Բորիս Ջոնսոնը Մեծ Բրիտանիայում քաղաքական ճգնաժամի ֆոնին հայտարարել է հրաժարականի մասին. նա նաև որոշել է լքել Պահպանողական կուսակցության առաջնորդի պաշտոնը։ «Շատ տխուր է, թողնում եմ աշխարհի լավագույն աշխատանքը»,- ասել է Ջոնսոնը:
Նրա խոսքով՝ Պահպանողական կուսակցության նոր առաջնորդի և Բրիտանիայի վարչապետի ընտրության կարգը կորոշվի հաջորդ շաբաթ, մինչ այդ Ջոնսոնը կկատարի վարչապետի լիազորությունները:
Նա նաև խոստացել է, որ բրիտանական կառավարությունն իր հրաժարականից հետո էլ կշարունակի աջակցել Ուկրաինային։
ՌԴ ԵՎ ՉԺՀ ԱԳ ՆԱԽԱՐԱՐՆԵՐԸ ՔՆՆԱՐԿԵԼ ԵՆ ԻՐԱՎԻՃԱԿՆ ՈՒԿՐԱԻՆԱՅՈՒՄ
Ռուսաստանի և Չինաստանի ԱԳ նախարարներ Սերգեյ Լավրովը և Վան Յին Բալիում Մեծ քսանյակի արտգործնախարարների հանդիպման շրջանակում քննարկել են Ուկրաինայում իրավիճակը՝ հայտնում են ՌԴ ԱԳՆ-ից։
«Կողմերն անդրադարձել են Ռուսաստանի զինված ուժերի հատուկ ռազմական գործողության հիմնական խնդիրներին, Ուկրաինայի ապառազմականացմանն ու ապազգայնականացմանը: Գնահատել են Կիևի շուրջ զարգացումների համատեքստում արևմտյան երկրների գործողությունները»,- ասված է հայտարարության մեջ։
Սերգեյ Լավրովը և Վան Յին նաև անթույլատրելի են որակել Արևմուքի միակողմանի պատժամիջոցները:
«Մոսկվան և Պեկինը կխորացնեն և կընդլայնեն գործընկերության շրջանակը »,- նշել է ռուս դիվանագետը։
Լավրովը նաև հանդիպել է Թուրքիայի արտգործնախարար Մևվլութ Չավուշօղլուի հետ: Նախարարները քննարկել են տարածաշրջանային մի շարք հարցեր, Մոսկվայի և Անկարայի գործակցությունը Սև ծովում, ինչպես նաև պայմանավորվել համակարգել ջանքերը Ուկրաինայում խաղաղ բնակիչների անվտանգությունն ապահովելու հարցում։
ԿԻԵՎՈՒՄ ԹՈՒՐՔԻԱՅԻ ԴԵՍՊԱՆԸ ԿԱՆՉՎԵԼ Է ՈՒԿՐԱԻՆԱՅԻ ԱԳՆ
Կիևում Թուրքիայի դեսպանը կանչվել է Ուկրաինայի արտաքին գործերի նախարարություն: Պատճառը Ռուսաստանի դրոշով «Ժիբեկ Ժոլի» նավի հետ կապված իրավիճակն է. Կիևը պահանջել է Անկարայից կալանել բեռնատար նավը և մեղադրել ռուսական կողմին Ուկրաինայից գողացված հացահատիկ տեղափոխելու համար։
«Անտեսելով ուկրաինական կողմի պահանջը՝ թուրքական կողմը հուլիսի 6-ին ազատ է արձակել նավը։ Կիևը խորապես հիասթափված է, դիմել ենք Անկարային՝ հետաքննություն անցկացնելու և Ուկրաինայի պատկան մարմիններին սպառիչ պարզաբանումներ տրամադրելու խնդրանքով: Հուսով ենք՝ նմանատիպ դեպքերն ապագայում կկանխվեն», - ասված է գերատեսչության հաղորդագրության մեջ։
ԼԻՏՎԱՆ ՉԻ ՀԱՄԱՁԱՅՆԻ «ԿԱՆԱՉ ՄԻՋԱՆՑՔԻ» ՍՏԵՂԾՄԱՆԸ
Վիլնյուսը չի համաձայնի Լիտվայի տարածքով Ռուսաստանից Կալինինգրադ բեռնափոխադրումների համար կանաչ միջանցքի ստեղծմանը՝ հայտարարել է բալթյան հանրապետության նախագահի խորհրդականը։
«Անհրաժեշտ է ոչ միայն արգելել պատժամիջոցների տակ հայտնված ապրանքների տարանցումը, այլ դրանց վրա վերահսկողություն սահմանել», - նշել է Աստա Սկայսգիրիտեն։
Նրա խոսքով՝ Վիլնյուսն ուղղակի կատարում է Եվրոպայի առաջնորդների որոշումները և չի ցանկանում խախտել հակառուսական պատժամիջոցները:
«Սա ոչ թե Լիտվայի և Կալինինգրադի, այլ ԵՄ-ն ու Ռուսաստանի խնդիրն է», - համոզմունք է հայտնել պաշտոնյան:
Ավելի վաղ՝ Կալինինգրադի նահանգապետ Անտոն Ալիխանովն առաջարկել էր ի պատասխան Լիտվայի գործողությունների ամբողջությամբ արգելել Բալթյան երկրների տարածքով օտարերկրյա ապրանքների արտահանումն ու ներմուծումը Ռուսաստան։ Ենթադրաբար, թիրախում կհայտնվեն նաև Ասիայից բալթյան նավահանգիստներ ուղևորվող բեռները։ Ալիխանովն ընդգծել է, որ նման որոշման դեպքում Ռուսասանը նույնպես կարող է տուժել։
«Նման սցենար հնարավոր է, եթե ավելի արդյունավետ տարբերակներ չհայտնվեն», - նշել է Կրեմլի խոսնակ Դմիտրի Պեսկովը:
ՏՈԿԱԵՎԸ ՀԱՆՁՆԱՐԱՐԵԼ Է ԴԻՎԵՐՍԻՖԻԿԱՑՆԵԼ ՆԱՎԹԻ ՄԱՏԱԿԱՐԱՐՈՒՄԸ
Ղազախստանի նախագահ Կասիմ-Ժոմարտ Տոկաևը տրանսպորտային-տարանցիկ ներուժի զարգացման հարցով խորհրդակցություն է անցկացրել՝ ազգային նավթագազային ընկերությանը հանձնարարելով դիվերսիֆիկացնել նավթի մատակարարումը՝ նշված է երկրի ղեկավարի պաշտոնական կայքում:
Տարանցիկ ներուժի մեծացման հարցում նա ընդգծել է Տրանսկասպյան միջազգային տրանսպորտային երթուղու կարևորությունը. այն սկսվում է Չինաստանից, անցնում Ղազախստանով և Կասպից ծովի ջրային տարածքով, ապա Ադրբեջանով հասնում Վրաստան և Թուրքիա։ Այնտեղից մատակարարումը կարող է շարունակվել դեպի Եվրոպայի երկրներ։
Տոկաևը առաջնահերթ է համարել նավթի մատակարարման դիվերսիֆիկացումը: Նա Ղազախստանի ազգային նավթային ընկերությանը հանձնարարել է մշակել օպտիմալ տարբերակներ, այդ թվում՝ Թենգիզի նախագծի ներդրողներին ներգրավելու հնարավորությամբ։ Տոկաևը հանձնարարել է նաև ավելացնել դեպի Չինաստան նավթամուղերի հզորությունը:
