:
Մխիթար Հայրապետյան - Մենք հավատացած ենք, որ հարկավոր է ստեղծել այնպիսի մի նոր կրթական մոդել, օրինակելի մոդել, որով հնարավոր կլինի մասնագիտական կրթությունը մասամբ իրականացնել նաև հանրակրթական մակարդակում:
Այս դեպքում խոսքը «Հորիզոններ» դուալ կրթական ծրագրի մասին է, որը փորձարկվել է Արագածոտնի և Արմավիրի մարզի 16 բնակավայրում, որոնք հարակից են երեք խոշոր գինեգործարաններին: Դասավանդվող ծրագրերի հիմքում տեղային առանձնահատկություններն են ու տվյալ համայնքի տնտեսության զարգացման տենդենցները: Նպատակն է երիտասարդներին կա՛մ պահել համայնքում, որ դպրոցն ավարտելուց հետո ներգրավվեն տնտեսության մեջ, կա՛մ առնվազն մասնագիտական կողմնորոշվածության հնարավորություն տալ: Ծրագրի բյուջեն 40 մլն դրամ է: Արդյունավետությունը հաշվի առնելով՝ կներդրվի նաև Սյունիքի Գորիս և Սիսիան համայնքներում:
Չորրորդ՝ «Ներուժ» ծրագիրն իրականացվում է բարձր տեխնոլոգիական արդյունաբերության նախարարության հետ: Սա Սփյուռքի տեխնոլոգիական ստարտափների ծրագիր է: Նախատեսվում է աշխարհի տարբեր երկրներից հրավիրել նորարարական ստարտափ գաղափարներ ունեցող հայազգի ներկայացուցիչներին, աջակցել, որ Հայաստանում հիմնեն ու զարգացնեն տեխնոլոգիական ընկերություններ: Բյուջեն 56 մլն դրամ է:
Իսկ ինչու «Իմ քայլի» շատ նվիրատվություններն անանուն են: Խոսքը ընդհուպ 300 հազար դոլարի մասին է: Այս իրավիճակի մութ կողմի մասին լրագրողների հարցին պատասխանելով՝ Մխիթար Հայրապետյանը նախ նշեց, որ դա բարերարների իրավունքն է, թեև նա կուզեր, որ անունները հրապարակեին: Ասաց՝ ոմանք, սակայն, բացատրել են՝ խուսափում են մամուլի թիրախ դառնալուց: «Իմ քայլի» գործադիր տնօրենը վստահեցրեց՝ նվիրատվության դիմաց «ինդուլգենցիա» տրվելու մասին ակնարկ անգամ չի արվում:
Հեղինակ` Աննա Զախարյան
