ՔԱՂԱՔԱՑԻՆԵՐԻ ԵՎ ՈՍՏԻԿԱՆՆԵՐԻ ՄԻՋԵՎ ԲԱԽՈՒՄՆԵՐ ՎՐԱՍՏԱՆՈՒՄ
Վրաստանի խորհրդարանն արագացված ռեժիմով առաջին ընթերցմամբ հաստատել է օտարերկրյա գործակալների մասին օրինագիծը, որով առաջարկվում է ստեղծել ռեեստր այն հասարակական կազմակերպությունների, ԶԼՄ-ների և սուբյեկտների համար, որոնք ֆինանսավորման ավելի քան 20 տոկոսը ստանում են արտերկրից: Նախագծին կողմ են քվեարկել իշխող «Վրացական երազանք» կուսակցության անդամները:
Քվեարկությունից հետո երեկ գիշերը օրենսդիր մարմնի շենքի մոտ հազարավոր քաղաքացիներ են հավաքվել՝ իրենց բողոքը հայտնելու նախագծի ընդունման դեմ, որով, ըստ նրանց, վրացական իշխանությունները փորձում են որդեգրել «օտարերկրյա գործակալների» դեմ պայքարի ռուսական փորձը, Վրաստանին շեղել եվրաինտեգրման ճանապարհից և ճնշել այլախոհությունը:
Ցուցարարները փորձել ներխուժել խորհրդարանի շենք, ոստիկանների և քաղաքացիների միջև մինչև ուշ գիշեր բախումներ են եղել, հատուկ նշանակության ուժերը ջրցան մեքենաներ, ռետինե փամփուշտներ և արցունքաբեր գազ են կիրառել ակցիայի մասնակիցների դեմ: Քաղաքացիներն էլ մոլոտովի կոկտեյլներ են նետել իրավապահների ուղղությամբ: Լրատվամիջոցների տվյալով՝ ցույցը ցրելուց հետո Վրաստանի ՆԳՆ աշխատակիցները բերման են ենթարկել ավելի քան 60 ցուցարարի, այդ թվում՝ քաղաքական գործիչների։ Քաղաքացիների և իրավապահների շրջանում կան տուժածներ:
ԱՄՆ-ում գտնվող Վրաստանի նախագահ Սալոմե Զուրաբիշվիլին հետաձգել է պաշտոնական հանդիպումները: Նա տեսաուղերձով դիմել է Վրաստանի քաղաքացիներին, աջակցություն հայտնելով ցուցարարներին:
Սալոմե Զուրաբիշվիլի (Վրաստանի նախագահ) - Դիմում եմ նրանց, ովքեր Ռուսթավելու պողոտայում են: Այսօր ես կանգնած եմ Նյու Յորքում, իսկ հետևումս՝ Ազատության արձանն է։ Սա խորհրդանիշ է, որի համար Վրաստանը միշտ պայքարել է։ Ես ձեր կողքին եմ, որովհետև այսօր դուք ներկայացնում եք ազատ Վրաստանը:
Սալոմե Զուրաբիշվիլին հավելել է, որ օտարերկրյա գործակալների մասին օրենքի նախագիծը պետք է չեղարկվի: Նա հավատացրել է՝ մտադիր է վետո դնել օրինագծի վրա։
Վրաստանում զարգացումներին արձագանքել է նաև Արևմուտքը: ԵՄ արտաքին քաղաքականության հարցերով բարձր ներկայացուցիչ Ժոզեպ Բորելը հայտարարել է, որ «Օտարերկրյա ազդեցության թափանցիկության մասին» օրենքի նախագիծն անհամատեղելի է ԵՄ արժեքների և չափանիշների հետ և հակասում է Թբիլիսիի եվրաինտեգրման նպատակներին։
Պետքարտուղարության խոսնակն էլ չի բացառել Վրաստանի իշխանությունների ներկայացուցիչների նկատմամբ պատժամիջոցների կիրառման հնարավորությունը: Նեդ Փրայսը նաև հավելել է՝ խաղաղ ցուցարարները պետք է կարողանան առանց խոչընդոտների արտահայտել իրենց դիրքորոշումը:
ՖՐԱՆՍԻԱՅՈՒՄ ՉԵՆ ԴԱԴԱՐՈՒՄ ՀԱԿԱԿԱՌԱՎԱՐԱԿԱՆ ՑՈՒՅՑԵՐԸ
Հակակառավարական ցույցերը չեն դադարում Ֆրանսիայի ավելի քան 300 քաղաքում, այդ թվում՝ Փարիզում: Հազարավոր քաղաքացիներ, մասնավորապես երկաթուղու աշխատակիցներ և մանկավարժներ գործադուլ են անում՝ իրենց բողոքն արտահայտելով կենսաթոշակային համակարգում փոփոխությունների դեմ, որոնց համաձայն 2030 թվականից մարդիկ թոշակի կանցնեն ոչ թե 62, այլ 64 տարեկանից: Ցուցարարներն արգելափակել են դեպոները, մայրուղիները, նավթավերամշակման գործարանները, բուհերը, խաթարվել է էլեկտրամատակարարումը: Լրատվամիջոցների տվյալով՝ անկարգություններ են տեղի ունեցել։ Ոստիկաններն արցունքաբեր գազ են կիրառել, կան ձերբակալվածներ: Ֆրանսիայի ՆԳՆ-ի տվյալով՝ երեկ Ֆրանսիայում փողոց է դուրս եկել շուրջ 1,3 միլիոն քաղաքացի:
Ֆրանսիական արհմիությունները զգուշացրել են՝ մարտի 11-ին և 15-ին նոր ցույցեր կանցկացնեն, եթե իշխանությունները չչեղարկեն կենսաթոշակային փոփոխությունները: Հիշեցնենք, որ ավելի վաղ Ֆրանսիայի վարչապետը հույս էր հայտնել, որ փոփոխությունները ուժի մեջ կմտնեն ամռանը:
ՑՈՒՑԱՐԱՐՆԵՐԸ ՊԱՀԱՆՋՈՒՄ ԵՆ ՊԵՐՈՒԻ ՆԱԽԱԳԱՀԻ ՀՐԱԺԱՐԱԿԱՆԸ
Անհանգիստ է նաև Պերուում: Երեկ մայրաքաղաք Լիմայում վերսկսվել են հակակառավարական ակցիաները: Հարյուրավոր ցուցարարներ պահանջել են գործող նախագահ Դինա Բոլուարտեի հրաժարականը: Ոստիկանների և ցուցարարների միջև բախումներ են եղել, իրավապահներն արցունքաբեր գազ են կիրառել:
Ակցիայի մասնակիցները պահանջել են նաև ազատ արձակել դեկտեմբերի սկզբին ձերբակալված նախկին նախագահ Պեդրո Կաստիլյոյին, որը փորձել էր իր իմփիչմենթի հարցով քվեարկությանն ընդառաջ ցրել խորհրդարանը։ Կաստիլյոն մեղադրվում է ապստամբություն կազմակերպելու համար։ Նրան սպառնում է 10-20 տարվա ազատազրկում: Նախկին նախագահին մեղադրում են նաև իշխանությունը չարաշահելու և պաշտոնավարման ընթացքում կոռուպցիոն հանցագործություններ կատարելու համար։ Ցույցերի ընթացքում դեկտեմբերից ի վեր զոհվել է շուրջ 50 մարդ:
Նույն օրը ներկայիս նախագահ Բոլուարտեն կանչվել է Պերուի դատախազություն՝ ակցիաների ընթացքում ցուցարարների մահվան գործով ցուցմունք տալու համար։
ԻՐԱՎԻՃԱԿԸ ՇԱՐՈՒՆԱԿՈՒՄ Է ԼԱՐՎԱԾ ՄՆԱԼ ԲԱԽՄՈՒՏՈՒՄ
Ռուսական ուժերն ամբողջությամբ վերահսկողություն են հաստատել Բախմուտի արևելյան հատվածի նկատմամբ՝ հայտարարել է «Վագներ» մասնավոր ռազմական ընկերության ղեկավար Եվգենի Պրիգոժինը: Ավելի վաղ նա տեղեկացրել էր, որ ռուսական ուժերը գրեթե շրջափակել են Բախմուտը, մնացել է վերցնել ընդամենը 1 ճանապարհ:
Երեկ Ուկրաինայի զինված ուժերի գլխավոր հրամանատարը և ցամաքային զորքերի հրամանատարը Վոլոդիմիր Զելենսկիի հետ հանդիպմանը հայտարարել էին, որ հարկավոր է ամրապնդել Բախմուտի դիրքերը և շարունակել պաշտպանական գործողությունները։
ՌԴ պաշտպանության նախարար Սերգեյ Շոյգուն էլ նշել է, որ ռուսական կողմը շարունակում է Բախմուտի նկատմամբ վերահսկողություն հաստատելու փորձերը: Նրա խոսքով՝ քաղաքը Դոնբասում ուկրաինական զորքերի պաշտպանության կարևոր հանգույց է և հետագայում թույլ կտա հարձակողական գործողություններ սկսել Ուկրաինայի զինված ուժերի պաշտպանության խորքում:
