Արցախն Ադրբեջանին վերաինտեգրելու հնարավորություն Ալեն Սիմոնյանը չի տեսնում: Չի բացառում Արցախի արտաքին քաղաքական վեկտորի փոփոխություն: Կարևորում է փաստը, որ այսօր բարձրացել է Արցախի դերը՝ որպես բանակցողի, որպես կարգավորման հարցում անմիջական մասնակցի: Իսկ Հայաստանը հետամուտ է, որ նաև միջազգային մեխանիզմների ներդրմամբ կանխվեն Ադրբեջանի կողմից էթնիկ զտումները:
Ալեն Սիմոնյան (ՀՀ ԱԺ նախագահ) - Արցախի իշխանությունները հնարավորություն ունեն և իրենք են զբաղվում իրենց իրավունքներով, և մենք կսպասենք, կաջակցենք, թե արտաքին քաղաքական վեկտորը ուր կտանի, և մենք մշտապես սատար կկանգնենք:
Ի՛նչ ինտեգրման մասին է խոսքը, եթե ուղիղ էլ են կրակում, էթնիկ զտումների քաղաքականությամբ են գնում: Եվ միջազգային մեխանիզմները դրա համար էլ են պետք...
ԱԺ նախագահն ընդգծում է՝ Արցախին վերաբերող բոլոր հարցերի դեպքում Հայաստանն իր կարծիքը, դիրքորոշումն է միայն ներկայացնում, բայց որոշումները կայացնում է Արցախի իշխանությունը:
ԱԺ ՆԱԽԱԳԱՀԻ ԱՆԴՐԱԴԱՐՁԸ ՌԴ ԱԳ ԽՈՍՆԱԿԻ ՀԱՅՏԱՐԱՐՈՒԹՅԱՆԸ
Անդրադառնալով Ռուսաստանի ԱԳՆ խոսնակ Մարիա Զախարովայի հայտարարությանը, թե Արցախի պաշտպանության հարցը երրորդ երկրի վրա դնելու փորձերը Հայաստանի խղճին է, շեշտում է.
Ալեն Սիմոնյան - Ադրբեջանն է անհամաձայնություն հայտնել, Ռուսաստանի ԱԳՆ-ն պետք է ավելի ուշադիր լինի Ադրբեջանի արձագանքին: Ցավալի է, որ տիկին Զախարովան չի անդրադառնում Ադրբեջանի արձագանքին:
Վերահաստատում է՝ Արցախը Ռուսաստանի խաղաղապահների պատասխանատվության գոտում է:
Մարիա Զախարովան, օրեր առաջ արձագանքելով Հայաստանի վարչապետի հայտարարությանը, թե ՌԴ-ն է Լեռնային Ղարաբաղի անվտանգության երաշխավորը, ասել էր՝ Ռուսաստանի բոլոր պարտավորություններն ամրագրված են նոյեմբերի 9-ի եռակողմ հայտարարության մեջ. բավական է նայել փաստաթուղթը, և կարելի է հասկանալ, թե ինչ պարտավորություններ կան, ինչ պարտավորություններ չկան։
Ալեն Սիմոնյան - Դա ՌԴ պատասխանատվության գոտին է, այդ համաձայնագրի համաձայն՝ Ռուսաստանի խաղաղապահները գտնվում են հենց այդ առաքելությամբ, որը, ի դեպ, մենք վավերացրել ենք, իսկ Ադրբեջանն այդ փաստաթուղթը մինչև հիմա չի ստորագրել։ Հետաքրքիր կլինի նաև իմանալ մեր ռուս գործընկերների արձագանքը դրա վերաբերյալ։ Եթե թողնում են մեր խղճին, ապա ինչպե՞ս են վերաբերվում այն փաստին, որ մինչև հիմա ռուս խաղաղապահների մանդատը Ադրբեջանը չի հաստատել։ Անկեղծ տարակուսում եմ, թե ինչու այդ մասով որևէ արձագանք չի լինում:
ՀԱՊԿ ԳԼԽԱՎՈՐ ՔԱՐՏՈՒՂԱՐԻ ԱՅՑԸ ԲԱՎԱՐԱՐ ՉԷ ՀՀ-Ի ՀԱՄԱՐ. ՍԻՄՈՆՅԱՆ
Անդրադառնալով ՀԱՊԿ-ի գործողություններին՝ ԱԺ նախագահը նշում է՝ կառույցի գլխավոր քարտուղարի այցը բավարար չէ Հայաստանի համար:
Ալեն Սիմոնյան - Չկա որևիցե քայլ, որն անելու համար ՀԱՊԿ-ի անդամ լինելը մեզ խոչընդոտում է: Անկախ նրանից, թե որ կազմակերպության մեջ ենք ու ինչ հետևություններ կարող ենք անել այս իրավիճակից, մենք շարունակում ենք բոլոր հնարավոր ճանապարհները փնտրել Հայաստանի Հանրապետության անվտանգությունն ապահովելու համար: Իսկ քաղաքական առումով՝ ինքը եկավ գնաց, թող գան, գնան, հարցը դրանով չի լուծվելու: Իրենք կգան, կգնան, դա չի խանգարի, օրինակ, 2 օր հետո որևէ գործողության: Դրա փորձը մենք ունեցել ենք էլ ավելի բարձր պաշտոնյաների այցելությունից հետո: ՀԱՊԿ ունենալով՝ ունեցանք Սև լիճ, Ջերմուկի ուղղությամբ հարձակում:
Ազգային ժողովի նախագահի դիտարկումն է՝ Ադրբեջանի հետ խաղաղության պայմանագրի շուրջ բանակցությունները փակուղում չեն, բայց դա երաշխիք չէ, որ չեն լինի սադրանքներ:
Միջազգային քրեական դատարանի՝ Ռուսաստանի նախագահին վերաբերող որոշման մասին. արդյոք Հայաստան այցելության դեպքում Պուտինը կձերբակալվի՞ հարցին, Ալեն Սիմոնյանը պատասխանում է՝ գործնականում դրա իրագործումը չի պատկերացնում որևէ երկրում:
Հեղինակ՝ Իրինա Մկրտչյան
