ՀՀ պետական եկամուտների կոմիտեի նախագահի տեղակալ Ռաֆայել Գևորգյանի գլխավորությամբ մայիսի 18-ից մեկնարկել են Ասիական զարգացման բանկի (ԱԶԲ) հետ համատեղ իրականացվող «Սահմանային անցակետերի արդիականացման և համատեղ հսկողության իրականացման» ծրագրի շրջանակում կազմակերպված եռօրյա աշխատանքային հանդիպումները։ Այդ մասին հայտնում են ՊԵԿ-ից:
Հանդիպումներին մասնակցում են ԱԶԲ ծրագրի թիմի ներկայացուցիչները, ինչպես նաև հայ-վրացական համատեղ օգտագործման սահմանային անցման կետի աշխատանքային խմբի հայկական կողմի անդամները։
Հանդիպմանը ՊԵԿ նախագահի տեղակալ Ռաֆայել Գևորգյանն ընդգծել է, որ համատեղ սահմանային անցակետի ներդրումը Հայաստանի համար ռազմավարական նշանակություն ունի, քանի որ այն լինելու է հայ-վրացական սահմանին համատեղ հսկողության առաջին անցման կետը։
Ծրագրի շրջանակում արդեն իրականացվել են լայնածավալ աշխատանքներ՝ սահմանահատման գործընթացների վերլուծության և կարիքների գնահատման ուղղությամբ։ Մասնավորապես, ընտրվել է այն հայ-վրացական սահմանային անցակետը, որտեղ նախատեսվում է իրականացնել պիլոտային ծրագիրը՝ Գոգավան-Գուգուտի անցակետը։ Քննարկված տարբերակներից նախապատվությունը տրվել է «Միասնական կամ ընդհանուր հարմարություններով» (Integrated Facility) մոդելին։
Եռօրյա հանդիպումների ընթացքում նախատեսվում է քննարկել համատեղ սահմանային անցակետի ստեղծման և գործունեությանն առնչվող մի շարք առանցքային հարցեր, այդ թվում՝ ստանդարտ գործառնական ընթացակարգերը, տեղեկատվության փոխանակման և կառավարման համակարգերը, ինչպես նաև համատեղ անցակետի տեխնիկական նախագծին վերաբերող հարցերը։ Հարկ է նշել նաև, որ վրաց գործընկերների հետ ԱԶԲ-ի կողմից համանման հանդիպում արդեն կազմակերպվել է։
Հանդիպումների արդյունքում ձեռք բերված պայմանավորվածությունները հիմք կհանդիսանան Հայաստանի և Վրաստանի միջև համատեղ սահմանային անցման կետի ներդրման վերաբերյալ համաձայնագրի նախագծի մշակման մեկնարկի համար։
