Շահագրգիռ մարմինների հետ քննարկած ու լրամշակած սոցփաթեթի տրամադրման կարգում փոփոխությունների նախագիծը ներկայացվել է վարչապետի աշխատակազմին՝ մասնագիտական ուսումնասիրության:
Հիշեցնենք, աշխատանքի և սոցիալական հարցերի նախարարությունը այս տարվա գարնանն էր մշակել սոցփաթեթի ծառայությունների ավելացման նախագիծը: Նախարարության աշխատանքի և զբաղվածության վարչության պետ Ժորա Սարգսյանը շեշտում է՝ ծառայությունների շրջանակի ընդլայնումը չի ենթադրում տրամադրվող գումարի ավելացում. պետության բեռի մեծացում չի լինելու:
Ժորա Սարգսյան (աշխատանքի և սոցիալական հարցերի նախարարության աշխատանքի և զբաղվածության վարչության պետ) - Առաջարկվում է, որ գումարի ծախսման ուղղությունները ավելացվեն՝ ուսման վարձի, մանկապարտեզի վճարի, ստոմատոլոգիական ծառայությունների և մարզաառողջարարական համալիրում ծախսելու հնարավորություն ընձեռելով:
Ի տարբերություն ծառայությունների շրջանակի, սակայն, շահառուների շրջանակը ընդլայնել չեն կարող: Հատկացված ֆինանսական միջոցները բավարարում են առկա շահառուներին, նրանց շրջանակը լայն է՝ ուսուցչից մինչև ատոմակայանի աշխատակից:
Ժորա Սարգսյան - Խոսքը գնում է շուրջ 147500 անձի մասին, որոնցից 138.000-ը օգտվում են այդ ծառայությունից: Հիմնականում հանրային ծառայողներն են, պետական հատվածի աշխատողները, դպրոցների, գրադարանների, թանգարանների աշխատողները: Նաև ՀՀ ժողովրդական պատվավոր կոչմանն արժանացած անձինք։
Ի դեպ, բոլոր շահառուները, անկախ ոլորտից, զբաղեցրած պաշտոնից ու ստացած աշխատավարձից, յուրաքանչյուր ամիս իրենց սոցփաթեթի հաշվեհամարին ստանում են 6000-ական դրամ փոխանցում, տարվա կտրվածքով՝ 72.000, որը կարող են ծախսել մի քանի ոլորտներում:
Ծախսելու ուղղությունները չորսն են՝ հանգստի իրավունք, ուսման վարձ, առողջապահության ապահովագրության ձեռքբերում, վարկի կամ հիփոթեքի ծախսում:
Նախորդ տարի, պատերազմով պայմանավորված, ևս մեկ ուղղություն ավելացավ: Սոցփաթեթի շրջանակում հատկացվող գումարից շահառուն, ցանկության դեպքում, կարող է փոխանցումներ անել նաև «Հայաստան» համահայկական հիմնադրամին: Ի դեպ, շահառուներն ունեն նաև գումարի կանխիկացման հնարավորություն: Ամենատարածված տարբերակը որպես կուտակային կենսաթոշակային համակարգի շրջանակում կատարված սոցիալական վճարների փոխհատուցումն է։
Ժորա Սարգսյան - Եթե ծնվել է 1974 թ.-ից հետո, շահառուն իրավունք ունի կանխիկացնելու միայն իր սոցփաթեթի հաշվում ընթացիկ տարվա հունվարի 1-ի դրությամբ առկա մնացորդը, բայց ոչ ավելի, քան նախորդ տարվա ընթացքում հաշվարկված և փոխանցված սոցիալական վճարների ընդհանուր չափը:
Կանխիկացնել հնարավոր է նաև աշխատողի` կենսաթոշակ ստանալու իրավունք ունենալու, սոցիալական փաթեթից օգտվելու իրավունքի դադարեցման ժամանակ, երբ նրա սոցփաթեթի հաշվին առնվազն երեք ամիս սոցփաթեթի գումարներ չեն փոխանցվել, ինչպես նաև աշխատողի մահվան դեպքում ժառանգի կողմից:
Հեղինակ՝ Իրինա Մկրտչյան
