«Կրթության բարեփոխումներն իրական արժեք են ստանում, երբ հասնում են դասարան։ Ժամանակակից կրթությունը պահանջում է, որ դպրոցներն արձագանքեն ոչ միայն երեխաների կրթական, այլև նրանց հուզական և սոցիալական զարգացման կարիքներին։ Մեր խնդիրն է առավել զգայուն և խոցելի երեխաներին նախապատրաստել տարբեր մարտահրավերների դիմակայմանը։ Հաշվի առնելով ուսումնական հաստատությունների կարևոր դերակատարումը երեխաների հոգեսոցիալական զարգացման և տոկունության ձևավորման հարցում՝ Հանրապետական մանկավարժահոգեբանական կենտրոնը, Տարածքային մանկավարժահոգեբանական աջակցության կենտրոնները պետք է կենտրոնացնեն ջանքերն այս ուղղությամբ». այս մասին նշել է ԿԳՍՍ նախարարի տեղակալ Արաքսիա Սվաջյանը՝ «Հոգեկան առողջության և հոգեսոցիալական աջակցության ծառայությունների ներդրումը կրթական համակարգում» ծրագրի ամփոփիչ միջոցառման ժամանակ:
Ծրագիրը միտված է դպրոցներում և նախադպրոցական ուսումնական հաստատություններում հոգեկան առողջության և հոգեսոցիալական աջակցության (MHPSS) համակարգի ամրապնդմանը՝ նպաստելով կրթական համակարգի կարողությունների զարգացմանը, փախստական և ընդունող համայնքների երեխաներին առավել արդյունավետ աջակցության տրամադրմանը։ Ծրագիրն իրականացվել է ՅՈՒՆԻՍԵՖ-ի աջակցությամբ՝ ԿԳՄՍ նախարարության և Հանրապետական մանկավարժահոգեբանական կենտրոնի հետ համագործակցությամբ ու Ճապոնիայի կառավարության Ճապոնիայի միջազգային համագործակցության գործակալության (JICA) ֆինանսական աջակցությամբ։
Նախարարի տեղակալը կարևորել է նաև դպրոցներում հոգեբանական ծառայության կազմակերպման բարելավումը․ «Մեր խնդիրն է ուսումնական հաստատություններում հոգեբանական ծառայությունն այնպես կազմակերպել, իրականացնել ու մատուցել, որ այն ոչ միայն ուղղված լինի երեխաների՝ արդեն իսկ ձևավորված խնդիրների հաղթահարմանը, այլև ունենա կանխարգելիչ նշանակություն: Այս նպատակին հասնելու համար կարևոր է մանկապարտեզներում և դպրոցներում հոգեբանական ծառայության ներդրումն ու ուժեղացումը: Արդեն մի քանի տարի է՝ ինչ բոլոր դպրոցներում ներդրել ենք հոգեբանական ծառայություններ, սակայն, ցավոք, ոչ բոլոր ուսումնական հաստատություններում է, որ հոգեբանի թափուր հաստիքը լրացած է: Սրա պատճառը, թերևս, հատկապես գյուղական բնակավայրերում համապատասխան մասնագետների բացակայությունն է»,- ասել է Արաքսիա Սվաջյանը և ընդգծել Մանկավարժական համալսարանի դերը՝ պատրաստելու համապատասխան մասնագետների, որոնք կլրացնեն ոլորտային կադրերի բացը։
Ամփոփելով խոսքը՝ նա շնորհակալություն է հայտնել գործընկերներին հաջող համագործակցության համար և ծրագրի շարունակությանը մաղթել արդյունավետ ընթացք:
Հայաստանում ՅՈՒՆԻՍԵՖ-ի ներկայացուցչի պաշտոնակատար Սիլվիա Մեստրոնին նշել է․ «Երեխաները չեն կարող լիարժեք սովորել և զարգանալ, եթե իրենց ապահով, աջակցված և հոգեպես լավ չեն զգում: Այս համագործակցության շնորհիվ մենք նպաստել ենք դպրոցների և նախադպրոցական ուսումնական հաստատությունների կարողությունների ամրապնդմանը՝ ժամանակին բացահայտելու աջակցության կարիք ունեցող երեխաներին, ապահովելու անհրաժեշտ արձագանքը և ստեղծելու անվտանգ ու ներառական կրթական միջավայր, որտեղ յուրաքանչյուր երեխա, այդ թվում՝ փախստական և այլ խոցելի խմբերի երեխաները, կարող են իրացնել իրենց ամբողջ ներուժը։ Այս առաջընթացը ամուր հիմք է ստեղծում երեխաների հոգեսոցիալական դիմակայունության ամրապնդման և ՀՀ կրթական համակարգում հոգեկան առողջության որակյալ ծառայությունների ընդլայնման համար»։
«Թերևս այս համագործակցության ամենակարևոր արդյունքն այն է, որ դպրոցներն այսօր ավելի պատրաստ են նկատելու, թե երբ է երեխան աջակցության կարիք ունենում և արձագանքելու՝ նախքան նա ստիպված կլինի միայնակ հաղթահարել իր դժվարությունները»,- իր ելույթում ասել է ՀՄԿ տնօրեն Լիլիթ Մնացականյանը:
Միջոցառման շրջանակում տեղի է ունեցել պանելային քննարկում «Հոգեկան առողջությունը և հոգեսոցիալական աջակցությունը կրթական համակարգում․ ձեռքբերումներ, մարտահրավերներ և զարգացման հեռանկարներ» թեմայով: Ներկայացվել են նաև «Հոգեկան առողջությունը և հոգեսոցիալական աջակցությունը կրթական ոլորտում» պիլոտային ծրագրի արդյունքները, «Երեխաների հոգեկան առողջության խթանում և հոգեսոցիալական տոկունության բարձրացում» ձեռնարկը:
