Հունիսի 1-ին, Երեխաների պաշտպանության միջազգային օրվա առթիվ, Խնկո Ապոր անվան ազգային մանկական գրադարանը, Կենտրոն վարչական շրջանի հետ համագործակցությամբ, կազմակերպել էր տոնական միջոցառումներ, որոնք երեխաների օրը վերածել են իսկական տոնի։ Այդ մասին հայտնում են Խնկո Ապոր անվան ազգային մանկական գրադարանից:
Տոնական ծրագրի շրջանակում Բարսեղ Կանաչյանի երաժշտական դպրոցի երգչախումբը հանդես է եկել գեղեցիկ երաժշտական կատարումներով, այնուհետև ՅՈՒՆԵՍԿՕ-ի 33-րդ միջազգային նկարչական մրցույթին մասնակցած գրադարանի նկարչական խմբակի սաները պարգևատրվել են իրենց ստեղծագործական ձեռքբերումների համար։
Միջոցառման ընթացքում ելույթ է ունեցել «Հայ աստղեր» պարային համույթը՝ ներկայացնելով ժամանակակից պարային համարներ, իսկ Հանրային ռադիոյի «Արևիկ» մանկապատանեկան անսամբլը ուրախացրել է փոքրիկներին իր գեղեցիկ կատարումներով։
Ներկաները դիտել են «Քո իրավունքները» թատերական ներկայացումը, որը նվիրված էր երեխաների իրավունքների թեմային, ինչպես նաև «Արի գնանք թատրոն» թատերախմբի ինտերակտիվ տիկնիկային ներկայացումը։
Օրվա ընթացքում երեխաները մասնակցել են «Ներկիր ինքդ» ստեղծագործական նախաձեռնությանը, խաղերի և վիկտորինաների, ցուցադրել իրենց երևակայությունն ու ստեղծագործական կարողությունները, ստացել խրախուսական նվերներ։ Մանկական երգերը,ուրախ տրամադրությունն ու երեխաների ժպիտները օրը դարձնում էին գեղեցիկ և ուրախ։
Միջոցառումը դարձել է գեղեցիկ առիթ՝ ևս մեկ անգամ կարևորելու երեխաների ուրախ մանկությունը։
