Վարչապետ Նիկոլ Փաշինյանին ներկայացվել են փոխվարչապետների գրասենյակների՝ 2022 թ. գործունեության հաշվետվությունները:
Մհեր Գրիգորյանը նշել է, որ Հայաստան-ԱՄՆ զարգացման գործընկերության ծրագրով 120 մլն դոլար դրամաշնորհն ուղղվել է մեր երկրում ժողովրդավարության ամրապնդմանը և տնտեսական կայունության ապահովմանը: Հայաստան-Եվրամիություն Համապարփակ և ընդլայնված գործընկերության համաձայնագրով կատարվել է 42 միջոցառում, ընթացքի մեջ է 29-ը: «ԵՄ տնտեսական և ներդրումային պլան. Հայաստան» գործիքակազմով հաստատվել են կամ հաստատման փուլում են 395 մլն եվրո արժողությամբ ծրագրեր՝ փոքր ու միջին ձեռնարկատիրության խթանման, Սյունիքի մարզի դիմակայունության բարձրացման, Երևանի կայուն զարգացման, թվային վերափոխման, գիտության և այլ ուղղություններով:
Շարունակվել է գործակցությունը ԵԱՏՄ և ԱՊՀ կանոնադրական մարմինների հետ: Թեթև արդյունաբերության ոլորտի 435 ապրանքատեսակի համար սահմանվել է ԵԱՏՄ երկրներից 0 տոկոս ներմուծման մաքսատուրքի դրույքաչափ, շարունակվել է էլեկտրաէներգետիկ, ֆինանսական շուկաների, էլեկտրոնային առևտրի և այլ ոլորտների զարգացմանն ուղղված համատեղ աշխատանքը:
Փոխվարչապետ Տիգրան Խաչատրյանն անդրադարձել է սուբվենցիոն ծրագրերին: Նշվել է, որ 2022 թ. հաստատվել է 363 ծրագիր՝ մոտ 75 մլրդ դրամ արժեքով, որից պետական բյուջեի մասնաբաժինը կազմել է մոտ 40 մլրդ դրամ:
Ներկայացվել է Կառավարության՝ կրթության ոլորտում առաջնահերթություն հանդիսացող 300 դպրոց, 500 մանկապարտեզ ծրագրի ընթացքը: Նշվել է, որ 2022 թ. վերջի դրությամբ՝ ավարտվել է 24 դպրոցի և 46 նախադպրոցական հաստատության կառուցումը: Ներկայում ընթացքի մեջ են 47 դպրոցի և 102 նախակրթարանի կառուցման-նորոգման աշխատանքները, զուգահեռ շարունակվում են տեղորոշման և նախագծման աշխատանքները: Մինչև 2026 թ. նախատեսվում է մարզերում կառուցել 150 կրթահամալիր, որոնք կունենան նաև նախակրթարան: Անդրադարձ է եղել մի շարք ներդրումային նախագծերի ընթացքին, այդ թվում՝ Հայաստանի տարածքային զարգացման հիմնադրամի կողմից իրականացվող ծրագրերին, Հյուսիս-հարավ, քաղաքաշինական, բարեգործական ծրագրերին: Ներկայացվել է առևտրի խթանման և որակի ենթակառուցվածքների ծրագրի ընթացքը, որով 2023 թ. բյուջեով նախատեսված աշխատանքների ծավալը շուրջ 20 մլն դոլար է:
Փոխվարչապետները ներկայացրել են նաև միջգերատեսչական խորհուրդների և նախարարական կոմիտեների շրջանակում կատարված աշխատանքները: Անդրադարձ է եղել թվայնացման գործընթացին, այդ համատեքստում իրականացվող բովանդակային և կառուցվածքային բարեփոխումներին ևս:
Վարչապետը կարևորել է փոխվարչապետների գրասենյակների կողմից բարեփոխումների հետևողական կյանքի կոչումը և զարգացման ծրագրերի վերաբերյալ հանրային պատշաճ իրազեկումը: Փաշինյանը նշել է նաև ռազմավարությունների մշակման ստանդարտների կարևորությունը, խոսել շինարարական կարողությունների զարգացման անհրաժեշտության մասին: