Տվյալների վրա հիմնված գյուղատնտեսություն, առցանց կառավարման հարթակներ, էլեկտրոնային կոմերցիա և սննդի արժեշղթայի արդյունավետության բարձրացում․ «Ագրոթեք» ինկուբատորի նպատակն է բացահայտել տարբեր նորարարական գաղափարներ, որոնք կլուծեն ագրոարդյունաբերության ոլորտի խնդիրները և կբարձրացնեն արդյունավետությունը։
Վարդան Ուռուտյան (Հայաստանի ազգային ագրարային համալսարանի ռեկտոր) - Գյուղատնտեսության մեջ լայնորեն օգտագործվում են էսպես խելացի թվային լուծումներ՝ արհեստական բանականություն, ռոբոտներ, սենսորներ, իրերի համացանց և այլն։ Եվ այս առումով մենք նույնպես ցանկացանք, որպեսզի Ագրարային համալսարանում ստեղծենք ագրոտեխնոլոգիական զարգացումների այդ հարթակը։
Ագրարային համալսարանի ռեկտորն ասում է՝ հարթակի ստեղծման հիմքում գյուղատնտեսության զարգացման նորամուծությունները Հայաստանում կիրառելու գաղափարն է։ «Ագրոթեք» ինկուբատորը հնարավորություն կտա հանրապետության բուհերի ուսանողներին, երիտասարդ հետազոտողներին հանդես գալ ստեղծարար ու նորարար լուծումներով։ Արդեն մեկնարկել է Ագրոտեխնոլոգիական ինկուբատորի 4-րդ շրջափուլը։
Արշակ Կարապետյան (Nation In Action ՀԿ համահիմնադիր, ImpactAim ANAU AgriTech Accelerator -ի մենեջեր) - Դիմումի վերջնաժամկետն օգոստոսի 25-ն է: Ընտրվելու է մոտ 20 ստարտափ և սեպտեմբերի կեսին նրանք մասնակցելու են դեմոդեյից, որի արդյունքում արդեն կընտրվի լավագույն 8-ը, որի հետ կանցնենք քառամսյա ինկուբացիոն ցիկլ:
Նորաստեղծ ընկերությունները կկարողանան գործընկերային կապեր հաստատել տեխնոլոգիական և ագրո ոլորտի կայացած ներկայացուցիչների հետ։ Լավագույնները կստանան ֆինանսական աջակցություն, մրցանակային ֆոնդն ավելի քան 20 մլն դրամ է։ Ծրագիրը ֆինանսավորում են միջազգային կազմակերպությունները։ Այս փուլում ծրագրի գործընկեր է նաև ՀՀ Էկոնոմիկայի նախարարությունը։
Էմմա Պետրոսյան (ԵՄ Կանաչ գյուղատնտեսության նախաձեռնություն Հայաստանում ծրագրի հաղորդակցության գծով պատասխանատու) - Ագրոտեխնոլոգիական ինկուբատորի ծրագիրը հայտարարվել է Եվրամիության և Ավստրիական զարգացման գործակալության ֆինանսական աջակցությամբ, մենք հուսով ենք հավաքել բավականին հետաքրքիր ծրագրեր, որոնք շնորհիվ հնարավոր կլինի գյուղատնտեսությունը կապել ՏՏ ոլորտին։
Գյուղատնտեսության ոլորտում խելացի տեխնոլոգիաների կիրառումն ուղղված է շրջակա միջավայրի պահպանությանը, ռեսուրսների արդյունավետ օգտագործմանը և արտադրողականության բարձրացմանը;
Վարդան Թոռչյան (ԵՄ Կանաչ գյուղատնտեսության նախաձեռնություն Հայաստանում ծրագրի կանաչ տեխնոլոգիաների փորձագետ) - Սա շատ առաջադեմ մոտեցում է, որը հնարավորություն է տալիս ֆերմերների մոտ ապահովել եկամուտների աճ, արտադրողականության բարձրացում և որ ամենակարևորն է` ստանալ ավելի անվտանգ սնունդ։
2019-ին մեկնարկած «Ագրոթեք» ինկուբատոր ծրագրի մասնակիցները ներկայացրել են քառասունից ավելի գաղափար։ Դրանցից քսանն արդեն ակտիվ կիրառվում է տեղական և միջազգային շուկաներում, օրինակ՝ գյուղատնտեսական խորհրդատվական հավելվածը։
Հայկ Բադալյան (Garoon գյուղատնտեսական խորհրդատվական հավելվածի հիմնադիր) - Նպատակն է կապել գյուղատնտեսներին, այգեգործներին, ջերմոցների սեփականատերերին, ինչպես նաև բնակարանային բույսերի սիրահարներին ագրոնոմների, այսինքն՝ բուսաբուծության մասնագետների հետ։
Հավելվածը լուծում է լոգիստիկ մի շարք խնդիրներ։ Այն հնարավորություն է տալիս բույսերի հիվանդությունների դեմ պայքարի միջոցառումների, մշակության տեխնոլոգիաների, եղանակային պայմանների վերաբերյալ խորհրդատվություն ստանալ ոլորտի առաջատար մասնագետներից։
Այս և մյուս գաղափարները կխթանեն Հայաստանում կայուն և կանաչ գյուղատնտեսության զարգացմանը։
Ծաղկանուշ Միրզոյան
