Մենք ուզում ենք, որ այս տարածքները լցվեն բովանդակությամբ․ վարչապետն այցելել է Երևանի և մարզերի նորակառույց դպրոցներ

ՀՀ վարչապետ Նիկոլ Փաշինյանը շրջայց է կատարել հանրապետությունում նոր կառուցված դպրոցներում, ծանոթացել կատարված աշխատանքներին և ստեղծված պայմաններին: Դպրոցները կառուցվել են Կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ» ծրագրի շրջանակում։

Վարչապետին ուղեկցել են փոխվարչապետ Տիգրան Խաչատրյանը, Երևանի քաղաքապետ Տիգրան Ավինյանը, ՀՀ կրթության, գիտության, մշակույթի և սպորտի նախարար Ժաննա Անդրեասյանը, համապատասխան մարզերի և համայնքների ղեկավարները:

Վարչապետի առաջին կանգառը եղել է Երևանի Նոր Նորք վարչական շրջանի Կարեն Դեմիրճյանի անվան թիվ 139 ավագ նորակառույց դպրոցում։ Այն կառուցվել է «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակում՝ Համաշխարհային բանկի և ՀՀ Կառավարության ֆինանսավորմամբ։ Ընդհանուր արժեքը կազմել է ավելի քան 2,8 մլրդ դրամ։ Արդյունքում՝ Երևան քաղաքի Նոր Նորքի վարչական շրջանն ունի նորակառույց ավագ դպրոց, որը համալրված է անհրաժեշտ լաբորատորիաներով, սարքավորումներով և նախատեսված է 600 աշակերտի համար։

Վարչապետը շնորհավորել է ներկաներին դպրոցի կառուցման, բացման առիթով և այն համարել մեծ իրադարձություն՝ կրթության ոլորտի, Կառավարության, Երևանի համար։ Նիկոլ Փաշինյանի խոսքով՝ դպրոցաշինության ծրագիրը կրթական ծրագիր է նաև պետության և Կառավարության համար, որովհետև սովորում են 21-րդ դարում դպրոց կառուցել։ «Դպրոցի կառուցումը խնդրի առաջին մասն է, դպրոցի հետագա կյանքը և ընթացքը՝ երկրորդ, որովհետև հիմա հատկապես շատ ընդգծվում է հարցը, թե ի՞նչ պետք է երեխաները դպրոցում սովորեն և ի՞նչ հմտություններով պետք է դպրոցից դուրս գան։ Սա թերևս ամենակարևոր հարցն է։ Մեր ընկալումն այն է, որ դպրոցում երեխաները պետք է ձեռք բերեն բարեկեցիկ կյանքով ապրելու համար անհրաժեշտ հմտություններ, բայց սրանով էլ խնդիրը չի լուծվում, որովհետև ժամանակակից աշխարհը շատ է փոխվում»,- ասել է երկրի ղեկավարը՝ հավելելով, որ պետք է ճկուն լինել և ճիշտ աշխատանքով արձագանքել իրավիճակին։

Վարչապետի դիտարկմամբ՝ կրթական համակարգի բարեփոխման արդյունքում պետք է երեխաների համար կյանքի փոփոխություններին ադապտացվելու հնարավորություններ ստեղծվեն։

Նիկոլ Փաշինյանն ընդգծել է այն հանգամանքը, որ պետք է յուրաքանչյուրը հասկանա, թե ինչպես է այդ դպրոցը կառուցվել։ Երկրի ղեկավարը նշել է՝ այն կառուցվել է մարդկանց կողմից պետբյուջե վճարած հարկերի միջոցով։ Այդ համատեքստում, վարչապետը շնորհակալություն է հայտնել բոլոր հարկ վճարողներին և մեկ անգամ ևս ընդգծել ՀԴՄ կտրոնները վերցնելու մշակույթը երկրում զարգացնելու կարևորությունը։

Անդրադառնալով շինարարության որակի հարցին՝ Նիկոլ Փաշինյանը հավելել է, որ այն պետք է դարձնել սկզբունքային՝ որակի հետ կապված կոմպրոմիս չի լինելու։

Դիմելով աշակերտներին՝ երկրի ղեկավարը նշել է․ «Մենք ուզում ենք, որ այս տարածքները լցվեն բովանդակությամբ՝ սկսած մտքերից, որովհետև ստեղծագործելու, աշխատելու, կյանքը հասկանալու, քննարկելու և զարգանալու հարթակ է տրամադրված ձեզ։ Համոզված եմ, որ այդ հարթակը կօգտագործեք»։

Ամփոփելով խոսքը՝ Նիկոլ Փաշինյանը կրկին շնորհակալություն է հայտնել դպրոցաշինության ծրագրի մասնակիցներին և հաջողություն մաղթել բոլորին․ «Շատ կարևոր է, որ՝ ի դեմս այս դպրոցի, մյուս դպրոցների յուրաքանչյուր աշակերտ իր համար արձանագրի մի բան, որ իր պետությունը՝ Հայաստանի Հանրապետությունը, որևէ ջանք չի խնայում և անում է իրենից կախված ամեն բան, որպեսզի դպրոցի յուրաքանչյուր շրջանավարտ կյանքում լինի հաջողակ։ Էական չէ, ինչով կզբաղվի, բայց կլինի հաջողակ։ Ի՞նչ է նշանակում հաջողակ։ Նշանակում է՝ սեփական աշխատանքով կարողանալ ապահովել սեփական բարեկեցությունը, իսկ դա իր հերթին նշանակում է պետության ավելի բարձր բարեկեցության մակարդակ։ Յուրաքանչյուր ոք, ով ինքն իր համար բարեկեցություն է ստեղծում և օրինապահ քաղաքացի է, միանշանակ դրանից ավելի շատ շահելու է պետությունը, որովհետև ավելի մեծ հնարավորություններ է ստանում։ Մենք ուզում ենք, որ դուք լինեք հաջողակ, որովհետև ձեր հաջողակ լինելը նշանակում է հաջողակ պետություն՝ Հայաստանի Հանրապետություն»։

Հաջորդիվ Նիկոլ Փաշինյանն այցելել է Արարատի մարզ և ներկա գտնվել Վեդի համայնքի Վանաշեն բնակավայրի կառուցված միջնակարգ դպրոցի բացման արարողությանը։ Դպրոցը կառուցվել է Ասիական զարգացման բանկի Սեյսմիկ անվտանգության բարելավման ծրագրի շրջանակում՝ ՀՀ Կառավարության համաֆինանսավորմամբ։ Ծրագրի ընդհանուր արժեքը կազմել է ավելի քան 2,5 մլրդ դրամ։ Նոր դպրոցը նախատեսված է 432 աշակերտի համար։

Շնորհավորելով ներկաներին դպրոցի կառուցման և բացման առիթով՝ Նիկոլ Փաշինյանը կրկին շնորհակալություն է հայտնել ՀՀ-ում աշխատող, արդյունք ստեղծող և օրենքով նախատեսված հարկերը վճարող բոլոր տնտեսվարողներին, ՀԴՄ կտրոն թողարկող և պահանջող ու ստացող բոլոր քաղաքացիներին, որովհետև նրանց գործունեության արդյունքում են կյանքի կոչվում այդ ծրագրերը։ Վարչապետի խոսքով՝ դպրոցը պետք է դառնա երեխաների համար զարգանալու և ստեղծագործելու, ինչպես նաև հետագա բարեկեցիկ և հաջողակ կյանքի պատրաստվելու միջավայր, որտեղ նրանք ձեռք կբերեն իրենց ցանկացած հաջողություններին հասնելու հմտություններ։ «Ամենակարևոր հմտությունը, որ կրթական համակարգը պետք է փոխանցի մեր երեխաներին, կյանքի փոփոխություններին ադապտացվելն է, որովհետև կյանքն ինչքան գնա՝ ավելի արագ է փոխվելու, և շատ կարևոր է, որ մեր երեխաները կարողանան կյանքին համահունչ փոխվել դեպի ավելի լավը։ Սրա համար է դպրոցը, սրա մասին է դպրոցը, և նաև դա է պատճառը, որ դպրոցի մուտքի մոտ մի հիմնական ուղերձ է ձեզ ուղղված․ «Լավ սովորեք, որ լավ ապրեք»։ Լավ ապրելու հմտությունները ձեռք են բերվում առաջին հերթին դպրոցում։ Մենք կարծում ենք, որ դրա համար նվազագույն պայմաններն ապահովել ենք, մնացած ամեն ինչը կախված է ձեզնից, և ես բոլորիդ հաջողություն եմ մաղթում ձեր բարեկեցիկ կյանքին այսօր պատրաստվելու գործում», -ասել է Նիկոլ Փաշինյանը։

Արմավիրի մարզում վարչապետը ներկա է գտնվել Մեծամոր համայնքի Երասխահուն բնակավայրի կրթահամալիրի և Նոր Կեսարիա բնակավայրի միջնակարգ դպրոցի բացման արարողություններին։

Կրթահամալիրի կառուցման համար պետբյուջեից հատկացվել է ավելի քան 1,7 մլրդ դրամ։ Ծրագրի իրականացման արդյունքում՝ Մեծամոր համայնքի Երասխահուն բնակավայրը կունենա նոր կրթահամալիր՝ նախատեսված 200 աշակերտի համար և նախակրթարան՝ նախատեսված 80 երեխայի համար։

432 աշակերտի համար նախատեսված Նոր Կեսարիա բնակավայրի միջնակարգ դպրոցի կառուցման ընդհանուր արժեքը կազմել է ավելի քան 2,6 մլրդ դրամ։

Շնորհավորելով կրթահամալիրի բացման առիթով՝ Նիկոլ Փաշինյանը նշել է, որ Երասխահուն բնակավայրը մանկապարտեզ երբեք չի ունեցել։ Վարչապետը գոհունակությամբ նկատել է, որ նման դպրոցներ ունենալն արդեն դառնում է շատ սովորական մի երևույթ։ «Կարծում եմ, որ մենք հենց սովորականության փոփոխության պիտի հասնենք, որովհետև հիմա էլ, ցավոք, շատ համայնքներում սովորական է, որ չկա մանկապարտեզ, չկա նորմալ դպրոց, չկան նորմալ ճանապարհներ։ Մենք պետք է այդ սովորականության տրամաբանությունը փոխենք, և սովորական լինի, որ կա լավ դպրոց և այլն», - նշել է երկրի ղեկավարը՝ հավելելով, որ լավ ապրելը նույնպես Հայաստանի Հանրապետությունում պետք է լինի սովորական, ինչի համար Կառավարությունն այսպիսի մեծ ներդրումներ է կատարում։

Վարչապետի գնահատմամբ՝ ուսումնական հաստատություններում կրթություն ստանալը նպաստում է նաև պետության զարգացմանը․ «Պետությունը կա այնքանով, ինչքանով կա քաղաքացի, որ պատրաստ է տեր կանգնել այդ պետությանը, ինչը նշանակում է ապրել այդ երկրում, աշխատել այդ երկրում, հարկեր վճարել այդ երկրում, ստեղծագործել և ավելացնել հնարավորություններն այդ երկրի, առաջին հերթին՝ ֆինանսական, տնտեսական։ Եվ ես այստեղ էլ ուզում եմ կրկին շնորհակալություն հայտնել Հայաստանի Հանրապետությունում աշխատող, արդյունք ստեղծող, օրենքով նախատեսված հարկերը վճարող բոլոր տնտեսվարողներին և բոլոր այն քաղաքացիներին, ովքեր գնումներ անելիս ՀԴՄ կտրոն են պահանջում և ստանում»։

Դիմելով աշակերտներին՝ Նիկոլ Փաշինյանը նշել է․ «Կարևոր է նաև արձանագրել, որ Հայաստանի Հանրապետությունում աշխատող մարդիկ, Կառավարությունը և պետությունն այս դպրոցով ներդրում են կատարում ձեր ապագայում, որպեսզի դուք ձեր հետագա կյանքում լինեք ավելի հաջողակ, քան այսօրվա միջին վիճակագրական քաղաքացին, ավելի շատ վաստակեք և ավելի շատ հարկեր վճարեք, որպեսզի դպրոցները հետագայում լինեն ավելի լավը և ձեր երեխաները սովորեն ավելի լավ պայմաններում, ունենան ավելի մեծ հնարավորություններ և ապրեն ավելի լավ»։

Նոր Կեսարիայում դպրոցի բացման արարողությանը Նիկոլ Փաշինյանն իր խոսքում նշել է, որ նորակառույց դպրոցով բնակավայրում ձևավորվել է բոլորովին նոր միջավայր, որը Կառավարությունը ստեղծում է մի նպատակով, որը փակցված է դպրոցի մուտքի մոտ․ «Լավ սովորեք, որ լավ ապրեք»: Վարչապետը նշել է, որ դպրոցը պետք է համարել կյանքի կարևորագույն և առանցքային սիմվոլներից և գործիքներից մեկը։ Ըստ երկրի ղեկավարի՝ երեխաներին պետք է հստակ այդ ուղերձը փոխանցել, թե ինչպես կապրեն հետագա կյանքում՝ մեծապես կախված է նրանից, թե ինչպես են նրանք անցկացնում իրենց ժամանակը դպրոցում։

Զարգացած պետություն ունենալու հարցում երկրի ղեկավարն ընդգծել է դպրոցի, որակով կրթություն ստանալու կարևորությունը․ «Դպրոցներում են ձևավորվում ապագա ավագանու անդամները, համայնքի ղեկավարները, մարզպետները, նախարարները, վարչապետերը և այդպես շարունակ։ Եվ հենց այստեղ է, որ լուծվում են բազմաթիվ հարցեր։ Հենց այստեղ է, որ որոշվում է՝ ունենալո՞ւ ենք արդյոք մենք պետություն, թե չենք ունենալու, և ինչպիսի՞ն է լինելու այդ պետությունը։ Մենք դպրոցը կառուցում ենք՝ որպես առհավատչյա Հայաստանի Հանրապետության հարատևության»։

Ըստ Նիկոլ Փաշինյանի՝ նման դպրոցներ կառուցելով Կառավարությունը ստեղծում է ապագայում ոչ թե «յոլա գնալու», այլ՝ լավ ապրելու հնարավորությունները։

Երկրի ղեկավարի վերջին կանգառը եղել է Թալին համայնքը, որտեղ ծանոթացել է Գառնահովիտ բնակավայրի նորակառույց միջնակարգ դպրոցի պայմաններին։ Շինարարական աշխատանքների համար պետբյուջեից հատկացվել է ավելի քան 1,2 մլրդ դրամ։ Ծրագրի իրականացման արդյունքում կառուցվել է երկհարկանի 1621 քմ ընդհանուր մակերեսով 144 տեղ հզորությամբ դպրոցի նոր շենք, բարեկարգվել բակը, տեղադրվել է 67 կվտ հզորությամբ ֆոտովոլտային կայան։

Այստեղ ևս վարչապետը շնորհավորել է բոլորին դպրոցի շինարարության ավարտի և աշխատանքների մեկնարկի առթիվ և ընդգծել, որ հերթական անգամ կարելի է ասել, որ գյուղում իր պատմության ամենամեծ ներդրումն է տեղի ունեցել. «Մենք պատկերացնում ենք, որ դպրոցը մի կենտրոն է, մի կետ է, առանցք է, որի շուրջ կյանքը պետք է վերստեղծվի Գառնահովիտում»,-ասել է Նիկոլ Փաշինյանը և հույս հայտնել, որ դպրոցը դառնալու է այն կետը, որտեղ կյանքը Գառնահովիտում և մերձակա գյուղերում վերակենդանանալու է, վերաակտիվանալու է, ինչպես նաև դառնալու է սոցիալական շփումների հարթակ բնակչության համար:

«Մենք կառուցում ենք դպրոցներ, որը ոչ միայն ապրելու, այլ լավ ապրելու հմտություններ, լավատեսություն և էներգիա կհաղորդի ոչ միայն երեխաներին, այլև նրանց ծնողներին։ Եվ մենք այս նախագծով, այդ թվում՝ «300 դպրոց, 500 մանկապարտեզ» և էլի «300 դպրոց, 500 մանկապարտեզ», հուսահատության արեալը վերածում ենք կյանքի պետության, որտեղ մարդը պետք է ապրի, որտեղ մարդը պետք է ապրի բարեկեցիկ, ազատ և անվտանգ»,- ընդգծել է երկրի ղեկավարը։

Իր խոսքում վարչապետը նշել է, որ դպրոցը հագեցած է բոլոր անհրաժեշտ ենթակառուցվածքներով, որոնք ունեն Երևան քաղաքի կենտրոնի դպրոցները. «Հիմա ընդհակառակը, կենտրոնում կարող է արդեն կան դպրոցներ, որոնք այս հնարավորությունների մի մասը չունեն»:

Ամփոփելով խոսքը՝ Նիկոլ Փաշինյանն ընդգծել է. «Այլևս կյանքը պետք է ինքն իր մասին անընդհատ հայտարարի Գառնահովիտում, իսկ որպեսզի կյանքն ինքն իր մասին ամեն օր հայտարարի Գառնահովիտում՝ պետք է Գառնահովիտում ապրող մարդիկ ամեն օր իրենք իրենց մասին հայտարարեն, և այդ հայտարարությունը, համոզված եղեք, առանց արձագանք չի մնա»:

Դիտումների քանակ52