Շուրջ 420 հազար դրամ՝ 14 անձի կորոնավիրուսի դեմ պատվաստված լինելը հավաստող կեղծ սերտիֆիկատներ տրամադրելու համար: Ըստ Հակակոռուպցիոն կոմիտեում հարուցված քրեական վարույթի՝ 2021 թվականի սեպտեմբեր-հոկտեմբեր ամիսներին այս գումարը երեք տարբեր քաղաքացուց պահանջել և ստացել է «Արտաշատ բժշկական կենտրոն»-ի մատենավար Ռեբեկա Գրիգորյանը, իրավախախտումը կատարել է Բուրաստանի առողջության առաջնային պահպանման կենտրոնի տնօրեն Կարինե Թադևոսյանի միջոցով:
Արման Մանուչարյան (ՀՀ հակակոռուպցիոն կոմիտեի ՆԱՎ ՀԿԳ ավագ քննիչ) - Կարինե Թադևոսյանը, պատասխանատու լինելով կանխարգելիչ պատվաստումների պատշաճ իրականացման համար, անձամբ, ինչպես նաև կազմակերպության այլ աշխատակիցների միջոցով, Ալեքսան Ջաբրելյանի և նրա կողմից ներկայացված 10 անձանց տվյալները լրացրել է կազմակերպության համապատասխան փաստաթղթերում, ապա հիշյալ անձանց տվյալները նույն ՊՈԱԿ-ի օպերատորի կողմից մուտքագրվել են ԱՐՄԵԴ համակարգ, ինչի արդյունքում՝ Ալեքսան Ջաբրելյանի և մյուսների անվամբ ինքնաշխատ եղանակով ստեղծվել են սերտիֆիկատներ, թե, իբր, նշված անձինք ստացել են կորոնավիրուսային հիվանդության դեմ պատվաստանյութ:
Ռեբեկա Գրիգորյանին պատվաստվել չցանկանալու և այլ ճանապարհով սերտիֆիկատ ձեռք բերելու իր և որդու մտադրության մասին հայտնել է մեկ այլ քաղաքացի ևս՝ Լուսիկ Մանուկյանը: Այս դեպքում նույնպես Գրիգորյանը փաստաթղթի կեղծումն իրականացրել է «Բուրաստանի առողջության առաջնային պահպանման կենտրոնի» տնօրենի միջոցով:
Արման Մանուչարյան - Ռեբեկա Գրիգորյանը և Լուսիկ Մանուկյանը համաձայնության են եկել, որպեսզի Լուսիկ Մանուկյանը նրան տրամադրի ընդհանուր 40 հազար ՀՀ դրամ գումար, որպեսզի Ռեբեկա Գրիգորյանն այդ գումարի դիմաց կազմակերպի հիշյալ գործողությունների կատարումը:
Նույն ժամանակահատվածում Ռեբեկա Գրիգորյանը կորոնավիրուսի դեմ պատվաստված լինելը հավաստող կեղծ սերտիֆիկատ տրամադրելու համար 50 հազար դրամ էլ պահանջել է այլ քաղաքացուց: Բոլոր դեպքերում գումարները Գրիգորյանը պահել է իրեն և չի փոխանցել «Բուրաստանի առողջության առաջնային պահպանման կենտրոնի տնօրեն» Կարինե Թադևոսյանին: Պաշտոնական կեղծիք կատարելու համար տնօրենին առաջադրվել է մեղադրանք, նրա նկատմամբ խափանման միջոց է ընտրվել երկրից բացակայելու արգելքը: Դատարանի որոշմամբ տնօրենի լիազորությունները կասեցվել են:
Գործով պաշտպանը «Լուրեր»-ի հետ զրույցում հայտնեց, որ վստահորդից լիազորություն չունի վարույթի վերաբերյալ հրապարակային տեղեկություն ներկայացնելու։ Հարուցված քրեական վարույթով առկա են նաև այլ մեղադրյալներ, որոնց մասով նախաքննությունը շարունակվում է:
Նախաքննության փուլում են գտնվում նմանատիպ մի շարք այլ քրեական վարույթներ ևս: Պատվաստվելու փոխարեն իրավախախտման միջոցով սերտիֆիկատ ձեռք բերելու քաղաքացիների որոշումը մասնագետները պայմանավորում են հակապատվաստումային քարոզով: Կորոնավիրուսի դեմ պատվաստանյութերի ի հայտ գալուց շուրջ 2 տարի անց Բժշկական համալսարանի` գիտության գծով պրոռեկտորը փաստում է՝ ժամանակը հերքեց պատվաստանյութերի վտանգավոր լինելու միֆերը:
Կոնստանտին Ենկոյան (ԵՊԲՀ գիտության գծով պրոռեկտոր) - Որևէ արտահայտված վնասակար էֆեկտի պատվաստանյութերը չեն բերել: Կան չնչին տոկոսներ որոշակի բարդությունների, որոնք կարող են հանդիպել ցանկացած դեղի օգտագործումից: Եվ հստակ կարող ենք փարատել այն միֆը, որ տվյալ վակցինացիան կարող էր բերել չիպավորման և այդ տեսակի պարզապես անհեթեթությունների:
«Կորոնավիրուսով վարակվելը և պատվաստվելը ձևավորեցին նաև հանրային իմունիտետ»,- նշում է Ենկոյանը:
Բժշկական համալսարանում իրականացված հետազոտությունը պարզել է, թե քովիդով վարակվելուց հետո որքան ժամանակ են պահպանվում հիվանդության հակամարմինները:
Կոնստանտին Ենկոյան - Հստակ կարող ենք հիմա արձանագրել, որ հակամարմինները մոտ երկու տարի մնում են մարդու օրգանիզմում:
Կոնստանտին Ենկոյանը դեռ վաղ է համարում խոսել կորոնավիրուսի դեմ պատվաստումները օրացուցային դարձնելու մասին, սակայն ընդգծում է՝ ինչպես ամբողջ աշխարհում, այնպես էլ Հայաստանում պատվաստումները հանգեցրին կորոնավիրուսի համավարակի տարածման տեմպի զգալի նվազմանը:
Հեղինակ` Նորայր Շողիկյան